অধ্যায় 171

171.1

ভীষ্ম উবাচ
ততোঽহং ভরতশ্রেষ্ঠ মাতরং বীরমাতরম্
অভিগম্যোপসংগৃহ্য দাশেয়ীমিদমব্রুবম্

ইমাঃ কাশিপতেঃ কন্যা ময়া নির্জিত্য পার্থিবান্
বিচিত্রবীর্যস্য কৃতে বীর্যশুল্কা উপার্জিতাঃ

ততো মূর্ধন্যুপাঘ্রায় পর্যশ্রুনয়না নৃপ
আহ সত্যবতী হৃষ্টা দিষ্ট্যা পুত্র জিতং ত্বয়া

সত্যবত্যাস্ত্বনুমতে বিবাহে সমুপস্থিতে
উবাচ বাক্যং সব্রীডা জ্যেষ্ঠা কাশিপতেঃ সুতা

ভীষ্ম ত্বমসি ধর্মজ্ঞঃ সর্বশাস্ত্রবিশারদঃ
শ্রুত্বা চ ধর্ম্যং বচনং মহ্যং কর্তুমিহার্হসি

ময়া শাল্বপতিঃ পূর্বং মনসাভিবৃতো বরঃ
তেন চাস্মি বৃতা পূর্বং রহস্যবিদিতে পিতুঃ

কথং মামন্যকামাং ত্বং রাজঞ্শাস্ত্রমধীত্য বৈ
বাসয়েথা গৃহে ভীষ্ম কৌরবঃ সন্বিশেষতঃ

এতদ্বুদ্ধ্যা বিনিশ্চিত্য মনসা ভরতর্ষভ
যত্ক্ষমং তে মহাবাহো তদিহারব্ধুমর্হসি

স মাং প্রতীক্ষতে ব্যক্তং শাল্বরাজো বিশাং পতে
কৃপাং কুরু মহাবাহো ময়ি ধর্মভৃতাং বর
ত্বং হি সত্যব্রতো বীর পৃথিব্যামিতি নঃ শ্রুতম্