অধ্যায় 167

167.1

ভীষ্ম উবাচ
দ্রৌপদেয়া মহারাজ সর্বে পঞ্চ মহারথাঃ
বৈরাটিরুত্তরশ্চৈব রথো মম মহান্মতঃ

অভিমন্যুর্মহারাজ রথয়ূথপয়ূথপঃ
সমঃ পার্থেন সমরে বাসুদেবেন বা ভবেৎ

লঘ্বস্ত্রশ্চিত্রয়োধী চ মনস্বী দৃঢবিক্রমঃ
সংস্মরন্বৈ পরিক্লেশং স্বপিতুর্বিক্রমিষ্যতি

সাত্যকির্মাধবঃ শূরো রথয়ূথপয়ূথপঃ
এষ বৃষ্ণিপ্রবীরাণামমর্ষী জিতসাধ্বসঃ

উত্তমৌজাস্তথা রাজন্রথো মম মহান্মতঃ
যুধামন্যুশ্চ বিক্রান্তো রথোদারো নরর্ষভঃ

এতেষাং বহুসাহস্রা রথা নাগা হয়াস্তথা
যোত্স্যন্তে তে তনুং ত্যক্ত্বা কুন্তীপুত্রপ্রিয়েপ্সয়া

পাণ্ডবৈঃ সহ রাজেন্দ্র তব সেনাসু ভারত
অগ্নিমারুতবদ্রাজন্নাহ্বয়ন্তঃ পরস্পরম্

অজেয়ৌ সমরে বৃদ্ধৌ বিরাটদ্রুপদাবুভৌ
মহারথৌ মহাবীর্যৌ মতৌ মে পুরুষর্ষভৌ

বয়োবৃদ্ধাবপি তু তৌ ক্ষত্রধর্মপরায়ণৌ
যতিষ্যেতে পরং শক্ত্যা স্থিতৌ বীরগতে পথি

সংবন্ধকেন রাজেন্দ্র তৌ তু বীর্যবলান্বয়াৎ
আর্যবৃত্তৌ মহেষ্বাসৌ স্নেহপাশসিতাবুভৌ

কারণং প্রাপ্য তু নরাঃ সর্ব এব মহাভুজাঃ
শূরা বা কাতরা বাপি ভবন্তি নরপুংগব

একায়নগতাবেতৌ পার্থেন দৃঢভক্তিকৌ
ত্যক্ত্বা প্রাণান্পরং শক্ত্যা ঘটিতারৌ নরাধিপ

পৃথগক্ষৌহিণীভ্যাং তাবুভৌ সংয়তি দারুণৌ
সংবন্ধিভাবং রক্ষন্তৌ মহত্কর্ম করিষ্যতঃ

লোকবীরৌ মহেষ্বাসৌ ত্যক্তাত্মানৌ চ ভারত
প্রত্যয়ং পরিরক্ষন্তৌ মহত্কর্ম করিষ্যতঃ