Utshovঅধ্যায় 164
164.1
ভীষ্ম উবাচ
শকুনির্মাতুলস্তেঽসৌ রথ একো নরাধিপ
প্রসজ্য পাণ্ডবৈর্বৈরং যোত্স্যতে নাত্র সংশয়ঃ
164.2
এতস্য সৈন্যা দুর্ধর্ষাঃ সমরেঽপ্রতিয়ায়িনঃ
বিকৃতায়ুধভূয়িষ্ঠা বায়ুবেগসমা জবে
164.3
দ্রোণপুত্রো মহেষ্বাসঃ সর্বেষামতি ধন্বিনাম্
সমরে চিত্রয়োধী চ দৃঢাস্ত্রশ্চ মহারথঃ
164.4
এতস্য হি মহারাজ যথা গাণ্ডীবধন্বনঃ
শরাসনাদ্বিনির্মুক্তাঃ সংসক্তা যান্তি সায়কাঃ
164.5
নৈষ শক্যো ময়া বীরঃ সংখ্যাতুং রথসত্তমঃ
নির্দহেদপি লোকাংস্ত্রীনিচ্ছন্নেষ মহায়শাঃ
164.6
ক্রোধস্তেজশ্চ তপসা সংভৃতোঽঽশ্রমবাসিনা
দ্রোণেনানুগৃহীতশ্চ দিব্যৈরস্ত্রৈরুদারধীঃ
164.7
দোষস্ত্বস্য মহানেকো যেনৈষ ভরতর্ষভ
ন মে রথো নাতিরথো মতঃ পার্থিবসত্তম
164.8
জীবিতং প্রিয়মত্যর্থমায়ুষ্কামঃ সদা দ্বিজঃ
ন হ্যস্য সদৃশঃ কশ্চিদুভয়োঃ সেনয়োরপি
164.9
হন্যাদেকরথেনৈব দেবানামপি বাহিনীম্
বপুষ্মাংস্তলঘোষেণ স্ফোটয়েদপি পর্বতান্
164.10
অসংখ্যেয়গুণো বীরঃ প্রহর্তা দারুণদ্যুতিঃ
দণ্ডপাণিরিবাসহ্যঃ কালবত্প্রচরিষ্যতি
164.11
যুগান্তাগ্নিসমঃ ক্রোধে সিংহগ্রীবো মহামতিঃ
এষ ভারত যুদ্ধস্য পৃষ্ঠং সংশময়িষ্যতি
164.12
পিতা ত্বস্য মহাতেজা বৃদ্ধোঽপি যুবভির্বরঃ
রণে কর্ম মহত্কর্তা তত্র মে নাস্তি সংশয়ঃ
164.13
অস্ত্রবেগানিলোদ্ধূতঃ সেনাকক্ষেন্ধনোত্থিতঃ
পাণ্ডুপুত্রস্য সৈন্যানি প্রধক্ষ্যতি জয়ে ধৃতঃ
164.14
রথয়ূথপয়ূথানাং যূথপঃ স নরর্ষভঃ
ভারদ্বাজাত্মজঃ কর্তা কর্ম তীব্রং হিতায় বঃ
164.15
সর্বমূর্ধাভিষিক্তানামাচার্যঃ স্থবিরো গুরুঃ
গচ্ছেদন্তং সৃঞ্জয়ানাং প্রিয়স্ত্বস্য ধনংজয়ঃ
164.16
নৈষ জাতু মহেষ্বাসঃ পার্থমক্লিষ্টকারিণম্
হন্যাদাচার্যকং দীপ্তং সংস্মৃত্য গুণনির্জিতম্
164.17
শ্লাঘত্যেষ সদা বীরঃ পার্থস্য গুণবিস্তরৈঃ
পুত্রাদভ্যধিকং চৈব ভারদ্বাজোঽনুপশ্যতি
164.18
হন্যাদেকরথেনৈব দেবগন্ধর্বদানবান্
একীভূতানপি রণে দিব্যৈরস্ত্রৈঃ প্রতাপবান্
164.19
পৌরবো রাজশার্দূলস্তব রাজন্মহারথঃ
