অধ্যায় 163

163.1

ভীষ্ম উবাচ
সুদক্ষিণস্তু কাম্বোজো রথ একগুণো মতঃ
তবার্থসিদ্ধিমাকাঙ্ক্ষন্যোত্স্যতে সমরে পরৈঃ

এতস্য রথসিংহস্য তবার্থে রাজসত্তম
পরাক্রমং যথেন্দ্রস্য দ্রক্ষ্যন্তি কুরবো যুধি

এতস্য রথবংশো হি তিগ্মবেগপ্রহারিণাম্
কাম্বোজানাং মহারাজ শলভানামিবায়তিঃ

নীলো মাহিষ্মতীবাসী নীলবর্মধরস্তব
রথবংশেন শত্রূণাং কদনং বৈ করিষ্যতি

কৃতবৈরঃ পুরা চৈব সহদেবেন পার্থিবঃ
যোত্স্যতে সততং রাজংস্তবার্থে কুরুসত্তম

বিন্দানুবিন্দাবাবন্ত্যৌ সমেতৌ রথসত্তমৌ
কৃতিনৌ সমরে তাত দৃঢবীর্যপরাক্রমৌ

এতৌ তৌ পুরুষব্যাঘ্রৌ রিপুসৈন্যং প্রধক্ষ্যতঃ
গদাপ্রাসাসিনারাচৈস্তোমরৈশ্চ ভুজচ্যুতৈঃ

যুদ্ধাভিকামৌ সমরে ক্রীডন্তাবিব যূথপৌ
যূথমধ্যে মহারাজ বিচরন্তৌ কৃতান্তবৎ

ত্রিগর্তা ভ্রাতরঃ পঞ্চ রথোদারা মতা মম
কৃতবৈরাশ্চ পার্থেন বিরাটনগরে তদা

মকরা ইব রাজেন্দ্র সমুদ্ধততরঙ্গিণীম্
গঙ্গাং বিক্ষোভয়িষ্যন্তি পার্থানাং যুধি বাহিনীম্

তে রথাঃ পঞ্চ রাজেন্দ্র যেষাং সত্যরথো মুখম্
এতে যোত্স্যন্তি সমরে সংস্মরন্তঃ পুরা কৃতম্

ব্যলীকং পাণ্ডবেয়েন ভীমসেনানুজেন হ
দিশো বিজয়তা রাজঞ্শ্বেতবাহেন ভারত

তে হনিষ্যন্তি পার্থানাং সমাসাদ্য মহারথান্
বরান্বরান্মহেষ্বাসান্ক্ষত্রিয়াণাং ধুরংধরাঃ

লক্ষ্মণস্তব পুত্রস্তু তথা দুঃশাসনস্য চ
উভৌ তৌ পুরুষব্যাঘ্রৌ সংগ্রামেষ্বনিবর্তিনৌ

তরুণৌ সুকুমারৌ চ রাজপুত্রৌ তরস্বিনৌ
যুদ্ধানাং চ বিশেষজ্ঞৌ প্রণেতারৌ চ সর্বশঃ

রথৌ তৌ রথশার্দূল মতৌ মে রথসত্তমৌ
ক্ষত্রধর্মরতৌ বীরৌ মহত্কর্ম করিষ্যতঃ

দণ্ডধারো মহারাজ রথ একো নরর্ষভঃ
যোত্স্যতে সমরং প্রাপ্য স্বেন সৈন্যেন পালিতঃ

বৃহদ্বলস্তথা রাজা কৌসল্যো রথসত্তমঃ
রথো মম মতস্তাত দৃঢবেগপরাক্রমঃ

এষ যোত্স্যতি সংগ্রামে স্বাং চমূং সংপ্রহর্ষয়ন্
উগ্রায়ুধো মহেষ্বাসো ধার্তরাষ্ট্রহিতে রতঃ

কৃপঃ শারদ্বতো রাজন্রথয়ূথপয়ূথপঃ
প্রিয়ান্প্রাণান্পরিত্যজ্য প্রধক্ষ্যতি রিপূংস্তব

গৌতমস্য মহর্ষের্য আচার্যস্য শরদ্বতঃ
কার্ত্তিকেয় ইবাজেয়ঃ শরস্তম্বাত্সুতোঽভবৎ

এষ সেনাং বহুবিধাং বিবিধায়ুধকার্মুকাম্
অগ্নিবত্সমরে তাত চরিষ্যতি বিমর্দয়ন্