Utshovঅধ্যায় 168
168.1
ভীষ্ম উবাচ
পাঞ্চালরাজস্য সুতো রাজন্পরপুরংজয়ঃ
শিখণ্ডী রথমুখ্যো মে মতঃ পার্থস্য ভারত
168.2
এষ যোত্স্যতি সংগ্রামে নাশয়ন্পূর্বসংস্থিতিম্
পরং যশো বিপ্রথয়ংস্তব সেনাসু ভারত
168.3
এতস্য বহুলাঃ সেনাঃ পাঞ্চালাশ্চ প্রভদ্রকাঃ
তেনাসৌ রথবংশেন মহত্কর্ম করিষ্যতি
168.4
ধৃষ্টদ্যুম্নশ্চ সেনানীঃ সর্বসেনাসু ভারত
মতো মেঽতিরথো রাজন্দ্রোণশিষ্যো মহারথঃ
168.5
এষ যোত্স্যতি সংগ্রামে সূদয়ন্বৈ পরান্রণে
ভগবানিব সংক্রুদ্ধঃ পিনাকী যুগসংক্ষয়ে
168.6
এতস্য তদ্রথানীকং কথয়ন্তি রণপ্রিয়াঃ
বহুত্বাত্সাগরপ্রখ্যং দেবানামিব সংয়ুগে
168.7
ক্ষত্রধর্মা তু রাজেন্দ্র মতো মেঽর্ধরথো নৃপ
ধৃষ্টদ্যুম্নস্য তনয়ো বাল্যান্নাতিকৃতশ্রমঃ
168.8
শিশুপালসুতো বীরশ্চেদিরাজো মহারথঃ
ধৃষ্টকেতুর্মহেষ্বাসঃ সংবন্ধী পাণ্ডবস্য হ
168.9
এষ চেদিপতিঃ শূরঃ সহ পুত্রেণ ভারত
মহারথেনাসুকরং মহত্কর্ম করিষ্যতি
168.10
ক্ষত্রধর্মরতো মহ্যং মতঃ পরপুরংজয়ঃ
ক্ষত্রদেবস্তু রাজেন্দ্র পাণ্ডবেষু রথোত্তমঃ
জয়ন্তশ্চামিতৌজাশ্চ সত্যজিচ্চ মহারথঃ
168.11
মহারথা মহাত্মানঃ সর্বে পাঞ্চালসত্তমাঃ
যোত্স্যন্তে সমরে তাত সংরব্ধা ইব কুঞ্জরাঃ
168.12
অজো ভোজশ্চ বিক্রান্তৌ পাণ্ডবেষু মহারথৌ
পাণ্ডবানাং সহায়ার্থে পরং শক্ত্যা যতিষ্যতঃ
শীঘ্রাস্ত্রৌ চিত্রয়োদ্ধারৌ কৃতিনৌ দৃঢবিক্রমৌ
168.13
কেকয়াঃ পঞ্চ রাজেন্দ্র ভ্রাতরো যুদ্ধদুর্মদাঃ
সর্ব এতে রথোদারাঃ সর্বে লোহিতকধ্বজাঃ
168.14
কাশিকঃ সুকুমারশ্চ নীলো যশ্চাপরো নৃপঃ
সূর্যদত্তশ্চ শঙ্খশ্চ মদিরাশ্বশ্চ নামতঃ
168.15
সর্ব এতে রথোদারাঃ সর্বে চাহবলক্ষণাঃ
সর্বাস্ত্রবিদুষঃ সর্বে মহাত্মানো মতা মম
168.16
বার্ধক্ষেমির্মহারাজ রথো মম মহান্মতঃ
চিত্রায়ুধশ্চ নৃপতির্মতো মে রথসত্তমঃ
স হি সংগ্রামশোভী চ ভক্তশ্চাপি কিরীটিনঃ
168.17
চেকিতানঃ সত্যধৃতিঃ পাণ্ডবানাং মহারথৌ
দ্বাবিমৌ পুরুষব্যাঘ্রৌ রথোদারৌ মতৌ মম
168.18
ব্যাঘ্রদত্তশ্চ রাজেন্দ্র চন্দ্রসেনশ্চ ভারত
মতৌ মম রথোদারৌ পাণ্ডবানাং ন সংশয়ঃ
168.19
সেনাবিন্দুশ্চ রাজেন্দ্র ক্রোধহন্তা চ নামতঃ
যঃ সমো বাসুদেবেন ভীমসেনেন চাভিভূঃ
স যোত্স্যতীহ বিক্রম্য সমরে তব সৈনিকৈঃ
168.20
মাং দ্রোণং চ কৃপং চৈব যথা সংমন্যতে ভবান্
তথা স সমরশ্লাঘী মন্তব্যো রথসত্তমঃ
168.21
কাশ্যঃ পরমশীঘ্রাস্ত্রঃ শ্লাঘনীয়ো রথোত্তমঃ
রথ একগুণো মহ্যং মতঃ পরপুরংজয়ঃ
168.22
অয়ং চ যুধি বিক্রান্তো মন্তব্যোঽষ্টগুণো রথঃ
সত্যজিত্সমরশ্লাঘী দ্রুপদস্যাত্মজো যুবা
168.23
গতঃ সোঽতিরথত্বং হি ধৃষ্টদ্যুম্নেন সংমিতঃ
পাণ্ডবানাং যশস্কামঃ পরং কর্ম করিষ্যতি
168.24
অনুরক্তশ্চ শূরশ্চ রথোঽয়মপরো মহান্
পাণ্ড্যরাজো মহাবীর্যঃ পাণ্ডবানাং ধুরংধরঃ
168.25
দৃঢধন্বা মহেষ্বাসঃ পাণ্ডবানাং রথোত্তমঃ
শ্রেণিমান্কৌরবশ্রেষ্ঠ বসুদানশ্চ পার্থিবঃ
উভাবেতাবতিরথৌ মতৌ মম পরংতপ