Utshovঅধ্যায় 158
158.1
সংজয় উবাচ
সেনানিবেশং সংপ্রাপ্য কৈতব্যঃ পাণ্ডবস্য হ
সমাগতঃ পাণ্ডবেয়ৈর্যুধিষ্ঠিরমভাষত
158.2
অভিজ্ঞো দূতবাক্যানাং যথোক্তং ব্রুবতো মম
দুর্যোধনসমাদেশং শ্রুত্বা ন ক্রোদ্ধুমর্হসি
158.3
যুধিষ্ঠির উবাচ
উলূক ন ভয়ং তেঽস্তি ব্রূহি ত্বং বিগতজ্বরঃ
যন্মতং ধার্তরাষ্ট্রস্য লুব্ধস্যাদীর্ঘদর্শিনঃ
158.4
সংজয় উবাচ
ততো দ্যুতিমতাং মধ্যে পাণ্ডবানাং মহাত্মনাম্
সৃঞ্জয়ানাং চ সর্বেষাং কৃষ্ণস্য চ যশস্বিনঃ
158.5
দ্রুপদস্য সপুত্রস্য বিরাটস্য চ সংনিধৌ
ভূমিপানাং চ সর্বেষাং মধ্যে বাক্যং জগাদ হ
158.6
ইদং ত্বামব্রবীদ্রাজা ধার্তরাষ্ট্রো মহামনাঃ
শৃণ্বতাং কুরুবীরাণাং তন্নিবোধ নরাধিপ
158.7
পরাজিতোঽসি দ্যূতেন কৃষ্ণা চানায়িতা সভাম্
শক্যোঽমর্ষো মনুষ্যেণ কর্তুং পুরুষমানিনা
158.8
দ্বাদশৈব তু বর্ষাণি বনে ধিষ্ণ্যাদ্বিবাসিতাঃ
সংবত্সরং বিরাটস্য দাস্যমাস্থায় চোষিতাঃ
158.9
অমর্ষং রাজ্যহরণং বনবাসং চ পাণ্ডব
দ্রৌপদ্যাশ্চ পরিক্লেশং সংস্মরন্পুরুষো ভব
158.10
অশক্তেন চ যচ্ছপ্তং ভীমসেনেন পাণ্ডব
দুঃশাসনস্য রুধিরং পীয়তাং যদি শক্যতে
158.11
লোহাভিহারো নির্বৃত্তঃ কুরুক্ষেত্রমকর্দমম্
সমঃ পন্থা ভৃতা যোধাঃ শ্বো যুধ্যস্ব সকেশবঃ
158.12
অসমাগম্য ভীষ্মেণ সংয়ুগে কিং বিকত্থসে
আরুরুক্ষুর্যথা মন্দঃ পর্বতং গন্ধমাদনম্
158.13
দ্রোণং চ যুধ্যতাং শ্রেষ্ঠং শচীপতিসমং যুধি
অজিত্বা সংয়ুগে পার্থ রাজ্যং কথমিহেচ্ছসি
158.14
ব্রাহ্মে ধনুষি চাচার্যং বেদয়োরন্তরং দ্বয়োঃ
যুধি ধুর্যমবিক্ষোভ্যমনীকধরমচ্যুতম্
158.15
দ্রোণং মোহাদ্যুধা পার্থ যজ্জিগীষসি তন্মৃষা
ন হি শুশ্রুম বাতেন মেরুমুন্মথিতং গিরিম্
158.16
অনিলো বা বহেন্মেরুং দ্যৌর্বাপি নিপতেন্মহীম্
যুগং বা পরিবর্তেত যদ্যেবং স্যাদ্যথাত্থ মাম্
158.17
কো হ্যাভ্যাং জীবিতাকাঙ্ক্ষী প্রাপ্যাস্ত্রমরিমর্দনম্
গজো বাজী নরো বাপি পুনঃ স্বস্তি গৃহান্ব্রজেৎ
158.18
কথমাভ্যামভিধ্যাতঃ সংসৃষ্টো দারুণেন বা
রণে জীবন্বিমুচ্যেত পদা ভূমিমুপস্পৃশন্
158.19
কিং দর্দুরঃ কূপশয়ো যথেমাং; ন বুধ্যসে রাজচমূং সমেতাম্
দুরাধর্ষাং দেবচমূপ্রকাশাং; গুপ্তাং নরেন্দ্রৈস্ত্রিদশৈরিব দ্যাম্
158.20
প্রাচ্যৈঃ প্রতীচ্যৈরথ দাক্ষিণাত্যৈ;রুদীচ্যকাম্বোজশকৈঃ খশৈশ্চ
শাল্বৈঃ সমত্স্যৈঃ কুরুমধ্যদেশৈ;র্ম্লেচ্ছৈঃ পুলিন্দৈর্দ্রবিডান্ধ্রকাঞ্চ্যৈঃ
158.21
নানাজনৌঘং যুধি সংপ্রবৃদ্ধং; গাঙ্গং যথা বেগমবারণীয়ম্
