Utshovঅধ্যায় 160
160.1
সংজয় উবাচ
দুর্যোধনস্য তদ্বাক্যং নিশম্য ভরতর্ষভঃ
নেত্রাভ্যামতিতাম্রাভ্যাং কৈতব্যং সমুদৈক্ষত
160.2
স কেশবমভিপ্রেক্ষ্য গুডাকেশো মহায়শাঃ
অভ্যভাষত কৈতব্যং প্রগৃহ্য বিপুলং ভুজম্
160.3
স্ববীর্যং যঃ সমাশ্রিত্য সমাহ্বয়তি বৈ পরান্
অভীতঃ পূরয়ঞ্শক্তিং স বৈ পুরুষ উচ্যতে
160.4
পরবীর্যং সমাশ্রিত্য যঃ সমাহ্বয়তে পরান্
ক্ষত্রবন্ধুরশক্তত্বাল্লোকে স পুরুষাধমঃ
160.5
স ত্বং পরেষাং বীর্যেণ মন্যসে বীর্যমাত্মনঃ
স্বয়ং কাপুরুষো মূঢঃ পরাংশ্চ ক্ষেপ্তুমিচ্ছসি
160.6
যস্ত্বং বৃদ্ধং সর্বরাজ্ঞাং হিতবুদ্ধিং জিতেন্দ্রিয়ম্
মরণায় মহাবুদ্ধিং দীক্ষয়িত্বা বিকত্থসে
160.7
ভাবস্তে বিদিতোঽস্মাভির্দুর্বুদ্ধে কুলপাংসন
ন হনিষ্যন্তি গাঙ্গেয়ং পাণ্ডবা ঘৃণয়েতি চ
160.8
যস্য বীর্যং সমাশ্রিত্য ধার্তরাষ্ট্র বিকত্থসে
হন্তাস্মি প্রথমং ভীষ্মং মিষতাং সর্বধন্বিনাম্
160.9
কৈতব্য গত্বা ভরতান্সমেত্য; সুয়োধনং ধার্তরাষ্ট্রং ব্রবীহি
তথেত্যাহ অর্জুনঃ সব্যসাচী; নিশাব্যপায়ে ভবিতা বিমর্দঃ
160.10
যদ্বোঽব্রবীদ্বাক্যমদীনসত্ত্বো; মধ্যে কুরূণাং হর্ষয়ন্সত্যসংধঃ
অহং হন্তা পাণ্ডবানামনীকং; শাল্বেয়কাংশ্চেতি মমৈষ ভারঃ
160.11
হন্যামহং দ্রোণমৃতে হি লোকং; ন তে ভয়ং বিদ্যতে পাণ্ডবেভ্যঃ
ততো হি তে লব্ধতমং চ রাজ্যং; ক্ষয়ং গতাঃ পাণ্ডবাশ্চেতি ভাবঃ
160.12
স দর্পপূর্ণো ন সমীক্ষসে ত্ব;মনর্থমাত্মন্যপি বর্তমানম্
তস্মাদহং তে প্রথমং সমূহে; হন্তা সমক্ষং কুরুবৃদ্ধমেব
160.13
সূর্যোদয়ে যুক্তসেনঃ প্রতীক্ষ্য; ধ্বজী রথী রক্ষ চ সত্যসংধম্
অহং হি বঃ পশ্যতাং দ্বীপমেনং; রথাদ্ভীষ্মং পাতয়িতাস্মি বাণৈঃ
160.14
শ্বোভূতে কত্থনাবাক্যং বিজ্ঞাস্যতি সুয়োধনঃ
অর্দিতং শরজালেন ময়া দৃষ্ট্বা পিতামহম্
160.15
যদুক্তশ্চ সভামধ্যে পুরুষো হ্রস্বদর্শনঃ
ক্রুদ্ধেন ভীমসেনেন ভ্রাতা দুঃশাসনস্তব
160.16
অধর্মজ্ঞো নিত্যবৈরী পাপবুদ্ধির্নৃশংসকৃৎ
সত্যাং প্রতিজ্ঞাং নচিরাদ্রক্ষ্যসে তাং সুয়োধন
160.17
অভিমানস্য দর্পস্য ক্রোধপারুষ্যয়োস্তথা
নৈষ্ঠুর্যস্যাবলেপস্য আত্মসংভাবনস্য চ
160.18
নৃশংসতায়াস্তৈক্ষ্ণ্যস্য ধর্মবিদ্বেষণস্য চ
অধর্মস্যাতিবাদস্য বৃদ্ধাতিক্রমণস্য চ
160.19
দর্শনস্য চ বক্রস্য কৃত্স্নস্যাপনয়স্য চ
দ্রক্ষ্যসি ত্বং ফলং তীব্রমচিরেণ সুয়োধন
160.20
বাসুদেবদ্বিতীয়ে হি ময়ি ক্রুদ্ধে নরাধিপ
আশা তে জীবিতে মূঢ রাজ্যে বা কেন হেতুনা
160.21
শান্তে ভীষ্মে তথা দ্রোণে সূতপুত্রে চ পাতিতে
নিরাশো জীবিতে রাজ্যে পুত্রেষু চ ভবিষ্যসি
160.22
ভ্রাতৄণাং নিধনং দৃষ্ট্বা পুত্রাণাং চ সুয়োধন
ভীমসেনেন নিহতো দুষ্কৃতানি স্মরিষ্যসি
160.23
ন দ্বিতীয়াং প্রতিজ্ঞাং হি প্রতিজ্ঞাস্যতি কেশবঃ
সত্যং ব্রবীম্যহং হ্যেতত্সর্বং সত্যং ভবিষ্যতি
160.24
ইত্যুক্তঃ কৈতবো রাজংস্তদ্বাক্যমুপধার্য চ
অনুজ্ঞাতো নিববৃতে পুনরেব যথাগতম্
160.25
উপাবৃত্য তু পাণ্ডুভ্যঃ কৈতব্যো ধৃতরাষ্ট্রজম্
গত্বা যথোক্তং তত্সর্বমুবাচ কুরুসংসদি
160.26
কেশবার্জুনয়োর্বাক্যং নিশম্য ভরতর্ষভঃ
দুঃশাসনং চ কর্ণং চ শকুনিং চাভ্যভাষত
160.27
আজ্ঞাপয়ত রাজ্ঞশ্চ বলং মিত্রবলং তথা
যথা প্রাগুদয়াত্সর্বা যুক্তা তিষ্ঠত্যনীকিনী
160.28
ততঃ কর্ণসমাদিষ্টা দূতাঃ প্রত্বরিতা রথৈঃ
উষ্ট্রবামীভিরপ্যন্যে সদশ্বৈশ্চ মহাজবৈঃ
160.29
তূর্ণং পরিয়য়ুঃ সেনাং কৃত্স্নাং কর্ণস্য শাসনাৎ
আজ্ঞাপয়ন্তো রাজ্ঞস্তান্যোগঃ প্রাগুদয়াদিতি