অধ্যায় 169

169.1

ভীষ্ম উবাচ
রোচমানো মহারাজ পাণ্ডবানাং মহারথঃ
যোত্স্যতেঽমরবত্সংখ্যে পরসৈন্যেষু ভারত

পুরুজিত্কুন্তিভোজশ্চ মহেষ্বাসো মহাবলঃ
মাতুলো ভীমসেনস্য স চ মেঽতিরথো মতঃ

এষ বীরো মহেষ্বাসঃ কৃতী চ নিপুণশ্চ হ
চিত্রয়োধী চ শক্তশ্চ মতো মে রথপুংগবঃ

স যোত্স্যতি হি বিক্রম্য মঘবানিব দানবৈঃ
যোধাশ্চাস্য পরিখ্যাতাঃ সর্বে যুদ্ধবিশারদাঃ

ভাগিনেয়কৃতে বীরঃ স করিষ্যতি সংগরে
সুমহত্কর্ম পাণ্ডূনাং স্থিতঃ প্রিয়হিতে নৃপঃ

ভৈমসেনির্মহারাজ হৈডিম্বো রাক্ষসেশ্বরঃ
মতো মে বহুমায়াবী রথয়ূথপয়ূথপঃ

যোত্স্যতে সমরে তাত মায়াভিঃ সমরপ্রিয়ঃ
যে চাস্য রাক্ষসাঃ শূরাঃ সচিবা বশবর্তিনঃ

এতে চান্যে চ বহবো নানাজনপদেশ্বরাঃ
সমেতাঃ পাণ্ডবস্যার্থে বাসুদেবপুরোগমাঃ

এতে প্রাধান্যতো রাজন্পাণ্ডবস্য মহাত্মনঃ
রথাশ্চাতিরথাশ্চৈব যে চাপ্যর্ধরথা মতাঃ

নেষ্যন্তি সমরে সেনাং ভীমাং যৌধিষ্ঠিরীং নৃপ
মহেন্দ্রেণেব বীরেণ পাল্যমানাং কিরীটিনা

তৈরহং সমরে বীর ত্বামায়দ্ভির্জয়ৈষিভিঃ
যোত্স্যামি জয়মাকাঙ্ক্ষন্নথ বা নিধনং রণে

পার্থং চ বাসুদেবং চ চক্রগাণ্ডীবধারিণৌ
সংধ্যাগতাবিবার্কেন্দূ সমেষ্যে পুরুষোত্তমৌ

যে চৈব তে রথোদারাঃ পাণ্ডুপুত্রস্য সৈনিকাঃ
সহসৈন্যানহং তাংশ্চ প্রতীয়াং রণমূর্ধনি

এতে রথাশ্চাতিরথাশ্চ তুভ্যং; যথাপ্রধানং নৃপ কীর্তিতা ময়া
তথা রাজন্নর্ধরথাশ্চ কেচি;ত্তথৈব তেষামপি কৌরবেন্দ্র

অর্জুনং বাসুদেবং চ যে চান্যে তত্র পার্থিবাঃ
সর্বানাবারয়িষ্যামি যাবদ্দ্রক্ষ্যামি ভারত

পাঞ্চাল্যং তু মহাবাহো নাহং হন্যাং শিখণ্ডিনম্
উদ্যতেষুমভিপ্রেক্ষ্য প্রতিয়ুধ্যন্তমাহবে

লোকস্তদ্বেদ যদহং পিতুঃ প্রিয়চিকীর্ষয়া
প্রাপ্তং রাজ্যং পরিত্যজ্য ব্রহ্মচর্যে ধৃতব্রতঃ

চিত্রাঙ্গদং কৌরবাণামহং রাজ্যেঽভ্যষেচয়ম্
বিচিত্রবীর্যং চ শিশুং যৌবরাজ্যেঽভ্যষেচয়ম্

দেবব্রতত্বং বিখ্যাপ্য পৃথিব্যাং সর্বরাজসু
নৈব হন্যাং স্ত্রিয়ং জাতু ন স্ত্রীপূর্বং কথংচন

স হি স্ত্রীপূর্বকো রাজঞ্শিখণ্ডী যদি তে শ্রুতঃ
কন্যা ভূত্বা পুমাঞ্জাতো ন যোত্স্যে তেন ভারত

সর্বাংস্ত্বন্যান্হনিষ্যামি পার্থিবান্ভরতর্ষভ
যান্সমেষ্যামি সমরে ন তু কুন্তীসুতান্নৃপ