Utshovঅধ্যায় 166
166.1
ভীষ্ম উবাচ
সমুদ্যতোঽয়ং ভারো মে সুমহান্সাগরোপমঃ
ধার্তরাষ্ট্রস্য সংগ্রামে বর্ষপূগাভিচিন্তিতঃ
166.2
তস্মিন্নভ্যাগতে কালে প্রতপ্তে লোমহর্ষণে
মিথোভেদো ন মে কার্যস্তেন জীবসি সূতজ
166.3
ন হ্যহং নাদ্য বিক্রম্য স্থবিরোঽপি শিশোস্তব
যুদ্ধশ্রদ্ধাং রণে ছিন্দ্যাং জীবিতস্য চ সূতজ
166.4
জামদগ্ন্যেন রামেণ মহাস্ত্রাণি প্রমুঞ্চতা
ন মে ব্যথাভবত্কাচিত্ত্বং তু মে কিং করিষ্যসি
166.5
কামং নৈতত্প্রশংসন্তি সন্তোঽঽত্মবলসংস্তবম্
বক্ষ্যামি তু ত্বাং সংতপ্তো নিহীন কুলপাংসন
166.6
সমেতং পার্থিবং ক্ষত্রং কাশিরাজ্ঞঃ স্বয়ংবরে
নির্জিত্যৈকরথেনৈব যত্কন্যাস্তরসা হৃতাঃ
166.7
ঈদৃশানাং সহস্রাণি বিশিষ্টানামথো পুনঃ
ময়ৈকেন নিরস্তানি সসৈন্যানি রণাজিরে
166.8
ত্বাং প্রাপ্য বৈরপুরুষং কুরূণামনয়ো মহান্
উপস্থিতো বিনাশায় যতস্ব পুরুষো ভব
166.9
যুধ্যস্ব পার্থং সমরে যেন বিস্পর্ধসে সহ
দ্রক্ষ্যামি ত্বাং বিনির্মুক্তমস্মাদ্যুদ্ধাত্সুদুর্মতে
166.10
সংজয় উবাচ
তমুবাচ ততো রাজা ধার্তরাষ্ট্রো মহামনাঃ
মামবেক্ষস্ব গাঙ্গেয় কার্যং হি মহদুদ্যতম্
166.11
চিন্ত্যতামিদমেবাগ্রে মম নিঃশ্রেয়সং পরম্
উভাবপি ভবন্তৌ মে মহত্কর্ম করিষ্যতঃ
166.12
ভূয়শ্চ শ্রোতুমিচ্ছামি পরেষাং রথসত্তমান্
যে চৈবাতিরথাস্তত্র তথৈব রথয়ূথপাঃ
166.13
বলাবলমমিত্রাণাং শ্রোতুমিচ্ছামি কৌরব
প্রভাতায়াং রজন্যাং বৈ ইদং যুদ্ধং ভবিষ্যতি
166.14
ভীষ্ম উবাচ
এতে রথাস্তে সংখ্যাতাস্তথৈবাতিরথা নৃপ
যে চাপ্যর্ধরথা রাজন্পাণ্ডবানামতঃ শৃণু
166.15
যদি কৌতূহলং তেঽদ্য পাণ্ডবানাং বলে নৃপ
রথসংখ্যাং মহাবাহো সহৈভির্বসুধাধিপৈঃ
166.16
স্বয়ং রাজা রথোদারঃ পাণ্ডবঃ কুন্তিনন্দনঃ
অগ্নিবত্সমরে তাত চরিষ্যতি ন সংশয়ঃ
166.17
ভীমসেনস্তু রাজেন্দ্র রথোঽষ্টগুণসংমিতঃ
নাগায়ুতবলো মানী তেজসা ন স মানুষঃ
166.18
মাদ্রীপুত্রৌ তু রথিনৌ দ্বাবেব পুরুষর্ষভৌ
অশ্বিনাবিব রূপেণ তেজসা চ সমন্বিতৌ
166.19
এতে চমূমুখগতাঃ স্মরন্তঃ ক্লেশমাত্মনঃ
রুদ্রবত্প্রচরিষ্যন্তি তত্র মে নাস্তি সংশয়ঃ
166.20
সর্ব এব মহাত্মানঃ শালস্কন্ধা ইবোদ্গতাঃ
প্রাদেশেনাধিকাঃ পুম্ভিরন্যৈস্তে চ প্রমাণতঃ
166.21
