অধ্যায় 173

173.1

ভীষ্ম উবাচ
সা নিষ্ক্রমন্তী নগরাচ্চিন্তয়ামাস ভারত
পৃথিব্যাং নাস্তি যুবতির্বিষমস্থতরা ময়া
বান্ধবৈর্বিপ্রহীনাস্মি শাল্বেন চ নিরাকৃতা

ন চ শক্যং পুনর্গন্তুং ময়া বারণসাহ্বয়ম্
অনুজ্ঞাতাস্মি ভীষ্মেণ শাল্বমুদ্দিশ্য কারণম্

কিং নু গর্হাম্যথাত্মানমথ ভীষ্মং দুরাসদম্
আহোস্বিত্পিতরং মূঢং যো মেঽকার্ষীত্স্বয়ংবরম্

মমায়ং স্বকৃতো দোষো যাহং ভীষ্মরথাত্তদা
প্রবৃত্তে বৈশসে যুদ্ধে শাল্বার্থং নাপতং পুরা
তস্যেয়ং ফলনির্বৃত্তির্যদাপন্নাস্মি মূঢবৎ

ধিগ্ভীষ্মং ধিক্চ মে মন্দং পিতরং মূঢচেতসম্
যেনাহং বীর্যশুল্কেন পণ্যস্ত্রীবত্প্রবেরিতা

ধিঙ্মাং ধিক্শাল্বরাজানং ধিগ্ধাতারমথাপি চ
যেষাং দুর্নীতভাবেন প্রাপ্তাস্ম্যাপদমুত্তমাম্

সর্বথা ভাগধেয়ানি স্বানি প্রাপ্নোতি মানবঃ
অনয়স্যাস্য তু মুখং ভীষ্মঃ শাংতনবো মম

সা ভীষ্মে প্রতিকর্তব্যমহং পশ্যামি সাংপ্রতম্
তপসা বা যুধা বাপি দুঃখহেতুঃ স মে মতঃ
কো নু ভীষ্মং যুধা জেতুমুত্সহেত মহীপতিঃ

এবং সা পরিনিশ্চিত্য জগাম নগরাদ্বহিঃ
আশ্রমং পুণ্যশীলানাং তাপসানাং মহাত্মনাম্
ততস্তামবসদ্রাত্রিং তাপসৈঃ পরিবারিতা

আচখ্যৌ চ যথা বৃত্তং সর্বমাত্মনি ভারত
বিস্তরেণ মহাবাহো নিখিলেন শুচিস্মিতা
হরণং চ বিসর্গং চ শাল্বেন চ বিসর্জনম্

ততস্তত্র মহানাসীদ্ব্রাহ্মণঃ সংশিতব্রতঃ
শৈখাবত্যস্তপোবৃদ্ধঃ শাস্ত্রে চারণ্যকে গুরুঃ

আর্তাং তামাহ স মুনিঃ শৈখাবত্যো মহাতপাঃ
নিঃশ্বসন্তীং সতীং বালাং দুঃখশোকপরায়ণাম্

এবং গতে কিং নু ভদ্রে শক্যং কর্তুং তপস্বিভিঃ
আশ্রমস্থৈর্মহাভাগৈস্তপোনিত্যৈর্মহাত্মভিঃ

সা ত্বেনমব্রবীদ্রাজন্ক্রিয়তাং মদনুগ্রহঃ
প্রব্রাজিতুমিহেচ্ছামি তপস্তপ্স্যামি দুশ্চরম্

ময়ৈবৈতানি কর্মাণি পূর্বদেহেষু মূঢয়া
কৃতানি নূনং পাপানি তেষামেতত্ফলং ধ্রুবম্

নোত্সহেয়ং পুনর্গন্তুং স্বজনং প্রতি তাপসাঃ
প্রত্যাখ্যাতা নিরানন্দা শাল্বেন চ নিরাকৃতা

উপদিষ্টমিহেচ্ছামি তাপস্যং বীতকল্মষাঃ
যুষ্মাভির্দেবসংকাশাঃ কৃপা ভবতু বো ময়ি

স তামাশ্বাসয়ত্কন্যাং দৃষ্টান্তাগমহেতুভিঃ
সান্ত্বয়ামাস কার্যং চ প্রতিজজ্ঞে দ্বিজৈঃ সহ