Utshovঅধ্যায় 162
162.1
ধৃতরাষ্ট্র উবাচ
প্রতিজ্ঞাতে ফল্গুনেন বধে ভীষ্মস্য সংজয়
কিমকুর্বন্ত মে মন্দাঃ পুত্রা দুর্যোধনাদয়ঃ
162.2
হতমেব হি পশ্যামি গাঙ্গেয়ং পিতরং রণে
বাসুদেবসহায়েন পার্থেন দৃঢধন্বনা
162.3
স চাপরিমিতপ্রজ্ঞস্তচ্ছ্রুত্বা পার্থভাষিতম্
কিমুক্তবান্মহেষ্বাসো ভীষ্মঃ প্রহরতাং বরঃ
162.4
সেনাপত্যং চ সংপ্রাপ্য কৌরবাণাং ধুরংধরঃ
কিমচেষ্টত গাঙ্গেয়ো মহাবুদ্ধিপরাক্রমঃ
162.5
বৈশংপায়ন উবাচ
ততস্তত্সংজয়স্তস্মৈ সর্বমেব ন্যবেদয়ৎ
যথোক্তং কুরুবৃদ্ধেন ভীষ্মেণামিততেজসা
162.6
সংজয় উবাচ
সেনাপত্যমনুপ্রাপ্য ভীষ্মঃ শাংতনবো নৃপ
দুর্যোধনমুবাচেদং বচনং হর্ষয়ন্নিব
162.7
নমস্কৃত্বা কুমারায় সেনান্যে শক্তিপাণয়ে
অহং সেনাপতিস্তেঽদ্য ভবিষ্যামি ন সংশয়ঃ
162.8
সেনাকর্মণ্যভিজ্ঞোঽস্মি ব্যূহেষু বিবিধেষু চ
কর্ম কারয়িতুং চৈব ভৃতানপ্যভৃতাংস্তথা
162.9
যাত্রায়ানেষু যুদ্ধেষু লব্ধপ্রশমনেষু চ
ভৃশং বেদ মহারাজ যথা বেদ বৃহস্পতিঃ
162.10
ব্যূহানপি মহারম্ভান্দৈবগান্ধর্বমানুষান্
তৈরহং মোহয়িষ্যামি পাণ্ডবান্ব্যেতু তে জ্বরঃ
162.11
সোঽহং যোত্স্যামি তত্ত্বেন পালয়ংস্তব বাহিনীম্
যথাবচ্ছাস্ত্রতো রাজন্ব্যেতু তে মানসো জ্বরঃ
162.12
দুর্যোধন উবাচ
ন বিদ্যতে মে গাঙ্গেয় ভয়ং দেবাসুরেষ্বপি
সমস্তেষু মহাবাহো সত্যমেতদ্ব্রবীমি তে
162.13
কিং পুনস্ত্বয়ি দুর্ধর্ষে সেনাপত্যে ব্যবস্থিতে
দ্রোণে চ পুরুষব্যাঘ্রে স্থিতে যুদ্ধাভিনন্দিনি
162.14
ভবদ্ভ্যাং পুরুষাগ্র্যাভ্যাং স্থিতাভ্যাং বিজয়ো মম
ন দুর্লভং কুরুশ্রেষ্ঠ দেবরাজ্যমপি ধ্রুবম্
162.15
রথসংখ্যাং তু কার্ত্স্ন্যেন পরেষামাত্মনস্তথা
তথৈবাতিরথানাং চ বেত্তুমিচ্ছামি কৌরব
162.16
পিতামহো হি কুশলঃ পরেষামাত্মনস্তথা
শ্রোতুমিচ্ছাম্যহং সর্বৈঃ সহৈভির্বসুধাধিপৈঃ
162.17
ভীষ্ম উবাচ
গান্ধারে শৃণু রাজেন্দ্র রথসংখ্যাং স্বকে বলে
যে রথাঃ পৃথিবীপাল তথৈবাতিরথাশ্চ যে
162.18
বহূনীহ সহস্রাণি প্রয়ুতান্যর্বুদানি চ
রথানাং তব সেনায়াং যথামুখ্যং তু মে শৃণু
162.19
ভবানগ্রে রথোদারঃ সহ সর্বৈঃ সহোদরৈঃ
দুঃশাসনপ্রভৃতিভির্ভ্রাতৃভিঃ শতসংমিতৈঃ
162.20
সর্বে কৃতপ্রহরণাশ্ছেদ্যভেদ্যবিশারদাঃ
রথোপস্থে গজস্কন্ধে গদায়ুদ্ধেঽসিচর্মণি
162.21
সংয়ন্তারঃ প্রহর্তারঃ কৃতাস্ত্রা ভারসাধনাঃ
ইষ্বস্ত্রে দ্রোণশিষ্যাশ্চ কৃপস্য চ শরদ্বতঃ
162.22
এতে হনিষ্যন্তি রণে পাঞ্চালান্যুদ্ধদুর্মদান্
কৃতকিল্বিষাঃ পাণ্ডবেয়ৈর্ধার্তরাষ্ট্রা মনস্বিনঃ
162.23
ততোঽহং ভরতশ্রেষ্ঠ সর্বসেনাপতিস্তব
শত্রূন্বিধ্বংসয়িষ্যামি কদর্থীকৃত্য পাণ্ডবান্
ন ত্বাত্মনো গুণান্বক্তুমর্হামি বিদিতোঽস্মি তে
162.24
কৃতবর্মা ত্বতিরথো ভোজঃ প্রহরতাং বরঃ
অর্থসিদ্ধিং তব রণে করিষ্যতি ন সংশয়ঃ
162.25
অস্ত্রবিদ্ভিরনাধৃষ্যো দূরপাতী দৃঢায়ুধঃ
হনিষ্যতি রিপূংস্তুভ্যং মহেন্দ্রো দানবানিব
162.26
মদ্ররাজো মহেষ্বাসঃ শল্যো মেঽতিরথো মতঃ
স্পর্ধতে বাসুদেবেন যো বৈ নিত্যং রণে রণে
162.27
ভাগিনেয়ান্নিজাংস্ত্যক্ত্বা শল্যস্তে রথসত্তমঃ
এষ যোত্স্যতি সংগ্রামে কৃষ্ণং চক্রগদাধরম্
162.28
সাগরোর্মিসমৈর্বেগৈঃ প্লাবয়ন্নিব শাত্রবান্
ভূরিশ্রবাঃ কৃতাস্ত্রশ্চ তব চাপি হিতঃ সুহৃৎ
162.29
সৌমদত্তির্মহেষ্বাসো রথয়ূথপয়ূথপঃ
বলক্ষয়মমিত্রাণাং সুমহান্তং করিষ্যতি
162.30
সিন্ধুরাজো মহারাজ মতো মে দ্বিগুণো রথঃ
যোত্স্যতে সমরে রাজন্বিক্রান্তো রথসত্তমঃ
162.31
দ্রৌপদীহরণে পূর্বং পরিক্লিষ্টঃ স পাণ্ডবৈঃ
সংস্মরংস্তং পরিক্লেশং যোত্স্যতে পরবীরহা
162.32
এতেন হি তদা রাজংস্তপ আস্থায় দারুণম্
সুদুর্লভো বরো লব্ধঃ পাণ্ডবান্যোদ্ধুমাহবে
162.33
স এষ রথশার্দূলস্তদ্বৈরং সংস্মরন্রণে
যোত্স্যতে পাণ্ডবাংস্তাত প্রাণাংস্ত্যক্ত্বা সুদুস্ত্যজান্