অধ্যায় 161

161.1

সংজয় উবাচ
উলূকস্য বচঃ শ্রুত্বা কুন্তীপুত্রো যুধিষ্ঠিরঃ
সেনাং নির্যাপয়ামাস ধৃষ্টদ্যুম্নপুরোগমাম্

পদাতিনীং নাগবতীং রথিনীমশ্ববৃন্দিনীম্
চতুর্বিধবলাং ভীমামকম্প্যাং পৃথিবীমিব

ভীমসেনাদিভির্গুপ্তাং সার্জুনৈশ্চ মহারথৈঃ
ধৃষ্টদ্যুম্নবশাং দুর্গাং সাগরস্তিমিতোপমাম্

তস্যাস্ত্বগ্রে মহেষ্বাসঃ পাঞ্চাল্যো যুদ্ধদুর্মদঃ
দ্রোণপ্রেপ্সুরনীকানি ধৃষ্টদ্যুম্নঃ প্রকর্ষতি

যথাবলং যথোত্সাহং রথিনঃ সমুপাদিশৎ
অর্জুনং সূতপুত্রায় ভীমং দুর্যোধনায় চ

অশ্বত্থাম্নে চ নকুলং শৈব্যং চ কৃতবর্মণে
সৈন্ধবায় চ বার্ষ্ণেয়ং যুয়ুধানমুপাদিশৎ

শিখণ্ডিনং চ ভীষ্মায় প্রমুখে সমকল্পয়ৎ
সহদেবং শকুনয়ে চেকিতানং শলায় চ

ধৃষ্টকেতুং চ শল্যায় গৌতমায়োত্তমৌজসম্
দ্রৌপদেয়াংশ্চ পঞ্চভ্যস্ত্রিগর্তেভ্যঃ সমাদিশৎ

বৃষসেনায় সৌভদ্রং শেষাণাং চ মহীক্ষিতাম্
সমর্থং তং হি মেনে বৈ পার্থাদভ্যধিকং রণে

এবং বিভজ্য যোধাংস্তান্পৃথক্চ সহ চৈব হ
জ্বালাবর্ণো মহেষ্বাসো দ্রোণমংশমকল্পয়ৎ

ধৃষ্টদ্যুম্নো মহেষ্বাসঃ সেনাপতিপতিস্ততঃ
বিধিবদ্ব্যূহ্য মেধাবী যুদ্ধায় ধৃতমানসঃ

যথাদিষ্টান্যনীকানি পাণ্ডবানাময়োজয়ৎ
জয়ায় পাণ্ডুপুত্রাণাং যত্তস্তস্থৌ রণাজিরে