Utshovঅধ্যায় 154
154.1
জনমেজয় উবাচ
আপগেয়ং মহাত্মানং ভীষ্মং শস্ত্রভৃতাং বরম্
পিতামহং ভারতানাং ধ্বজং সর্বমহীক্ষিতাম্
154.2
বৃহস্পতিসমং বুদ্ধ্যা ক্ষময়া পৃথিবীসমম্
সমুদ্রমিব গাম্ভীর্যে হিমবন্তমিব স্থিরম্
154.3
প্রজাপতিমিবৌদার্যে তেজসা ভাস্করোপমম্
মহেন্দ্রমিব শত্রূণাং ধ্বংসনং শরবৃষ্টিভিঃ
154.4
রণয়জ্ঞে প্রতিভয়ে স্বাভীলে লোমহর্ষণে
দীক্ষিতং চিররাত্রায় শ্রুত্বা রাজা যুধিষ্ঠিরঃ
154.5
কিমব্রবীন্মহাবাহুঃ সর্বধর্মবিশারদঃ
ভীমসেনার্জুনৌ বাপি কৃষ্ণো বা প্রত্যপদ্যত
154.6
বৈশংপায়ন উবাচ
আপদ্ধর্মার্থকুশলো মহাবুদ্ধির্যুধিষ্ঠিরঃ
সর্বান্ভ্রাতৄন্সমানীয় বাসুদেবং চ সাত্বতম্
উবাচ বদতাং শ্রেষ্ঠঃ সান্ত্বপূর্বমিদং বচঃ
154.7
পর্যাক্রামত সৈন্যানি যত্তাস্তিষ্ঠত দংশিতাঃ
পিতামহেন বো যুদ্ধং পূর্বমেব ভবিষ্যতি
তস্মাত্সপ্তসু সেনাসু প্রণেতৄন্মম পশ্যত
154.8
বাসুদেব উবাচ
যথার্হতি ভবান্বক্তুমস্মিন্কাল উপস্থিতে
তথেদমর্থবদ্বাক্যমুক্তং তে ভরতর্ষভ
154.9
রোচতে মে মহাবাহো ক্রিয়তাং যদনন্তরম্
নায়কাস্তব সেনায়ামভিষিচ্যন্তু সপ্ত বৈ
154.10
বৈশংপায়ন উবাচ
ততো দ্রুপদমানায্য বিরাটং শিনিপুংগবম্
ধৃষ্টদ্যুম্নং চ পাঞ্চাল্যং ধৃষ্টকেতুং চ পার্থিবম্
শিখণ্ডিনং চ পাঞ্চাল্যং সহদেবং চ মাগধম্
154.11
এতান্সপ্ত মহেষ্বাসান্বীরান্যুদ্ধাভিনন্দিনঃ
সেনাপ্রণেতৄন্বিধিবদভ্যষিঞ্চদ্যুধিষ্ঠিরঃ
154.12
সর্বসেনাপতিং চাত্র ধৃষ্টদ্যুম্নমুপাদিশৎ
দ্রোণান্তহেতোরুত্পন্নো য ইদ্ধাজ্জাতবেদসঃ
154.13
সর্বেষামেব তেষাং তু সমস্তানাং মহাত্মনাম্
সেনাপতিপতিং চক্রে গুডাকেশং ধনংজয়ম্
154.14
অর্জুনস্যাপি নেতা চ সংয়ন্তা চৈব বাজিনাম্
সংকর্ষণানুজঃ শ্রীমান্মহাবুদ্ধির্জনার্দনঃ
154.15
তদ্দৃষ্ট্বোপস্থিতং যুদ্ধং সমাসন্নং মহাত্যয়ম্
প্রাবিশদ্ভবনং রাজ্ঞঃ পাণ্ডবস্য হলায়ুধঃ
154.16
সহাক্রূরপ্রভৃতিভির্গদসাম্বোল্মুকাদিভিঃ
