Utshovঅধ্যায় 155
155.1
বৈশংপায়ন উবাচ
এতস্মিন্নেব কালে তু ভীষ্মকস্য মহাত্মনঃ
হিরণ্যলোম্নো নৃপতেঃ সাক্ষাদিন্দ্রসখস্য বৈ
155.2
আহৃতীনামধিপতের্ভোজস্যাতিয়শস্বিনঃ
দাক্ষিণাত্যপতেঃ পুত্রো দিক্ষু রুক্মীতি বিশ্রুতঃ
155.3
যঃ কিংপুরুষসিংহস্য গন্ধমাদনবাসিনঃ
শিষ্যঃ কৃত্স্নং ধনুর্বেদং চতুষ্পাদমবাপ্তবান্
155.4
যো মাহেন্দ্রং ধনুর্লেভে তুল্যং গাণ্ডীবতেজসা
শার্ঙ্গেণ চ মহাবাহুঃ সংমিতং দিব্যমক্ষয়ম্
155.5
ত্রীণ্যেবৈতানি দিব্যানি ধনূংষি দিবিচারিণাম্
বারুণং গাণ্ডিবং তত্র মাহেন্দ্রং বিজয়ং ধনুঃ
155.6
শার্ঙ্গং তু বৈষ্ণবং প্রাহুর্দিব্যং তেজোময়ং ধনুঃ
ধারয়ামাস যত্কৃষ্ণঃ পরসেনাভয়াবহম্
155.7
গাণ্ডীবং পাবকাল্লেভে খাণ্ডবে পাকশাসনিঃ
দ্রুমাদ্রুক্মী মহাতেজা বিজয়ং প্রত্যপদ্যত
155.8
সংছিদ্য মৌরবান্পাশান্নিহত্য মুরমোজসা
নির্জিত্য নরকং ভৌমমাহৃত্য মণিকুণ্ডলে
155.9
ষোডশ স্ত্রীসহস্রাণি রত্নানি বিবিধানি চ
প্রতিপেদে হৃষীকেশঃ শার্ঙ্গং চ ধনুরুত্তমম্
155.10
রুক্মী তু বিজয়ং লব্ধ্বা ধনুর্মেঘসমস্বনম্
বিভীষয়ন্নিব জগত্পাণ্ডবানভ্যবর্তত
155.11
নামৃষ্যত পুরা যোঽসৌ স্ববাহুবলদর্পিতঃ
রুক্মিণ্যা হরণং বীরো বাসুদেবেন ধীমতা
155.12
কৃত্বা প্রতিজ্ঞাং নাহত্বা নিবর্তিষ্যামি কেশবম্
ততোঽন্বধাবদ্বার্ষ্ণেয়ং সর্বশস্ত্রভৃতাং বরম্
155.13
সেনয়া চতুরঙ্গিণ্যা মহত্যা দূরপাতয়া
বিচিত্রায়ুধবর্মিণ্যা গঙ্গয়েব প্রবৃদ্ধয়া
155.14
স সমাসাদ্য বার্ষ্ণেয়ং যোগানামীশ্বরং প্রভুম্
ব্যংসিতো ব্রীডিতো রাজন্নাজগাম স কুণ্ডিনম্
155.15
যত্রৈব কৃষ্ণেন রণে নির্জিতঃ পরবীরহা
তত্র ভোজকটং নাম চক্রে নগরমুত্তমম্
155.16
সৈন্যেন মহতা তেন প্রভূতগজবাজিনা
পুরং তদ্ভুবি বিখ্যাতং নাম্না ভোজকটং নৃপ
155.17
স ভোজরাজঃ সৈন্যেন মহতা পরিবারিতঃ
অক্ষৌহিণ্যা মহাবীর্যঃ পাণ্ডবান্সমুপাগমৎ
155.18
ততঃ স কবচী খড্গী শরী ধন্বী তলী রথী
ধ্বজেনাদিত্যবর্ণেন প্রবিবেশ মহাচমূম্
155.19
বিদিতঃ পাণ্ডবেয়ানাং বাসুদেবপ্রিয়েপ্সয়া
যুধিষ্ঠিরস্তু তং রাজা প্রত্যুদ্গম্যাভ্যপূজয়ৎ
