অধ্যায় 156

156.1

জনমেজয় উবাচ
তথা ব্যূঢেষ্বনীকেষু কুরুক্ষেত্রে দ্বিজর্ষভ
কিমকুর্বন্ত কুরবঃ কালেনাভিপ্রচোদিতাঃ

বৈশংপায়ন উবাচ
তথা ব্যূঢেষ্বনীকেষু যত্তেষু ভরতর্ষভ
ধৃতরাষ্ট্রো মহারাজ সংজয়ং বাক্যমব্রবীৎ

এহি সংজয় মে সর্বমাচক্ষ্বানবশেষতঃ
সেনানিবেশে যদ্বৃত্তং কুরুপাণ্ডবসেনয়োঃ

দিষ্টমেব পরং মন্যে পৌরুষং চাপ্যনর্থকম্
যদহং জানমানোঽপি যুদ্ধদোষান্ক্ষয়োদয়ান্

তথাপি নিকৃতিপ্রজ্ঞং পুত্রং দুর্দ্যূতদেবিনম্
ন শক্নোমি নিয়ন্তুং বা কর্তুং বা হিতমাত্মনঃ

ভবত্যেব হি মে সূত বুদ্ধির্দোষানুদর্শিনী
দুর্যোধনং সমাসাদ্য পুনঃ সা পরিবর্ততে

এবং গতে বৈ যদ্ভাবি তদ্ভবিষ্যতি সংজয়
ক্ষত্রধর্মঃ কিল রণে তনুত্যাগোঽভিপূজিতঃ

সংজয় উবাচ
ত্বদ্যুক্তোঽয়মনুপ্রশ্নো মহারাজ যথার্হসি
ন তু দুর্যোধনে দোষমিমমাসক্তুমর্হসি
শৃণুষ্বানবশেষেণ বদতো মম পার্থিব

য আত্মনো দুশ্চরিতাদশুভং প্রাপ্নুয়ান্নরঃ
এনসা ন স দৈবং বা কালং বা গন্তুমর্হতি

মহারাজ মনুষ্যেষু নিন্দ্যং যঃ সর্বমাচরেৎ
স বধ্যঃ সর্বলোকস্য নিন্দিতানি সমাচরন্

নিকারা মনুজশ্রেষ্ঠ পাণ্ডবৈস্ত্বত্প্রতীক্ষয়া
অনুভূতাঃ সহামাত্যৈর্নিকৃতৈরধিদেবনে

হয়ানাং চ গজানাং চ রাজ্ঞাং চামিততেজসাম্
বৈশসং সমরে বৃত্তং যত্তন্মে শৃণু সর্বশঃ

স্থিরো ভূত্বা মহারাজ সর্বলোকক্ষয়োদয়ম্
যথাভূতং মহায়ুদ্ধে শ্রুত্বা মা বিমনা ভব

ন হ্যেব কর্তা পুরুষঃ কর্মণোঃ শুভপাপয়োঃ
অস্বতন্ত্রো হি পুরুষঃ কার্যতে দারুয়ন্ত্রবৎ

কেচিদীশ্বরনির্দিষ্টাঃ কেচিদেব যদৃচ্ছয়া
পূর্বকর্মভিরপ্যন্যে ত্রৈধমেতদ্বিকৃষ্যতে