অধ্যায় 159

159.1

সংজয় উবাচ
উলূকস্ত্বর্জুনং ভূয়ো যথোক্তং বাক্যমব্রবীৎ
আশীবিষমিব ক্রুদ্ধং তুদন্বাক্যশলাকয়া

তস্য তদ্বচনং শ্রুত্বা রুষিতাঃ পাণ্ডবা ভৃশম্
প্রাগেব ভৃশসংক্রুদ্ধাঃ কৈতব্যেন প্রধর্ষিতাঃ

নাসনেষ্ববতিষ্ঠন্ত বাহূংশ্চৈব বিচিক্ষিপুঃ
আশীবিষা ইব ক্রুদ্ধা বীক্ষাং চক্রুঃ পরস্পরম্

অবাক্শিরা ভীমসেনঃ সমুদৈক্ষত কেশবম্
নেত্রাভ্যাং লোহিতান্তাভ্যামাশীবিষ ইব শ্বসন্

আর্তং বাতাত্মজং দৃষ্ট্বা ক্রোধেনাভিহতং ভৃশম্
উত্স্ময়ন্নিব দাশার্হঃ কৈতব্যং প্রত্যভাষত

প্রয়াহি শীঘ্রং কৈতব্য ব্রূয়াশ্চৈব সুয়োধনম্
শ্রুতং বাক্যং গৃহীতোঽর্থো মতং যত্তে তথাস্তু তৎ

মদ্বচশ্চাপি ভূয়স্তে বক্তব্যঃ স সুয়োধনঃ
শ্ব ইদানীং প্রদৃশ্যেথাঃ পুরুষো ভব দুর্মতে

মন্যসে যচ্চ মূঢ ত্বং ন যোত্স্যতি জনার্দনঃ
সারথ্যেন বৃতঃ পার্থৈরিতি ত্বং ন বিভেষি চ

জঘন্যকালমপ্যেতদ্ভবেদ্যত্সর্বপার্থিবান্
নির্দহেয়মহং ক্রোধাত্তৃণানীব হুতাশনঃ

যুধিষ্ঠিরনিয়োগাত্তু ফল্গুনস্য মহাত্মনঃ
করিষ্যে যুধ্যমানস্য সারথ্যং বিদিতাত্মনঃ

যদ্যুত্পতসি লোকাংস্ত্রীন্যদ্যাবিশসি ভূতলম্
তত্র তত্রার্জুনরথং প্রভাতে দ্রক্ষ্যসেঽগ্রতঃ

যচ্চাপি ভীমসেনস্য মন্যসে মোঘগর্জিতম্
দুঃশাসনস্য রুধিরং পীতমিত্যবধার্যতাম্

ন ত্বাং সমীক্ষতে পার্থো নাপি রাজা যুধিষ্ঠিরঃ
ন ভীমসেনো ন যমৌ প্রতিকূলপ্রভাষিণম্