রৌক্মিণেয়াহুকসুতৈশ্চারুদেষ্ণপুরোগমৈঃ
154.17
বৃষ্ণিমুখ্যৈরভিগতৈর্ব্যাঘ্রৈরিব বলোত্কটৈঃ
অভিগুপ্তো মহাবাহুর্মরুদ্ভিরিব বাসবঃ
154.18
নীলকৌশেয়বসনঃ কৈলাসশিখরোপমঃ
সিংহখেলগতিঃ শ্রীমান্মদরক্তান্তলোচনঃ
154.19
তং দৃষ্ট্বা ধর্মরাজশ্চ কেশবশ্চ মহাদ্যুতিঃ
উদতিষ্ঠত্তদা পার্থো ভীমকর্মা বৃকোদরঃ
154.20
গাণ্ডীবধন্বা যে চান্যে রাজানস্তত্র কেচন
পূজয়াং চক্রুরভ্যেত্য তে স্ম সর্বে হলায়ুধম্
154.21
ততস্তং পাণ্ডবো রাজা করে পস্পর্শ পাণিনা
বাসুদেবপুরোগাস্তু সর্ব এবাভ্যবাদয়ন্
154.22
বিরাটদ্রুপদৌ বৃদ্ধাবভিবাদ্য হলায়ুধঃ
যুধিষ্ঠিরেণ সহিত উপাবিশদরিংদমঃ
154.23
ততস্তেষূপবিষ্টেষু পার্থিবেষু সমন্ততঃ
বাসুদেবমভিপ্রেক্ষ্য রৌহিণেয়োঽভ্যভাষত
154.24
ভবিতায়ং মহারৌদ্রো দারুণঃ পুরুষক্ষয়ঃ
দিষ্টমেতদ্ধ্রুবং মন্যে ন শক্যমতিবর্তিতুম্
154.25
অস্মাদ্যুদ্ধাত্সমুত্তীর্ণানপি বঃ সসুহৃজ্জনান্
অরোগানক্ষতৈর্দেহৈঃ পশ্যেয়মিতি মে মতিঃ
154.26
সমেতং পার্থিবং ক্ষত্রং কালপক্বমসংশয়ম্
বিমর্দঃ সুমহান্ভাবী মাংসশোণিতকর্দমঃ
154.27
উক্তো ময়া বাসুদেবঃ পুনঃ পুনরুপহ্বরে
সংবন্ধিষু সমাং বৃত্তিং বর্তস্ব মধুসূদন
154.28
পাণ্ডবা হি যথাস্মাকং তথা দুর্যোধনো নৃপঃ
তস্যাপি ক্রিয়তাং যুক্ত্যা সপর্যেতি পুনঃ পুনঃ
154.29
তচ্চ মে নাকরোদ্বাক্যং ত্বদর্থে মধুসূদনঃ
নিবিষ্টঃ সর্বভাবেন ধনংজয়মবেক্ষ্য চ
154.30
ধ্রুবো জয়ঃ পাণ্ডবানামিতি মে নিশ্চিতা মতিঃ
তথা হ্যভিনিবেশোঽয়ং বাসুদেবস্য ভারত
154.31
ন চাহমুত্সহে কৃষ্ণমৃতে লোকমুদীক্ষিতুম্
ততোঽহমনুবর্তামি কেশবস্য চিকীর্ষিতম্
154.32
উভৌ শিষ্যৌ হি মে বীরৌ গদায়ুদ্ধবিশারদৌ
তুল্যস্নেহোঽস্ম্যতো ভীমে তথা দুর্যোধনে নৃপে
154.33
তস্মাদ্যাস্যামি তীর্থানি সরস্বত্যা নিষেবিতুম্
ন হি শক্ষ্যামি কৌরব্যান্নশ্যমানানুপেক্ষিতুম্
154.34
এবমুক্ত্বা মহাবাহুরনুজ্ঞাতশ্চ পাণ্ডবৈঃ
তীর্থয়াত্রাং যয়ৌ রামো নিবর্ত্য মধুসূদনম্