Utshovঅধ্যায় 165
165.1
ভীষ্ম উবাচ
অচলো বৃষকশ্চৈব ভ্রাতরৌ সহিতাবুভৌ
রথৌ তব দুরাধর্ষৌ শত্রূন্বিধ্বংসয়িষ্যতঃ
165.2
বলবন্তৌ নরব্যাঘ্রৌ দৃঢক্রোধৌ প্রহারিণৌ
গান্ধারমুখ্যৌ তরুণৌ দর্শনীয়ৌ মহাবলৌ
165.3
সখা তে দয়িতো নিত্যং য এষ রণকর্কশঃ
প্রোত্সাহয়তি রাজংস্ত্বাং বিগ্রহে পাণ্ডবৈঃ সহ
165.4
পরুষঃ কত্থনো নীচঃ কর্ণো বৈকর্তনস্তব
মন্ত্রী নেতা চ বন্ধুশ্চ মানী চাত্যন্তমুচ্ছ্রিতঃ
165.5
এষ নৈব রথঃ পূর্ণো নাপ্যেবাতিরথো নৃপ
বিয়ুক্তঃ কবচেনৈষ সহজেন বিচেতনঃ
কুণ্ডলাভ্যাং চ দিব্যাভ্যাং বিয়ুক্তঃ সততং ঘৃণী
165.6
অভিশাপাচ্চ রামস্য ব্রাহ্মণস্য চ ভাষণাৎ
করণানাং বিয়োগাচ্চ তেন মেঽর্ধরথো মতঃ
নৈষ ফল্গুনমাসাদ্য পুনর্জীবন্বিমোক্ষ্যতে
165.7
সংজয় উবাচ
ততোঽব্রবীন্মহাবাহুর্দ্রোণঃ শস্ত্রভৃতাং বরঃ
এবমেতদ্যথাত্থ ত্বং ন মিথ্যাস্তীতি কিংচন
165.8
রণে রণেঽতিমানী চ বিমুখশ্চৈব দৃশ্যতে
ঘৃণী কর্ণঃ প্রমাদী চ তেন মেঽর্ধরথো মতঃ
165.9
এতচ্ছ্রুত্বা তু রাধেয়ঃ ক্রোধাদুত্ফুল্ললোচনঃ
উবাচ ভীষ্মং রাজেন্দ্র তুদন্বাগ্ভিঃ প্রতোদবৎ
165.10
পিতামহ যথেষ্টং মাং বাক্শরৈরুপকৃন্তসি
অনাগসং সদা দ্বেষাদেবমেব পদে পদে
মর্ষয়ামি চ তত্সর্বং দুর্যোধনকৃতেন বৈ
165.11
ত্বং তু মাং মন্যসেঽশক্তং যথা কাপুরুষং তথা
ভবানর্ধরথো মহ্যং মতো নাস্ত্যত্র সংশয়ঃ
165.12
সর্বস্য জগতশ্চৈব গাঙ্গেয় ন মৃষা বদে
কুরূণামহিতো নিত্যং ন চ রাজাববুধ্যতে
165.13
কো হি নাম সমানেষু রাজসূদাত্তকর্মসু
তেজোবধমিমং কুর্যাদ্বিভেদয়িষুরাহবে
যথা ত্বং গুণনির্দেশাদপরাধং চিকীর্ষসি
165.14
ন হায়নৈর্ন পলিতৈর্ন বিত্তৈর্ন চ বন্ধুভিঃ
মহারথত্বং সংখ্যাতুং শক্যং ক্ষত্রস্য কৌরব
165.15
বলজ্যেষ্ঠং স্মৃতং ক্ষত্রং মন্ত্রজ্যেষ্ঠা দ্বিজাতয়ঃ
ধনজ্যেষ্ঠাঃ স্মৃতা বৈশ্যাঃ শূদ্রাস্তু বয়সাধিকাঃ
165.16
যথেচ্ছকং স্বয়ংগ্রাহাদ্রথানতিরথাংস্তথা
কামদ্বেষসমায়ুক্তো মোহাত্প্রকুরুতে ভবান্
165.17
দুর্যোধন মহাবাহো সাধু সম্যগবেক্ষ্যতাম্
ত্যজ্যতাং দুষ্টভাবোঽয়ং ভীষ্মঃ কিল্বিষকৃত্তব
165.18
ভিন্না হি সেনা নৃপতে দুঃসংধেয়া ভবত্যুত
মৌলাপি পুরুষব্যাঘ্র কিমু নানা সমুত্থিতা
165.19
এষাং দ্বৈধং সমুত্পন্নং যোধানাং যুধি ভারত
তেজোবধো নঃ ক্রিয়তে প্রত্যক্ষেণ বিশেষতঃ
165.20
রথানাং ক্ব চ বিজ্ঞানং ক্ব চ ভীষ্মোঽল্পচেতনঃ
অহমাবারয়িষ্যামি পাণ্ডবানামনীকিনীম্
165.21
আসাদ্য মামমোঘেষুং গমিষ্যন্তি দিশো দশ
পাণ্ডবাঃ সহপঞ্চালাঃ শার্দূলং বৃষভা ইব
165.22
ক্ব চ যুদ্ধবিমর্দো বা মন্ত্রাঃ সুব্যাহৃতানি বা
ক্ব চ ভীষ্মো গতবয়া মন্দাত্মা কালমোহিতঃ
165.23
স্পর্ধতে হি সদা নিত্যং সর্বেণ জগতা সহ
ন চান্যং পুরুষং কংচিন্মন্যতে মোঘদর্শনঃ
165.24
শ্রোতব্যং খলু বৃদ্ধানামিতি শাস্ত্রনিদর্শনম্
ন ত্বেবাপ্যতিবৃদ্ধানাং পুনর্বালা হি তে মতাঃ
165.25
অহমেকো হনিষ্যামি পাণ্ডবান্নাত্র সংশয়ঃ
সুয়ুদ্ধে রাজশার্দূল যশো ভীষ্মং গমিষ্যতি
165.26
কৃতঃ সেনাপতিস্ত্বেষ ত্বয়া ভীষ্মো নরাধিপ
সেনাপতিং গুণো গন্তা ন তু যোধান্কথংচন
165.27
নাহং জীবতি গাঙ্গেয়ে যোত্স্যে রাজন্কথংচন
হতে তু ভীষ্মে যোধাস্মি সর্বৈরেব মহারথৈঃ