Utshovঅধ্যায় 176
176.1
অকৃতব্রণ উবাচ
দুঃখদ্বয়মিদং ভদ্রে কতরস্য চিকীর্ষসি
প্রতিকর্তব্যমবলে তত্ত্বং বত্সে ব্রবীহি মে
176.2
যদি সৌভপতির্ভদ্রে নিয়োক্তব্যো মতে তব
নিয়োক্ষ্যতি মহাত্মা তং রামস্ত্বদ্ধিতকাম্যয়া
176.3
অথাপগেয়ং ভীষ্মং তং রামেণেচ্ছসি ধীমতা
রণে বিনির্জিতং দ্রষ্টুং কুর্যাত্তদপি ভার্গবঃ
176.4
সৃঞ্জয়স্য বচঃ শ্রুত্বা তব চৈব শুচিস্মিতে
যদত্রানন্তরং কার্যং তদদ্যৈব বিচিন্ত্যতাম্
176.5
অম্বোবাচ
অপনীতাস্মি ভীষ্মেণ ভগবন্নবিজানতা
ন হি জানাতি মে ভীষ্মো ব্রহ্মঞ্শাল্বগতং মনঃ
176.6
এতদ্বিচার্য মনসা ভবানেব বিনিশ্চয়ম্
বিচিনোতু যথান্যায়ং বিধানং ক্রিয়তাং তথা
176.7
ভীষ্মে বা কুরুশার্দূলে শাল্বরাজেঽথ বা পুনঃ
উভয়োরেব বা ব্রহ্মন্যদ্যুক্তং তত্সমাচর
176.8
নিবেদিতং ময়া হ্যেতদ্দুঃখমূলং যথাতথম্
বিধানং তত্র ভগবন্কর্তুমর্হসি যুক্তিতঃ
176.9
অকৃতব্রণ উবাচ
উপপন্নমিদং ভদ্রে যদেবং বরবর্ণিনি
ধর্মং প্রতি বচো ব্রূয়াঃ শৃণু চেদং বচো মম
176.10
যদি ত্বামাপগেয়ো বৈ ন নয়েদ্গজসাহ্বয়ম্
শাল্বস্ত্বাং শিরসা ভীরু গৃহ্ণীয়াদ্রামচোদিতঃ
176.11
তেন ত্বং নির্জিতা ভদ্রে যস্মান্নীতাসি ভামিনি
সংশয়ঃ শাল্বরাজস্য তেন ত্বয়ি সুমধ্যমে
176.12
ভীষ্মঃ পুরুষমানী চ জিতকাশী তথৈব চ
তস্মাত্প্রতিক্রিয়া যুক্তা ভীষ্মে কারয়িতুং ত্বয়া
176.13
অম্বোবাচ
মমাপ্যেষ মহান্ব্রহ্মন্হৃদি কামোঽভিবর্ততে
ঘাতয়েয়ং যদি রণে ভীষ্মমিত্যেব নিত্যদা
176.14
ভীষ্মং বা শাল্বরাজং বা যং বা দোষেণ গচ্ছসি
প্রশাধি তং মহাবাহো যত্কৃতেঽহং সুদুঃখিতা
176.15
ভীষ্ম উবাচ
এবং কথয়তামেব তেষাং স দিবসো গতঃ
রাত্রিশ্চ ভরতশ্রেষ্ঠ সুখশীতোষ্ণমারুতা
176.16
ততো রামঃ প্রাদুরাসীত্প্রজ্বলন্নিব তেজসা
শিষ্যৈঃ পরিবৃতো রাজঞ্জটাচীরধরো মুনিঃ
176.17
ধনুষ্পাণিরদীনাত্মা খড্গং বিভ্রত্পরশ্বধী
বিরজা রাজশার্দূল সোঽভ্যয়াত্সৃঞ্জয়ং নৃপম্
176.18
ততস্তং তাপসা দৃষ্ট্বা স চ রাজা মহাতপাঃ
তস্থুঃ প্রাঞ্জলয়ঃ সর্বে সা চ কন্যা তপস্বিনী
176.19
পূজয়ামাসুরব্যগ্রা মধুপর্কেণ ভার্গবম্
অর্চিতশ্চ যথায়োগং নিষসাদ সহৈব তৈঃ
176.20
ততঃ পূর্বব্যতীতানি কথয়েতে স্ম তাবুভৌ
সৃঞ্জয়শ্চ স রাজর্ষির্জামদগ্ন্যশ্চ ভারত
176.21
ততঃ কথান্তে রাজর্ষির্ভৃগুশ্রেষ্ঠং মহাবলম্
উবাচ মধুরং কালে রামং বচনমর্থবৎ