মতো মম রথো বীর পরবীররথারুজঃ
164.20
স্বেন সৈন্যেন সহিতঃ প্রতপঞ্শত্রুবাহিনীম্
প্রধক্ষ্যতি স পাঞ্চালান্কক্ষং কৃষ্ণগতির্যথা
164.21
সত্যব্রতো রথবরো রাজপুত্রো মহারথঃ
তব রাজন্রিপুবলে কালবত্প্রচরিষ্যতি
164.22
এতস্য যোধা রাজেন্দ্র বিচিত্রকবচায়ুধাঃ
বিচরিষ্যন্তি সংগ্রামে নিঘ্নন্তঃ শাত্রবাংস্তব
164.23
বৃষসেনো রথাগ্র্যস্তে কর্ণপুত্রো মহারথঃ
প্রধক্ষ্যতি রিপূণাং তে বলানি বলিনাং বরঃ
164.24
জলসংধো মহাতেজা রাজন্রথবরস্তব
ত্যক্ষ্যতে সমরে প্রাণান্মাগধঃ পরবীরহা
164.25
এষ যোত্স্যতি সংগ্রামে গজস্কন্ধবিশারদঃ
রথেন বা মহাবাহুঃ ক্ষপয়ঞ্শত্রুবাহিনীম্
164.26
রথ এষ মহারাজ মতো মম নরর্ষভঃ
ত্বদর্থে ত্যক্ষ্যতি প্রাণান্সহ সৈন্যো মহারণে
164.27
এষ বিক্রান্তয়োধী চ চিত্রয়োধী চ সংগরে
বীতভীশ্চাপি তে রাজঞ্শাত্রবৈঃ সহ যোত্স্যতে
164.28
বাহ্লীকোঽতিরথশ্চৈব সমরে চানিবর্তিতা
মম রাজন্মতো যুদ্ধে শূরো বৈবস্বতোপমঃ
164.29
ন হ্যেষ সমরং প্রাপ্য নিবর্তেত কথংচন
যথা সততগো রাজন্নাভিহত্য পরান্রণে
164.30
সেনাপতির্মহারাজ সত্যবাংস্তে মহারথঃ
রণেষ্বদ্ভুতকর্মা চ রথঃ পররথারুজঃ
164.31
এতস্য সমরং দৃষ্ট্বা ন ব্যথাস্তি কথংচন
উত্স্ময়ন্নভ্যুপৈত্যেষ পরান্রথপথে স্থিতান্
164.32
এষ চারিষু বিক্রান্তঃ কর্ম সত্পুরুষোচিতম্
কর্তা বিমর্দে সুমহত্ত্বদর্থে পুরুষোত্তমঃ
164.33
অলায়ুধো রাক্ষসেন্দ্রঃ ক্রূরকর্মা মহাবলঃ
হনিষ্যতি পরান্রাজন্পূর্ববৈরমনুস্মরন্
164.34
এষ রাক্ষসসৈন্যানাং সর্বেষাং রথসত্তমঃ
মায়াবী দৃঢবৈরশ্চ সমরে বিচরিষ্যতি
164.35
প্রাগ্জ্যোতিষাধিপো বীরো ভগদত্তঃ প্রতাপবান্
গজাঙ্কুশধরশ্রেষ্ঠো রথে চৈব বিশারদঃ
164.36
এতেন যুদ্ধমভবত্পুরা গাণ্ডীবধন্বনঃ
দিবসান্সুবহূন্রাজন্নুভয়োর্জয়গৃদ্ধিনোঃ
164.37
ততঃ সখায়ং গান্ধারে মানয়ন্পাকশাসনম্
অকরোত্সংবিদং তেন পাণ্ডবেন মহাত্মনা
164.38
এষ যোত্স্যতি সংগ্রামে গজস্কন্ধবিশারদঃ
ঐরাবতগতো রাজা দেবানামিব বাসবঃ