Utshovঅধ্যায় 178
178.1
ভীষ্ম উবাচ
ততস্তৃতীয়ে দিবসে সমে দেশে ব্যবস্থিতঃ
প্রেষয়ামাস মে রাজন্প্রাপ্তোঽস্মীতি মহাব্রতঃ
178.2
তমাগতমহং শ্রুত্বা বিষয়ান্তং মহাবলম্
অভ্যগচ্ছং জবেনাশু প্রীত্যা তেজোনিধিং প্রভুম্
178.3
গাং পুরস্কৃত্য রাজেন্দ্র ব্রাহ্মণৈঃ পরিবারিতঃ
ঋত্বিগ্ভির্দেবকল্পৈশ্চ তথৈব চ পুরোহিতৈঃ
178.4
স মামভিগতং দৃষ্ট্বা জামদগ্ন্যঃ প্রতাপবান্
প্রতিজগ্রাহ তাং পূজাং বচনং চেদমব্রবীৎ
178.5
ভীষ্ম কাং বুদ্ধিমাস্থায় কাশিরাজসুতা ত্বয়া
অকামেয়মিহানীতা পুনশ্চৈব বিসর্জিতা
178.6
বিভ্রংশিতা ত্বয়া হীয়ং ধর্মাবাপ্তেঃ পরাবরাৎ
পরামৃষ্টাং ত্বয়া হীমাং কো হি গন্তুমিহার্হতি
178.7
প্রত্যাখ্যাতা হি শাল্বেন ত্বয়া নীতেতি ভারত
তস্মাদিমাং মন্নিয়োগাত্প্রতিগৃহ্ণীষ্ব ভারত
178.8
স্বধর্মং পুরুষব্যাঘ্র রাজপুত্রী লভত্বিয়ম্
ন যুক্তমবমানোঽয়ং কর্তুং রাজ্ঞা ত্বয়ানঘ
178.9
ততস্তং নাতিমনসং সমুদীক্ষ্যাহমব্রুবম্
নাহমেনাং পুনর্দদ্যাং ভ্রাত্রে ব্রহ্মন্কথংচন
178.10
শাল্বস্যাহমিতি প্রাহ পুরা মামিহ ভার্গব
ময়া চৈবাভ্যনুজ্ঞাতা গতা সৌভপুরং প্রতি
178.11
ন ভয়ান্নাপ্যনুক্রোশান্ন লোভান্নার্থকাম্যয়া
ক্ষত্রধর্মমহং জহ্যামিতি মে ব্রতমাহিতম্
178.12
অথ মামব্রবীদ্রামঃ ক্রোধপর্যাকুলেক্ষণঃ
ন করিষ্যসি চেদেতদ্বাক্যং মে কুরুপুংগব
178.13
হনিষ্যামি সহামাত্যং ত্বামদ্যেতি পুনঃ পুনঃ
সংরম্ভাদব্রবীদ্রামঃ ক্রোধপর্যাকুলেক্ষণঃ
178.14
তমহং গীর্ভিরিষ্টাভিঃ পুনঃ পুনররিংদমম্
অয়াচং ভৃগুশার্দূলং ন চৈব প্রশশাম সঃ
178.15
তমহং প্রণম্য শিরসা ভূয়ো ব্রাহ্মণসত্তমম্
অব্রুবং কারণং কিং তদ্যত্ত্বং যোদ্ধুমিহেচ্ছসি
178.16
ইষ্বস্ত্রং মম বালস্য ভবতৈব চতুর্বিধম্
উপদিষ্টং মহাবাহো শিষ্যোঽস্মি তব ভার্গব
178.17
ততো মামব্রবীদ্রামঃ ক্রোধসংরক্তলোচনঃ
জানীষে মাং গুরুং ভীষ্ম ন চেমাং প্রতিগৃহ্ণসে
সুতাং কাশ্যস্য কৌরব্য মত্প্রিয়ার্থং মহীপতে
178.18
ন হি তে বিদ্যতে শান্তিরন্যথা কুরুনন্দন
গৃহাণেমাং মহাবাহো রক্ষস্ব কুলমাত্মনঃ
ত্বয়া বিভ্রংশিতা হীয়ং ভর্তারং নাভিগচ্ছতি
178.19
তথা ব্রুবন্তং তমহং রামং পরপুরংজয়ম্
নৈতদেবং পুনর্ভাবি ব্রহ্মর্ষে কিং শ্রমেণ তে
178.20
গুরুত্বং ত্বয়ি সংপ্রেক্ষ্য জামদগ্ন্য পুরাতনম্
