অধ্যায় 157

157.1

সংজয় উবাচ
হিরণ্বত্যাং নিবিষ্টেষু পাণ্ডবেষু মহাত্মসু
দুর্যোধনো মহারাজ কর্ণেন সহ ভারত

সৌবলেন চ রাজেন্দ্র তথা দুঃশাসনেন চ
আহূয়োপহ্বরে রাজন্নুলূকমিদমব্রবীৎ

উলূক গচ্ছ কৈতব্য পাণ্ডবান্সহসোমকান্
গত্বা মম বচো ব্রূহি বাসুদেবস্য শৃণ্বতঃ

ইদং তত্সমনুপ্রাপ্তং বর্ষপূগাভিচিন্তিতম্
পাণ্ডবানাং কুরূণাং চ যুদ্ধং লোকভয়ংকরম্

যদেতত্কত্থনাবাক্যং সংজয়ো মহদব্রবীৎ
মধ্যে কুরূণাং কৌন্তেয় তস্য কালোঽয়মাগতঃ
যথা বঃ সংপ্রতিজ্ঞাতং তত্সর্বং ক্রিয়তামিতি

অমর্ষং রাজ্যহরণং বনবাসং চ পাণ্ডব
দ্রৌপদ্যাশ্চ পরিক্লেশং সংস্মরন্পুরুষো ভব

যদর্থং ক্ষত্রিয়া সূতে গর্ভং তদিদমাগতম্
বলং বীর্যং চ শৌর্যং চ পরং চাপ্যস্ত্রলাঘবম্
পৌরুষং দর্শয়ন্যুদ্ধে কোপস্য কুরু নিষ্কৃতিম্

পরিক্লিষ্টস্য দীনস্য দীর্ঘকালোষিতস্য চ
ন স্ফুটেদ্ধৃদয়ং কস্য ঐশ্বর্যাদ্ভ্রংশিতস্য চ

কুলে জাতস্য শূরস্য পরবিত্তেষু গৃধ্যতঃ
আচ্ছিন্নং রাজ্যমাক্রম্য কোপং কস্য ন দীপয়েৎ

যত্তদুক্তং মহদ্বাক্যং কর্মণা তদ্বিভাব্যতাম্
অকর্মণা কত্থিতেন সন্তঃ কুপুরুষং বিদুঃ

অমিত্রাণাং বশে স্থানং রাজ্যস্য চ পুনর্ভবঃ
দ্বাবর্থৌ যুধ্যমানস্য তস্মাত্কুরুত পৌরুষম্

অস্মান্বা ত্বং পরাজিত্য প্রশাধি পৃথিবীমিমাম্
অথ বা নিহতোঽস্মাভির্বীরলোকং গমিষ্যসি

রাষ্ট্রাত্প্রব্রাজনং ক্লেশং বনবাসং চ পাণ্ডব
কৃষ্ণায়াশ্চ পরিক্লেশং সংস্মরন্পুরুষো ভব

অপ্রিয়াণাং চ বচনে প্রব্রজত্সু পুনঃ পুনঃ
অমর্ষং দর্শয়াদ্য ত্বমমর্ষো হ্যেব পৌরুষম্

ক্রোধো বলং তথা বীর্যং জ্ঞানয়োগোঽস্ত্রলাঘবম্
ইহ তে পার্থ দৃশ্যন্তাং সংগ্রামে পুরুষো ভব

তং চ তূবরকং মূঢং বহ্বাশিনমবিদ্যকম্
উলূক মদ্বচো ব্রূয়া অসকৃদ্ভীমসেনকম্

অশক্তেনৈব যচ্ছপ্তং সভামধ্যে বৃকোদর
দুঃশাসনস্য রুধিরং পীয়তাং যদি শক্যতে

লোহাভিহারো নির্বৃত্তঃ কুরুক্ষেত্রমকর্দমম্
পুষ্টাস্তেঽশ্বা ভৃতা যোধাঃ শ্বো যুধ্যস্ব সকেশবঃ