মাং চ স্থিতং নাগবলস্য মধ্যে; যুয়ুত্সসে মন্দ কিমল্পবুদ্ধে
158.22
ইত্যেবমুক্ত্বা রাজানং ধর্মপুত্রং যুধিষ্ঠিরম্
অভ্যাবৃত্য পুনর্জিষ্ণুমুলূকঃ প্রত্যভাষত
158.23
অকত্থমানো যুধ্যস্ব কত্থসেঽর্জুন কিং বহু
পর্যায়াত্সিদ্ধিরেতস্য নৈতত্সিধ্যতি কত্থনাৎ
158.24
যদীদং কত্থনাত্সিধ্যেত্কর্ম লোকে ধনংজয়
সর্বে ভবেয়ুঃ সিদ্ধার্থা বহু কত্থেত দুর্গতঃ
158.25
জানামি তে বাসুদেবং সহায়ং; জানামি তে গাণ্ডিবং তালমাত্রম্
জানাম্যেতত্ত্বাদৃশো নাস্তি যোদ্ধা; রাজ্যং চ তে জানমানো হরামি
158.26
ন তু পর্যায়ধর্মেণ সিদ্ধিং প্রাপ্নোতি ভূয়সীম্
মনসৈব হি ভূতানি ধাতা প্রকুরুতে বশে
158.27
ত্রয়োদশ সমা ভুক্তং রাজ্যং বিলপতস্তব
ভূয়শ্চৈব প্রশাসিষ্যে নিহত্য ত্বাং সবান্ধবম্
158.28
ক্ব তদা গাণ্ডিবং তেঽভূদ্যত্ত্বং দাসপণে জিতঃ
ক্ব তদা ভীমসেনস্য বলমাসীচ্চ ফল্গুন
158.29
সগদাদ্ভীমসেনাচ্চ পার্থাচ্চৈব সগাণ্ডিবাৎ
ন বৈ মোক্ষস্তদা বোঽভূদ্বিনা কৃষ্ণামনিন্দিতাম্
158.30
সা বো দাস্যং সমাপন্নান্মোক্ষয়ামাস ভামিনী
অমানুষ্যসমায়ুক্তান্দাস্যকর্মণ্যবস্থিতান্
158.31
অবোচং যত্ষণ্ঢতিলানহং বস্তথ্যমেব তৎ
ধৃতা হি বেণী পার্থেন বিরাটনগরে তদা
158.32
সূদকর্মণি চ শ্রান্তং বিরাটস্য মহানসে
ভীমসেনেন কৌন্তেয় যচ্চ তন্মম পৌরুষম্
158.33
এবমেব সদা দণ্ডং ক্ষত্রিয়াঃ ক্ষত্রিয়ে দধুঃ
শ্রেণ্যাং কক্ষ্যাং চ বেণ্যাং চ সংয়ুগে যঃ পলায়তে
158.34
ন ভয়াদ্বাসুদেবস্য ন চাপি তব ফল্গুন
রাজ্যং প্রতিপ্রদাস্যামি যুধ্যস্ব সহকেশবঃ
158.35
ন মায়া হীন্দ্রজালং বা কুহকা বা বিভীষণী
আত্তশস্ত্রস্য মে যুদ্ধে বহন্তি প্রতিগর্জনাঃ
158.36
বাসুদেবসহস্রং বা ফল্গুনানাং শতানি বা
আসাদ্য মামমোঘেষুং দ্রবিষ্যন্তি দিশো দশ
158.37
সংয়ুগং গচ্ছ ভীষ্মেণ ভিন্ধি ত্বং শিরসা গিরিম্
প্রতরেমং মহাগাধং বাহুভ্যাং পুরুষোদধিম্
158.38
শারদ্বতমহীমানং বিবিংশতিঝষাকুলম্
বৃহদ্বলসমুচ্চালং সৌমদত্তিতিমিংগিলম্
158.39
দুঃশাসনৌঘং শলশল্যমত্স্যং; সুষেণচিত্রায়ুধনাগনক্রম্
জয়দ্রথাদ্রিং পুরুমিত্রগাধং; দুর্মর্ষণোদং শকুনিপ্রপাতম্
158.40
শস্ত্রৌঘমক্ষয্যমতিপ্রবৃদ্ধং; যদাবগাহ্য শ্রমনষ্টচেতাঃ
ভবিষ্যসি ত্বং হতসর্ববান্ধব;স্তদা মনস্তে পরিতাপমেষ্যতি
158.41
তদা মনস্তে ত্রিদিবাদিবাশুচে;র্নিবর্ততাং পার্থ মহীপ্রশাসনাৎ
রাজ্যং প্রশাস্তুং হি সুদুর্লভং ত্বয়া; বুভূষতা স্বর্গ ইবাতপস্বিনা