Utshovঅধ্যায় 177
177.1
ভীষ্ম উবাচ
এবমুক্তস্তদা রামো জহি ভীষ্মমিতি প্রভো
উবাচ রুদতীং কন্যাং চোদয়ন্তীং পুনঃ পুনঃ
177.2
কাশ্যে কামং ন গৃহ্ণামি শস্ত্রং বৈ বরবর্ণিনি
ঋতে ব্রহ্মবিদাং হেতোঃ কিমন্যত্করবাণি তে
177.3
বাচা ভীষ্মশ্চ শাল্বশ্চ মম রাজ্ঞি বশানুগৌ
ভবিষ্যতোঽনবদ্যাঙ্গি তত্করিষ্যামি মা শুচঃ
177.4
ন তু শস্ত্রং গ্রহীষ্যামি কথংচিদপি ভামিনি
ঋতে নিয়োগাদ্বিপ্রাণামেষ মে সময়ঃ কৃতঃ
177.5
অম্বোবাচ
মম দুঃখং ভগবতা ব্যপনেয়ং যতস্ততঃ
তত্তু ভীষ্মপ্রসূতং মে তং জহীশ্বর মাচিরম্
177.6
রাম উবাচ
কাশিকন্যে পুনর্ব্রূহি ভীষ্মস্তে চরণাবুভৌ
শিরসা বন্দনার্হোঽপি গ্রহীষ্যতি গিরা মম
177.7
অম্বোবাচ
জহি ভীষ্মং রণে রাম মম চেদিচ্ছসি প্রিয়ম্
প্রতিশ্রুতং চ যদি তত্সত্যং কর্তুমিহার্হসি
177.8
ভীষ্ম উবাচ
তয়োঃ সংবদতোরেবং রাজন্রামাম্বয়োস্তদা
অকৃতব্রণো জামদগ্ন্যমিদং বচনমব্রবীৎ
177.9
শরণাগতাং মহাবাহো কন্যাং ন ত্যক্তুমর্হসি
জহি ভীষ্মং রণে রাম গর্জন্তমসুরং যথা
177.10
যদি ভীষ্মস্ত্বয়াহূতো রণে রাম মহামুনে
নির্জিতোঽস্মীতি বা ব্রূয়াত্কুর্যাদ্বা বচনং তব
177.11
কৃতমস্যা ভবেত্কার্যং কন্যায়া ভৃগুনন্দন
বাক্যং সত্যং চ তে বীর ভবিষ্যতি কৃতং বিভো
177.12
ইয়ং চাপি প্রতিজ্ঞা তে তদা রাম মহামুনে
জিত্বা বৈ ক্ষত্রিয়ান্সর্বান্ব্রাহ্মণেষু প্রতিশ্রুতম্
177.13
ব্রাহ্মণঃ ক্ষত্রিয়ো বৈশ্যঃ শূদ্রশ্চৈব রণে যদি
ব্রহ্মদ্বিড্ভবিতা তং বৈ হনিষ্যামীতি ভার্গব
177.14
শরণং হি প্রপন্নানাং ভীতানাং জীবিতার্থিনাম্
ন শক্ষ্যামি পরিত্যাগং কর্তুং জীবন্কথংচন
177.15
যশ্চ ক্ষত্রং রণে কৃত্স্নং বিজেষ্যতি সমাগতম্
দৃপ্তাত্মানমহং তং চ হনিষ্যামীতি ভার্গব
177.16
স এবং বিজয়ী রাম ভীষ্মঃ কুরুকুলোদ্বহঃ
তেন যুধ্যস্ব সংগ্রামে সমেত্য ভৃগুনন্দন
177.17
রাম উবাচ
স্মরাম্যহং পূর্বকৃতাং প্রতিজ্ঞামৃষিসত্তম
তথৈব চ করিষ্যামি যথা সাম্নৈব লপ্স্যতে
177.18
কার্যমেতন্মহদ্ব্রহ্মন্কাশিকন্যামনোগতম্
গমিষ্যামি স্বয়ং তত্র কন্যামাদায় যত্র সঃ
177.19
যদি ভীষ্মো রণশ্লাঘী ন করিষ্যতি মে বচঃ
হনিষ্যাম্যেনমুদ্রিক্তমিতি মে নিশ্চিতা মতিঃ
177.20
ন হি বাণা ময়োত্সৃষ্টাঃ সজ্জন্তীহ শরীরিণাম্
কায়েষু বিদিতং তুভ্যং পুরা ক্ষত্রিয়সংগরে
177.21
ভীষ্ম উবাচ
এবমুক্ত্বা ততো রামঃ সহ তৈর্ব্রহ্মবাদিভিঃ
প্রয়াণায় মতিং কৃত্বা সমুত্তস্থৌ মহামনাঃ
177.22
ততস্তে তামুষিত্বা তু রজনীং তত্র তাপসাঃ
হুতাগ্নয়ো জপ্তজপ্যাঃ প্রতস্থুর্মজ্জিঘাংসয়া
177.23
অভ্যগচ্ছত্ততো রামঃ সহ তৈর্ব্রাহ্মণর্ষভৈঃ
কুরুক্ষেত্রং মহারাজ কন্যয়া সহ ভারত
177.24
ন্যবিশন্ত ততঃ সর্বে পরিগৃহ্য সরস্বতীম্
তাপসাস্তে মহাত্মানো ভৃগুশ্রেষ্ঠপুরস্কৃতাঃ