সিংহসংহননাঃ সর্বে পাণ্ডুপুত্রা মহাবলাঃ
চরিতব্রহ্মচর্যাশ্চ সর্বে চাতিতপস্বিনঃ
166.22
হ্রীমন্তঃ পুরুষব্যাঘ্রা ব্যাঘ্রা ইব বলোত্কটাঃ
জবে প্রহারে সংমর্দে সর্ব এবাতিমানুষাঃ
সর্বে জিতমহীপালা দিগ্জয়ে ভরতর্ষভ
166.23
ন চৈষাং পুরুষাঃ কেচিদায়ুধানি গদাঃ শরান্
বিষহন্তি সদা কর্তুমধিজ্যান্যপি কৌরব
উদ্যন্তুং বা গদাং গুর্বীং শরান্বাপি প্রকর্ষিতুম্
166.24
জবে লক্ষ্যস্য হরণে ভোজ্যে পাংসুবিকর্ষণে
বালৈরপি ভবন্তস্তৈঃ সর্ব এব বিশেষিতাঃ
166.25
তে তে সৈন্যং সমাসাদ্য ব্যাঘ্রা ইব বলোত্কটাঃ
বিধ্বংসয়িষ্যন্তি রণে মা স্ম তৈঃ সহ সংগমঃ
166.26
একৈকশস্তে সংগ্রামে হন্যুঃ সর্বান্মহীক্ষিতঃ
প্রত্যক্ষং তব রাজেন্দ্র রাজসূয়ে যথাভবৎ
166.27
দ্রৌপদ্যাশ্চ পরিক্লেশং দ্যূতে চ পরুষা গিরঃ
তে সংস্মরন্তঃ সংগ্রামে বিচরিষ্যন্তি কালবৎ
166.28
লোহিতাক্ষো গুডাকেশো নারায়ণসহায়বান্
উভয়োঃ সেনয়োর্বীর রথো নাস্তীহ তাদৃশঃ
166.29
ন হি দেবেষু বা পূর্বং দানবেষূরগেষু বা
রাক্ষসেষ্বথ যক্ষেষু নরেষু কুত এব তু
166.30
ভূতোঽথ বা ভবিষ্যো বা রথঃ কশ্চিন্ময়া শ্রুতঃ
সমায়ুক্তো মহারাজ যথা পার্থস্য ধীমতঃ
166.31
বাসুদেবশ্চ সংয়ন্তা যোদ্ধা চৈব ধনংজয়ঃ
গাণ্ডীবং চ ধনুর্দিব্যং তে চাশ্বা বাতরংহসঃ
166.32
অভেদ্যং কবচং দিব্যমক্ষয্যৌ চ মহেষুধী
অস্ত্রগ্রামশ্চ মাহেন্দ্রো রৌদ্রঃ কৌবের এব চ
166.33
যাম্যশ্চ বারুণশ্চৈব গদাশ্চোগ্রপ্রদর্শনাঃ
বজ্রাদীনি চ মুখ্যানি নানাপ্রহরণানি বৈ
166.34
দানবানাং সহস্রাণি হিরণ্যপুরবাসিনাম্
হতান্যেকরথেনাজৌ কস্তস্য সদৃশো রথঃ
166.35
এষ হন্যাদ্ধি সংরম্ভী বলবান্সত্যবিক্রমঃ
তব সেনাং মহাবাহুঃ স্বাং চৈব পরিপালয়ন্
166.36
অহং চৈনং প্রত্যুদিয়ামাচার্যো বা ধনংজয়ম্
ন তৃতীয়োঽস্তি রাজেন্দ্র সেনয়োরুভয়োরপি
য এনং শরবর্ষাণি বর্ষন্তমুদিয়াদ্রথী
166.37
জীমূত ইব ঘর্মান্তে মহাবাতসমীরিতঃ
সমায়ুক্তস্তু কৌন্তেয়ো বাসুদেবসহায়বান্
তরুণশ্চ কৃতী চৈব জীর্ণাবাবামুভাবপি
166.38
সংজয় উবাচ
এতচ্ছ্রুত্বা তু ভীষ্মস্য রাজ্ঞাং দধ্বংসিরে তদা
কাঞ্চনাঙ্গদিনঃ পীনা ভুজাশ্চন্দনরূষিতাঃ
166.39
মনোভিঃ সহ সাবেগৈঃ সংস্মৃত্য চ পুরাতনম্
সামর্থ্যং পাণ্ডবেয়ানাং যথাপ্রত্যক্ষদর্শনাৎ