Utshovঅধ্যায় 175
175.1
হোত্রবাহন উবাচ
রামং দ্রক্ষ্যসি বত্সে ত্বং জামদগ্ন্যং মহাবনে
উগ্রে তপসি বর্তন্তং সত্যসংধং মহাবলম্
175.2
মহেন্দ্রে বৈ গিরিশ্রেষ্ঠে রামং নিত্যমুপাসতে
ঋষয়ো বেদবিদুষো গন্ধর্বাপ্সরসস্তথা
175.3
তত্র গচ্ছস্ব ভদ্রং তে ব্রূয়াশ্চৈনং বচো মম
অভিবাদ্য পূর্বং শিরসা তপোবৃদ্ধং দৃঢব্রতম্
175.4
ব্রূয়াশ্চৈনং পুনর্ভদ্রে যত্তে কার্যং মনীষিতম্
ময়ি সংকীর্তিতে রামঃ সর্বং তত্তে করিষ্যতি
175.5
মম রামঃ সখা বত্সে প্রীতিয়ুক্তঃ সুহৃচ্চ মে
জমদগ্নিসুতো বীরঃ সর্বশস্ত্রভৃতাং বরঃ
175.6
এবং ব্রুবতি কন্যাং তু পার্থিবে হোত্রবাহনে
অকৃতব্রণঃ প্রাদুরাসীদ্রামস্যানুচরঃ প্রিয়ঃ
175.7
ততস্তে মুনয়ঃ সর্বে সমুত্তস্থুঃ সহস্রশঃ
স চ রাজা বয়োবৃদ্ধঃ সৃঞ্জয়ো হোত্রবাহনঃ
175.8
ততঃ পৃষ্ট্বা যথান্যায়মন্যোন্যং তে বনৌকসঃ
সহিতা ভরতশ্রেষ্ঠ নিষেদুঃ পরিবার্য তম্
175.9
ততস্তে কথয়ামাসুঃ কথাস্তাস্তা মনোরমাঃ
কান্তা দিব্যাশ্চ রাজেন্দ্র প্রীতিহর্ষমুদা যুতাঃ
175.10
ততঃ কথান্তে রাজর্ষির্মহাত্মা হোত্রবাহনঃ
রামং শ্রেষ্ঠং মহর্ষীণামপৃচ্ছদকৃতব্রণম্
175.11
ক্ব সংপ্রতি মহাবাহো জামদগ্ন্যঃ প্রতাপবান্
অকৃতব্রণ শক্যো বৈ দ্রষ্টুং বেদবিদাং বরঃ
175.12
অকৃতব্রণ উবাচ
ভবন্তমেব সততং রামঃ কীর্তয়তি প্রভো
সৃঞ্জয়ো মে প্রিয়সখো রাজর্ষিরিতি পার্থিব
175.13
ইহ রামঃ প্রভাতে শ্বো ভবিতেতি মতির্মম
দ্রষ্টাস্যেনমিহায়ান্তং তব দর্শনকাঙ্ক্ষয়া
175.14
ইয়ং চ কন্যা রাজর্ষে কিমর্থং বনমাগতা
কস্য চেয়ং তব চ কা ভবতীচ্ছামি বেদিতুম্
175.15
হোত্রবাহন উবাচ
দৌহিত্রীয়ং মম বিভো কাশিরাজসুতা শুভা
জ্যেষ্ঠা স্বয়ংবরে তস্থৌ ভগিনীভ্যাং সহানঘ
175.16
ইয়মম্বেতি বিখ্যাতা জ্যেষ্ঠা কাশিপতেঃ সুতা
অম্বিকাম্বালিকে ত্বন্যে যবীয়স্যৌ তপোধন
175.17
সমেতং পার্থিবং ক্ষত্রং কাশিপুর্যাং ততোঽভবৎ
কন্যানিমিত্তং ব্রহ্মর্ষে তত্রাসীদুত্সবো মহান্
175.18
ততঃ কিল মহাবীর্যো ভীষ্মঃ শাংতনবো নৃপান্
অবাক্ষিপ্য মহাতেজাস্তিস্রঃ কন্যা জহার তাঃ
175.19
নির্জিত্য পৃথিবীপালানথ ভীষ্মো গজাহ্বয়ম্
আজগাম বিশুদ্ধাত্মা কন্যাভিঃ সহ ভারত
175.20
সত্যবত্যৈ নিবেদ্যাথ বিবাহার্থমনন্তরম্
ভ্রাতুর্বিচিত্রবীর্যস্য সমাজ্ঞাপয়ত প্রভুঃ
175.21
ততো বৈবাহিকং দৃষ্ট্বা কন্যেয়ং সমুপার্জিতম্
অব্রবীত্তত্র গাঙ্গেয়ং মন্ত্রিমধ্যে দ্বিজর্ষভ
175.22
ময়া শাল্বপতির্বীর মনসাভিবৃতঃ পতিঃ
ন মামর্হসি ধর্মজ্ঞ পরচিত্তাং প্রদাপিতুম্
175.23
তচ্ছ্রুত্বা বচনং ভীষ্মঃ সংমন্ত্র্য সহ মন্ত্রিভিঃ
নিশ্চিত্য বিসসর্জেমাং সত্যবত্যা মতে স্থিতঃ
175.24
অনুজ্ঞাতা তু ভীষ্মেণ শাল্বং সৌভপতিং ততঃ
কন্যেয়ং মুদিতা বিপ্র কালে বচনমব্রবীৎ
175.25
বিসর্জিতাস্মি ভীষ্মেণ ধর্মং মাং প্রতিপাদয়
মনসাভিবৃতঃ পূর্বং ময়া ত্বং পার্থিবর্ষভ
175.26
প্রত্যাচখ্যৌ চ শাল্বোঽপি চারিত্রস্যাভিশঙ্কিতঃ
সেয়ং তপোবনং প্রাপ্তা তাপস্যেঽভিরতা ভৃশম্
175.27
ময়া চ প্রত্যভিজ্ঞাতা বংশস্য পরিকীর্তনাৎ
অস্য দুঃখস্য চোত্পত্তিং ভীষ্মমেবেহ মন্যতে
175.28
অম্বোবাচ
ভগবন্নেবমেবৈতদ্যথাহ পৃথিবীপতিঃ
শরীরকর্তা মাতুর্মে সৃঞ্জয়ো হোত্রবাহনঃ
175.29
ন হ্যুত্সহে স্বনগরং প্রতিয়াতুং তপোধন
অবমানভয়াচ্চৈব ব্রীডয়া চ মহামুনে
175.30
যত্তু মাং ভগবান্রামো বক্ষ্যতি দ্বিজসত্তম
তন্মে কার্যতমং কার্যমিতি মে ভগবন্মতিঃ