প্রসাদয়ে ত্বাং ভগবংস্ত্যক্তৈষা হি পুরা ময়া
178.21
কো জাতু পরভাবাং হি নারীং ব্যালীমিব স্থিতাম্
বাসয়েত গৃহে জানন্স্ত্রীণাং দোষান্মহাত্যয়ান্
178.22
ন ভয়াদ্বাসবস্যাপি ধর্মং জহ্যাং মহাদ্যুতে
প্রসীদ মা বা যদ্বা তে কার্যং তত্কুরু মাচিরম্
178.23
অয়ং চাপি বিশুদ্ধাত্মন্পুরাণে শ্রূয়তে বিভো
মরুত্তেন মহাবুদ্ধে গীতঃ শ্লোকো মহাত্মনা
178.24
গুরোরপ্যবলিপ্তস্য কার্যাকার্যমজানতঃ
উত্পথপ্রতিপন্নস্য কার্যং ভবতি শাসনম্
178.25
স ত্বং গুরুরিতি প্রেম্ণা ময়া সংমানিতো ভৃশম্
গুরুবৃত্তং ন জানীষে তস্মাদ্যোত্স্যাম্যহং ত্বয়া
178.26
গুরুং ন হন্যাং সমরে ব্রাহ্মণং চ বিশেষতঃ
বিশেষতস্তপোবৃদ্ধমেবং ক্ষান্তং ময়া তব
178.27
উদ্যতেষুমথো দৃষ্ট্বা ব্রাহ্মণং ক্ষত্রবন্ধুবৎ
যো হন্যাত্সমরে ক্রুদ্ধো যুধ্যন্তমপলায়িনম্
ব্রহ্মহত্যা ন তস্য স্যাদিতি ধর্মেষু নিশ্চয়ঃ
178.28
ক্ষত্রিয়াণাং স্থিতো ধর্মে ক্ষত্রিয়োঽস্মি তপোধন
যো যথা বর্ততে যস্মিংস্তথা তস্মিন্প্রবর্তয়ন্
নাধর্মং সমবাপ্নোতি নরঃ শ্রেয়শ্চ বিন্দতি
178.29
অর্থে বা যদি বা ধর্মে সমর্থো দেশকালবিৎ
অনর্থসংশয়াপন্নঃ শ্রেয়ান্নিঃসংশয়েন চ
178.30
যস্মাত্সংশয়িতেঽর্থেঽস্মিন্যথান্যায়ং প্রবর্তসে
তস্মাদ্যোত্স্যামি সহিতস্ত্বয়া রাম মহাহবে
পশ্য মে বাহুবীর্যং চ বিক্রমং চাতিমানুষম্
178.31
এবং গতেঽপি তু ময়া যচ্ছক্যং ভৃগুনন্দন
তত্করিষ্যে কুরুক্ষেত্রে যোত্স্যে বিপ্র ত্বয়া সহ
দ্বংদ্বে রাম যথেষ্টং তে সজ্জো ভব মহামুনে
178.32
তত্র ত্বং নিহতো রাম ময়া শরশতাচিতঃ
লপ্স্যসে নির্জিতাঁল্লোকাঞ্শস্ত্রপূতো মহারণে
178.33
স গচ্ছ বিনিবর্তস্ব কুরুক্ষেত্রং রণপ্রিয়
তত্রৈষ্যামি মহাবাহো যুদ্ধায় ত্বাং তপোধন
178.34
অপি যত্র ত্বয়া রাম কৃতং শৌচং পুরা পিতুঃ
তত্রাহমপি হত্বা ত্বাং শৌচং কর্তাস্মি ভার্গব
178.35
তত্র গচ্ছস্ব রাম ত্বং ত্বরিতং যুদ্ধদুর্মদ
ব্যপনেষ্যামি তে দর্পং পৌরাণং ব্রাহ্মণব্রুব
178.36
যচ্চাপি কত্থসে রাম বহুশঃ পরিষত্সু বৈ
নির্জিতাঃ ক্ষত্রিয়া লোকে ময়ৈকেনেতি তচ্ছৃণু
178.37
ন তদা জায়তে ভীষ্মো মদ্বিধঃ ক্ষত্রিয়োঽপি বা
যস্তে যুদ্ধময়ং দর্পং কামং চ ব্যপনাশয়েৎ
178.38
সোঽহং জাতো মহাবাহো ভীষ্মঃ পরপুরংজয়ঃ
ব্যপনেষ্যামি তে দর্পং যুদ্ধে রাম ন সংশয়ঃ