155.20
স পূজিতঃ পাণ্ডুসুতৈর্যথান্যায়ং সুসত্কৃতঃ
প্রতিপূজ্য চ তান্সর্বান্বিশ্রান্তঃ সহসৈনিকঃ
উবাচ মধ্যে বীরাণাং কুন্তীপুত্রং ধনংজয়ম্
155.21
সহায়োঽস্মি স্থিতো যুদ্ধে যদি ভীতোঽসি পাণ্ডব
করিষ্যামি রণে সাহ্যমসহ্যং তব শত্রুভিঃ
155.22
ন হি মে বিক্রমে তুল্যঃ পুমানস্তীহ কশ্চন
নিহত্য সমরে শত্রূংস্তব দাস্যামি ফল্গুন
155.23
ইত্যুক্তো ধর্মরাজস্য কেশবস্য চ সংনিধৌ
শৃণ্বতাং পার্থিবেন্দ্রাণামন্যেষাং চৈব সর্বশঃ
155.24
বাসুদেবমভিপ্রেক্ষ্য ধর্মরাজং চ পাণ্ডবম্
উবাচ ধীমান্কৌন্তেয়ঃ প্রহস্য সখিপূর্বকম্
155.25
যুধ্যমানস্য মে বীর গন্ধর্বৈঃ সুমহাবলৈঃ
সহায়ো ঘোষয়াত্রায়াং কস্তদাসীত্সখা মম
155.26
তথা প্রতিভয়ে তস্মিন্দেবদানবসংকুলে
খাণ্ডবে যুধ্যমানস্য কঃ সহায়স্তদাভবৎ
155.27
নিবাতকবচৈর্যুদ্ধে কালকেয়ৈশ্চ দানবৈঃ
তত্র মে যুধ্যমানস্য কঃ সহায়স্তদাভবৎ
155.28
তথা বিরাটনগরে কুরুভিঃ সহ সংগরে
যুধ্যতো বহুভিস্তাত কঃ সহায়োঽভবন্মম
155.29
উপজীব্য রণে রুদ্রং শক্রং বৈশ্রবণং যমম্
বরুণং পাবকং চৈব কৃপং দ্রোণং চ মাধবম্
155.30
ধারয়ন্গাণ্ডিবং দিব্যং ধনুস্তেজোময়ং দৃঢম্
অক্ষয্যশরসংয়ুক্তো দিব্যাস্ত্রপরিবৃংহিতঃ
155.31
কৌরবাণাং কুলে জাতঃ পাণ্ডোঃ পুত্রো বিশেষতঃ
দ্রোণং ব্যপদিশঞ্শিষ্যো বাসুদেবসহায়বান্
155.32
কথমস্মদ্বিধো ব্রূয়াদ্ভীতোঽস্মীত্যয়শস্করম্
বচনং নরশার্দূল বজ্রায়ুধমপি স্বয়ম্
155.33
নাস্মি ভীতো মহাবাহো সহায়ার্থশ্চ নাস্তি মে
যথাকামং যথায়োগং গচ্ছ বান্যত্র তিষ্ঠ বা
155.34
বিনিবর্ত্য ততো রুক্মী সেনাং সাগরসংনিভাম্
দুর্যোধনমুপাগচ্ছত্তথৈব ভরতর্ষভ
155.35
তথৈব চাভিগম্যৈনমুবাচ স নরাধিপঃ
প্রত্যাখ্যাতশ্চ তেনাপি স তদা শূরমানিনা
155.36
দ্বাবেব তু মহারাজ তস্মাদ্যুদ্ধাদ্ব্যপেয়তুঃ
রৌহিণেয়শ্চ বার্ষ্ণেয়ো রুক্মী চ বসুধাধিপঃ
155.37
গতে রামে তীর্থয়াত্রাং ভীষ্মকস্য সুতে তথা
উপাবিশন্পাণ্ডবেয়া মন্ত্রায় পুনরেব হি
155.38
সমিতির্ধর্মরাজস্য সা পার্থিবসমাকুলা
শুশুভে তারকাচিত্রা দ্যৌশ্চন্দ্রেণেব ভারত