176.22
রামেয়ং মম দৌহিত্রী কাশিরাজসুতা প্রভো
অস্যাঃ শৃণু যথাতত্ত্বং কার্যং কার্যবিশারদ
176.23
পরমং কথ্যতাং চেতি তাং রামঃ প্রত্যভাষত
ততঃ সাভ্যগমদ্রামং জ্বলন্তমিব পাবকম্
176.24
সা চাভিবাদ্য চরণৌ রামস্য শিরসা শুভা
স্পৃষ্ট্বা পদ্মদলাভাভ্যাং পাণিভ্যামগ্রতঃ স্থিতা
176.25
রুরোদ সা শোকবতী বাষ্পব্যাকুললোচনা
প্রপেদে শরণং চৈব শরণ্যং ভৃগুনন্দনম্
176.26
রাম উবাচ
যথাসি সৃঞ্জয়স্যাস্য তথা মম নৃপাত্মজে
ব্রূহি যত্তে মনোদুঃখং করিষ্যে বচনং তব
176.27
অম্বোবাচ
ভগবঞ্শরণং ত্বাদ্য প্রপন্নাস্মি মহাব্রত
শোকপঙ্কার্ণবাদ্ঘোরাদুদ্ধরস্ব চ মাং বিভো
176.28
ভীষ্ম উবাচ
তস্যাশ্চ দৃষ্ট্বা রূপং চ বয়শ্চাভিনবং পুনঃ
সৌকুমার্যং পরং চৈব রামশ্চিন্তাপরোঽভবৎ
176.29
কিমিয়ং বক্ষ্যতীত্যেবং বিমৃশন্ভৃগুসত্তমঃ
ইতি দধ্যৌ চিরং রামঃ কৃপয়াভিপরিপ্লুতঃ
176.30
কথ্যতামিতি সা ভূয়ো রামেণোক্তা শুচিস্মিতা
সর্বমেব যথাতত্ত্বং কথয়ামাস ভার্গবে
176.31
তচ্ছ্রুত্বা জামদগ্ন্যস্তু রাজপুত্র্যা বচস্তদা
উবাচ তাং বরারোহাং নিশ্চিত্যার্থবিনিশ্চয়ম্
176.32
প্রেষয়িষ্যামি ভীষ্মায় কুরুশ্রেষ্ঠায় ভামিনি
করিষ্যতি বচো ধর্ম্যং শ্রুত্বা মে স নরাধিপঃ
176.33
ন চেত্করিষ্যতি বচো ময়োক্তং জাহ্নবীসুতঃ
ধক্ষ্যাম্যেনং রণে ভদ্রে সামাত্যং শস্ত্রতেজসা
176.34
অথ বা তে মতিস্তত্র রাজপুত্রি নিবর্ততে
তাবচ্ছাল্বপতিং বীরং যোজয়াম্যত্র কর্মণি
176.35
অম্বোবাচ
বিসর্জিতাস্মি ভীষ্মেণ শ্রুত্বৈব ভৃগুনন্দন
শাল্বরাজগতং চেতো মম পূর্বং মনীষিতম্
176.36
সৌভরাজমুপেত্যাহমব্রুবং দুর্বচং বচঃ
ন চ মাং প্রত্যগৃহ্ণাত্স চারিত্রপরিশঙ্কিতঃ
176.37
এতত্সর্বং বিনিশ্চিত্য স্ববুদ্ধ্যা ভৃগুনন্দন
যদত্রৌপয়িকং কার্যং তচ্চিন্তয়িতুমর্হসি
176.38
মমাত্র ব্যসনস্যাস্য ভীষ্মো মূলং মহাব্রতঃ
যেনাহং বশমানীতা সমুত্ক্ষিপ্য বলাত্তদা
176.39
ভীষ্মং জহি মহাবাহো যত্কৃতে দুঃখমীদৃশম্
প্রাপ্তাহং ভৃগুশার্দূল চরাম্যপ্রিয়মুত্তমম্
176.40
স হি লুব্ধশ্চ মানী চ জিতকাশী চ ভার্গব
তস্মাত্প্রতিক্রিয়া কর্তুং যুক্তা তস্মৈ ত্বয়ানঘ
176.41
এষ মে হ্রিয়মাণায়া ভারতেন তদা বিভো
অভবদ্ধৃদি সংকল্পো ঘাতয়েয়ং মহাব্রতম্
176.42
তস্মাত্কামং মমাদ্যেমং রাম সংবর্তয়ানঘ
জহি ভীষ্মং মহাবাহো যথা বৃত্রং পুরংদরঃ