অধ্যায় 172

172.1

ভীষ্ম উবাচ
ততোঽহং সমনুজ্ঞাপ্য কালীং সত্যবতীং তদা
মন্ত্রিণশ্চ দ্বিজাংশ্চৈব তথৈব চ পুরোহিতান্
সমনুজ্ঞাসিষং কন্যাং জ্যেষ্ঠামম্বাং নরাধিপ

অনুজ্ঞাতা যয়ৌ সা তু কন্যা শাল্বপতেঃ পুরম্
বৃদ্ধৈর্দ্বিজাতিভির্গুপ্তা ধাত্র্যা চানুগতা তদা
অতীত্য চ তমধ্বানমাসসাদ নরাধিপম্

সা তমাসাদ্য রাজানং শাল্বং বচনমব্রবীৎ
আগতাহং মহাবাহো ত্বামুদ্দিশ্য মহাদ্যুতে

তামব্রবীচ্ছাল্বপতিঃ স্ময়ন্নিব বিশাং পতে
ত্বয়ান্যপূর্বয়া নাহং ভার্যার্থী বরবর্ণিনি

গচ্ছ ভদ্রে পুনস্তত্র সকাশং ভারতস্য বৈ
নাহমিচ্ছামি ভীষ্মেণ গৃহীতাং ত্বাং প্রসহ্য বৈ

ত্বং হি নির্জিত্য ভীষ্মেণ নীতা প্রীতিমতী তদা
পরামৃশ্য মহায়ুদ্ধে নির্জিত্য পৃথিবীপতীন্
নাহং ত্বয্যন্যপূর্বায়াং ভার্যার্থী বরবর্ণিনি

কথমস্মদ্বিধো রাজা পরপূর্বাং প্রবেশয়েৎ
নারীং বিদিতবিজ্ঞানঃ পরেষাং ধর্মমাদিশন্
যথেষ্টং গম্যতাং ভদ্রে মা তে কালোঽত্যগাদয়ম্

অম্বা তমব্রবীদ্রাজন্ননঙ্গশরপীডিতা
মৈবং বদ মহীপাল নৈতদেবং কথংচন

নাস্মি প্রীতিমতী নীতা ভীষ্মেণামিত্রকর্শন
বলান্নীতাস্মি রুদতী বিদ্রাব্য পৃথিবীপতীন্

ভজস্ব মাং শাল্বপতে ভক্তাং বালামনাগসম্
ভক্তানাং হি পরিত্যাগো ন ধর্মেষু প্রশস্যতে

সাহমামন্ত্র্য গাঙ্গেয়ং সমরেষ্বনিবর্তিনম্
অনুজ্ঞাতা চ তেনৈব তবৈব গৃহমাগতা

ন স ভীষ্মো মহাবাহুর্মামিচ্ছতি বিশাং পতে
ভ্রাতৃহেতোঃ সমারম্ভো ভীষ্মস্যেতি শ্রুতং ময়া

ভগিন্যৌ মম যে নীতে অম্বিকাম্বালিকে নৃপ
প্রাদাদ্বিচিত্রবীর্যায় গাঙ্গেয়ো হি যবীয়সে

যথা শাল্বপতে নান্যং নরং ধ্যামি কথংচন
ত্বামৃতে পুরুষব্যাঘ্র তথা মূর্ধানমালভে

ন চান্যপূর্বা রাজেন্দ্র ত্বামহং সমুপস্থিতা
সত্যং ব্রবীমি শাল্বৈতত্সত্যেনাত্মানমালভে

ভজস্ব মাং বিশালাক্ষ স্বয়ং কন্যামুপস্থিতাম্
অনন্যপূর্বাং রাজেন্দ্র ত্বত্প্রসাদাভিকাঙ্ক্ষিণীম্

তামেবং ভাষমাণাং তু শাল্বঃ কাশিপতেঃ সুতাম্
অত্যজদ্ভরতশ্রেষ্ঠ ত্বচং জীর্ণামিবোরগঃ

এবং বহুবিধৈর্বাক্যৈর্যাচ্যমানস্তয়ানঘ
নাশ্রদ্দধচ্ছাল্বপতিঃ কন্যায়া ভরতর্ষভ

ততঃ সা মন্যুনাবিষ্টা জ্যেষ্ঠা কাশিপতেঃ সুতা
অব্রবীত্সাশ্রুনয়না বাষ্পবিহ্বলয়া গিরা

ত্বয়া ত্যক্তা গমিষ্যামি যত্র যত্র বিশাং পতে
তত্র মে সন্তু গতয়ঃ সন্তঃ সত্যং যথাব্রুবম্

এবং সংভাষমাণাং তু নৃশংসঃ শাল্বরাট্তদা
পর্যত্যজত কৌরব্য করুণং পরিদেবতীম্

গচ্ছ গচ্ছেতি তাং শাল্বঃ পুনঃ পুনরভাষত
বিভেমি ভীষ্মাত্সুশ্রোণি ত্বং চ ভীষ্মপরিগ্রহঃ

এবমুক্তা তু সা তেন শাল্বেনাদীর্ঘদর্শিনা
নিশ্চক্রাম পুরাদ্দীনা রুদতী কুররী যথা