Chapter 161

161.1

संजय उवाच
उलूकस्य वचः श्रुत्वा कुन्तीपुत्रो युधिष्ठिरः
सेनां निर्यापयामास धृष्टद्युम्नपुरोगमाम्

Sanjaya uvacha
Ulukasya vachah shrutva kuntiputro yudhishthirah
Senam niryapayamasa dhrishtadyumnapurogamam

पदातिनीं नागवतीं रथिनीमश्ववृन्दिनीम्
चतुर्विधबलां भीमामकम्प्यां पृथिवीमिव

Padatinim nagavatim rathinimashvavrindinim
Chaturvidhabalam bhimamakampyam prithivimiva

भीमसेनादिभिर्गुप्तां सार्जुनैश्च महारथैः
धृष्टद्युम्नवशां दुर्गां सागरस्तिमितोपमाम्

Bhimasenadibhirguptam sarjunaishcha maharathaih
Dhrishtadyumnavasham durgam sagarastimitopamam

तस्यास्त्वग्रे महेष्वासः पाञ्चाल्यो युद्धदुर्मदः
द्रोणप्रेप्सुरनीकानि धृष्टद्युम्नः प्रकर्षति

Tasyastvagre maheshvasah panchalyo yuddhadurmadah
Dronaprepsuranikani dhrishtadyumnah prakarshati

यथाबलं यथोत्साहं रथिनः समुपादिशत्
अर्जुनं सूतपुत्राय भीमं दुर्योधनाय च

Yathabalam yathotsaham rathinah samupadishat
Arjunam sutaputraya bhimam duryodhanaya cha

अश्वत्थाम्ने च नकुलं शैब्यं च कृतवर्मणे
सैन्धवाय च वार्ष्णेयं युयुधानमुपादिशत्

Ashvatthamne cha nakulam shaibyam cha kritavarmane
Saindhavaya cha varshneyam yuyudhanamupadishat

शिखण्डिनं च भीष्माय प्रमुखे समकल्पयत्
सहदेवं शकुनये चेकितानं शलाय च

Shikhandinam cha bhishmaya pramukhe samakalpayat
Sahadevam shakunaye chekitanam shalaya cha

धृष्टकेतुं च शल्याय गौतमायोत्तमौजसम्
द्रौपदेयांश्च पञ्चभ्यस्त्रिगर्तेभ्यः समादिशत्

Dhrishtaketum cha shalyaya gautamayottamaujasam
Draupadeyanshcha panchabhyastrigartebhyah samadishat

वृषसेनाय सौभद्रं शेषाणां च महीक्षिताम्
समर्थं तं हि मेने वै पार्थादभ्यधिकं रणे

Vrishasenaya saubhadram sheshanam cha mahikshitam
Samartham tam hi mene vai parthadabhyadhikam rane

एवं विभज्य योधांस्तान्पृथक्च सह चैव ह
ज्वालावर्णो महेष्वासो द्रोणमंशमकल्पयत्

Evam vibhajya yodhanstanprithakcha saha chaiva ha
Jvalavarno maheshvaso dronamanshamakalpayat

धृष्टद्युम्नो महेष्वासः सेनापतिपतिस्ततः
विधिवद्व्यूह्य मेधावी युद्धाय धृतमानसः

Dhrishtadyumno maheshvasah senapatipatistatah
Vidhivadvyuhya medhavi yuddhaya dhritamanasah

यथादिष्टान्यनीकानि पाण्डवानामयोजयत्
जयाय पाण्डुपुत्राणां यत्तस्तस्थौ रणाजिरे

Yathadishtanyanikani pandavanamayojayat
Jayaya panduputranam yattastasthau ranajire