Utshovঅধ্যায় 174
174.1
ভীষ্ম উবাচ
ততস্তে তাপসাঃ সর্বে কার্যবন্তোঽভবংস্তদা
তাং কন্যাং চিন্তয়ন্তো বৈ কিং কার্যমিতি ধর্মিণঃ
174.2
কেচিদাহুঃ পিতুর্বেশ্ম নীয়তামিতি তাপসাঃ
কেচিদস্মদুপালম্ভে মতিং চক্রুর্দ্বিজোত্তমাঃ
174.3
কেচিচ্ছাল্বপতিং গত্বা নিয়োজ্যমিতি মেনিরে
নেতি কেচিদ্ব্যবস্যন্তি প্রত্যাখ্যাতা হি তেন সা
174.4
এবং গতে কিং নু শক্যং ভদ্রে কর্তুং মনীষিভিঃ
পুনরূচুশ্চ তে সর্বে তাপসাঃ সংশিতব্রতাঃ
174.5
অলং প্রব্রজিতেনেহ ভদ্রে শৃণু হিতং বচঃ
ইতো গচ্ছস্ব ভদ্রং তে পিতুরেব নিবেশনম্
174.6
প্রতিপত্স্যতি রাজা স পিতা তে যদনন্তরম্
তত্র বত্স্যসি কল্যাণি সুখং সর্বগুণান্বিতা
ন চ তেঽন্যা গতির্ন্যায্যা ভবেদ্ভদ্রে যথা পিতা
174.7
পতির্বাপি গতির্নার্যাঃ পিতা বা বরবর্ণিনি
গতিঃ পতিঃ সমস্থায়া বিষমে তু পিতা গতিঃ
174.8
প্রব্রজ্যা হি সুদুঃখেয়ং সুকুমার্যা বিশেষতঃ
রাজপুত্র্যাঃ প্রকৃত্যা চ কুমার্যাস্তব ভামিনি
174.9
ভদ্রে দোষা হি বিদ্যন্তে বহবো বরবর্ণিনি
আশ্রমে বৈ বসন্ত্যাস্তে ন ভবেয়ুঃ পিতুর্গৃহে
174.10
ততস্তু তেঽব্রুবন্বাক্যং ব্রাহ্মণাস্তাং তপস্বিনীম্
ত্বামিহৈকাকিনীং দৃষ্ট্বা নির্জনে গহনে বনে
প্রার্থয়িষ্যন্তি রাজেন্দ্রাস্তস্মান্মৈবং মনঃ কৃথাঃ
174.11
অম্বোবাচ
ন শক্যং কাশিনগরীং পুনর্গন্তুং পিতুর্গৃহান্
অবজ্ঞাতা ভবিষ্যামি বান্ধবানাং ন সংশয়ঃ
174.12
উষিতা হ্যন্যথা বাল্যে পিতুর্বেশ্মনি তাপসাঃ
নাহং গমিষ্যে ভদ্রং বস্তত্র যত্র পিতা মম
তপস্তপ্তুমভীপ্সামি তাপসৈঃ পরিপালিতা
174.13
যথা পরেঽপি মে লোকে ন স্যাদেবং মহাত্যয়ঃ
দৌর্ভাগ্যং ব্রাহ্মণশ্রেষ্ঠাস্তস্মাত্তপ্স্যাম্যহং তপঃ
174.14
ভীষ্ম উবাচ
ইত্যেবং তেষু বিপ্রেষু চিন্তয়ত্সু তথা তথা
রাজর্ষিস্তদ্বনং প্রাপ্তস্তপস্বী হোত্রবাহনঃ
174.15
ততস্তে তাপসাঃ সর্বে পূজয়ন্তি স্ম তং নৃপম্
পূজাভিঃ স্বাগতাদ্যাভিরাসনেনোদকেন চ
174.16
তস্যোপবিষ্টস্য ততো বিশ্রান্তস্যোপশৃণ্বতঃ
পুনরেব কথাং চক্রুঃ কন্যাং প্রতি বনৌকসঃ
174.17
অম্বায়াস্তাং কথাং শ্রুত্বা কাশিরাজ্ঞশ্চ ভারত
স বেপমান উত্থায় মাতুরস্যাঃ পিতা তদা
তাং কন্যামঙ্কমারোপ্য পর্যাশ্বাসয়ত প্রভো
174.18
স তামপৃচ্ছত্কার্ত্স্ন্যেন ব্যসনোত্পত্তিমাদিতঃ
সা চ তস্মৈ যথাবৃত্তং বিস্তরেণ ন্যবেদয়ৎ
174.19
ততঃ স রাজর্ষিরভূদ্দুঃখশোকসমন্বিতঃ
কার্যং চ প্রতিপেদে তন্মনসা সুমহাতপাঃ
174.20
অব্রবীদ্বেপমানশ্চ কন্যামার্তাং সুদুঃখিতঃ
মা গাঃ পিতৃগৃহং ভদ্রে মাতুস্তে জনকো হ্যহম্
174.21
দুঃখং ছেত্স্যামি তেঽহং বৈ ময়ি বর্তস্ব পুত্রিকে
পর্যাপ্তং তে মনঃ পুত্রি যদেবং পরিশুষ্যসি
174.22
গচ্ছ মদ্বচনাদ্রামং জামদগ্ন্যং তপস্বিনম্
রামস্তব মহদ্দুঃখং শোকং চাপনয়িষ্যতি
হনিষ্যতি রণে ভীষ্মং ন করিষ্যতি চেদ্বচঃ
174.23
তং গচ্ছ ভার্গবশ্রেষ্ঠং কালাগ্নিসমতেজসম্
প্রতিষ্ঠাপয়িতা স ত্বাং সমে পথি মহাতপাঃ
174.24
ততস্তু সস্বরং বাষ্পমুত্সৃজন্তী পুনঃ পুনঃ
অব্রবীত্পিতরং মাতুঃ সা তদা হোত্রবাহনম্
174.25
অভিবাদয়িত্বা শিরসা গমিষ্যে তব শাসনাৎ
অপি নামাদ্য পশ্যেয়মার্যং তং লোকবিশ্রুতম্
174.26
কথং চ তীব্রং দুঃখং মে হনিষ্যতি স ভার্গবঃ
এতদিচ্ছাম্যহং শ্রোতুমথ যাস্যামি তত্র বৈ