অধ্যায় 170

170.1

দুর্যোধন উবাচ
কিমর্থং ভরতশ্রেষ্ঠ ন হন্যাস্ত্বং শিখণ্ডিনম্
উদ্যতেষুমথো দৃষ্ট্বা সমরেষ্বাততায়িনম্

পূর্বমুক্ত্বা মহাবাহো পাণ্ডবান্সহ সোমকৈঃ
বধিষ্যামীতি গাঙ্গেয় তন্মে ব্রূহি পিতামহ

ভীষ্ম উবাচ
শৃণু দুর্যোধন কথাং সহৈভির্বসুধাধিপৈঃ
যদর্থং যুধি সংপ্রেক্ষ্য নাহং হন্যাং শিখণ্ডিনম্

মহারাজো মম পিতা শংতনুর্ভরতর্ষভঃ
দিষ্টান্তং প্রাপ ধর্মাত্মা সময়ে পুরুষর্ষভ

ততোঽহং ভরতশ্রেষ্ঠ প্রতিজ্ঞাং পরিপালয়ন্
চিত্রাঙ্গদং ভ্রাতরং বৈ মহারাজ্যেঽভ্যষেচয়ম্

তস্মিংশ্চ নিধনং প্রাপ্তে সত্যবত্যা মতে স্থিতঃ
বিচিত্রবীর্যং রাজানমভ্যষিঞ্চং যথাবিধি

ময়াভিষিক্তো রাজেন্দ্র যবীয়ানপি ধর্মতঃ
বিচিত্রবীর্যো ধর্মাত্মা মামেব সমুদৈক্ষত

তস্য দারক্রিয়াং তাত চিকীর্ষুরহমপ্যুত
অনুরূপাদিব কুলাদিতি চিন্ত্য মনো দধে

তথাশ্রৌষং মহাবাহো তিস্রঃ কন্যাঃ স্বয়ংবরে
রূপেণাপ্রতিমাঃ সর্বাঃ কাশিরাজসুতাস্তদা
অম্বা চৈবাম্বিকা চৈব তথৈবাম্বালিকাপরা

রাজানশ্চ সমাহূতাঃ পৃথিব্যাং ভরতর্ষভ
অম্বা জ্যেষ্ঠাভবত্তাসামম্বিকা ত্বথ মধ্যমা
অম্বালিকা চ রাজেন্দ্র রাজকন্যা যবীয়সী

সোঽহমেকরথেনৈব গতঃ কাশিপতেঃ পুরীম্
অপশ্যং তা মহাবাহো তিস্রঃ কন্যাঃ স্বলংকৃতাঃ
রাজ্ঞশ্চৈব সমাবৃত্তান্পার্থিবান্পৃথিবীপতে

ততোঽহং তান্নৃপান্সর্বানাহূয় সমরে স্থিতান্
রথমারোপয়াং চক্রে কন্যাস্তা ভরতর্ষভ

বীর্যশুল্কাশ্চ তা জ্ঞাত্বা সমারোপ্য রথং তদা
অবোচং পার্থিবান্সর্বানহং তত্র সমাগতান্
ভীষ্মঃ শাংতনবঃ কন্যা হরতীতি পুনঃ পুনঃ

তে যতধ্বং পরং শক্ত্যা সর্বে মোক্ষায় পার্থিবাঃ
প্রসহ্য হি নয়াম্যেষ মিষতাং বো নরাধিপাঃ

ততস্তে পৃথিবীপালাঃ সমুত্পেতুরুদায়ুধাঃ
যোগো যোগ ইতি ক্রুদ্ধাঃ সারথীংশ্চাপ্যচোদয়ন্

তে রথৈর্মেঘসংকাশৈর্গজৈশ্চ গজয়োধিনঃ
পৃষ্ঠ্যৈশ্চাশ্বৈর্মহীপালাঃ সমুত্পেতুরুদায়ুধাঃ

ততস্তে মাং মহীপালাঃ সর্ব এব বিশাং পতে
রথব্রাতেন মহতা সর্বতঃ পর্যবারয়ন্

তানহং শরবর্ষেণ মহতা প্রত্যবারয়ম্
সর্বান্নৃপাংশ্চাপ্যজয়ং দেবরাডিব দানবান্

তেষামাপততাং চিত্রান্ধ্বজান্হেমপরিষ্কৃতান্
একৈকেন হি বাণেন ভূমৌ পাতিতবানহম্

হয়াংশ্চৈষাং গজাংশ্চৈব সারথীংশ্চাপ্যহং রণে
অপাতয়ং শরৈর্দীপ্তৈঃ প্রহসন্পুরুষর্ষভ

তে নিবৃত্তাশ্চ ভগ্নাশ্চ দৃষ্ট্বা তল্লাঘবং মম
অথাহং হাস্তিনপুরমায়াং জিত্বা মহীক্ষিতঃ

অতোঽহং তাশ্চ কন্যা বৈ ভ্রাতুরর্থায় ভারত
তচ্চ কর্ম মহাবাহো সত্যবত্যৈ ন্যবেদয়ম্