Utshovঅধ্যায় 179
179.1
ভীষ্ম উবাচ
ততো মামব্রবীদ্রামঃ প্রহসন্নিব ভারত
দিষ্ট্যা ভীষ্ম ময়া সার্ধং যোদ্ধুমিচ্ছসি সংগরে
179.2
অয়ং গচ্ছামি কৌরব্য কুরুক্ষেত্রং ত্বয়া সহ
ভাষিতং তত্করিষ্যামি তত্রাগচ্ছেঃ পরংতপ
179.3
তত্র ত্বাং নিহতং মাতা ময়া শরশতাচিতম্
জাহ্নবী পশ্যতাং ভীষ্ম গৃধ্রকঙ্কবডাশনম্
179.4
কৃপণং ত্বামভিপ্রেক্ষ্য সিদ্ধচারণসেবিতা
ময়া বিনিহতং দেবী রোদতামদ্য পার্থিব
179.5
অতদর্হা মহাভাগা ভগীরথসুতা নদী
যা ত্বামজীজনন্মন্দং যুদ্ধকামুকমাতুরম্
179.6
এহি গচ্ছ ময়া ভীষ্ম যুদ্ধমদ্যৈব বর্ততাম্
গৃহাণ সর্বং কৌরব্য রথাদি ভরতর্ষভ
179.7
ইতি ব্রুবাণং তমহং রামং পরপুরংজয়ম্
প্রণম্য শিরসা রাজন্নেবমস্ত্বিত্যথাব্রুবম্
179.8
এবমুক্ত্বা যয়ৌ রামঃ কুরুক্ষেত্রং যুয়ুত্সয়া
প্রবিশ্য নগরং চাহং সত্যবত্যৈ ন্যবেদয়ম্
179.9
ততঃ কৃতস্বস্ত্যয়নো মাত্রা প্রত্যভিনন্দিতঃ
দ্বিজাতীন্বাচ্য পুণ্যাহং স্বস্তি চৈব মহাদ্যুতে
179.10
রথমাস্থায় রুচিরং রাজতং পাণ্ডুরৈর্হয়ৈঃ
সূপস্করং স্বধিষ্ঠানং বৈয়াঘ্রপরিবারণম্
179.11
উপপন্নং মহাশস্ত্রৈঃ সর্বোপকরণান্বিতম্
তত্কুলীনেন বীরেণ হয়শাস্ত্রবিদা নৃপ
179.12
যুক্তং সূতেন শিষ্টেন বহুশো দৃষ্টকর্মণা
দংশিতঃ পাণ্ডুরেণাহং কবচেন বপুষ্মতা
179.13
পাণ্ডুরং কার্মুকং গৃহ্য প্রায়াং ভরতসত্তম
পাণ্ডুরেণাতপত্রেণ ধ্রিয়মাণেন মূর্ধনি
179.14
পাণ্ডুরৈশ্চামরৈশ্চাপি বীজ্যমানো নরাধিপ
শুক্লবাসাঃ সিতোষ্ণীষঃ সর্বশুক্লবিভূষণঃ
179.15
স্তূয়মানো জয়াশীর্ভির্নিষ্ক্রম্য গজসাহ্বয়াৎ
কুরুক্ষেত্রং রণক্ষেত্রমুপায়াং ভরতর্ষভ
179.16
তে হয়াশ্চোদিতাস্তেন সূতেন পরমাহবে
অবহন্মাং ভৃশং রাজন্মনোমারুতরংহসঃ
179.17
গত্বাহং তত্কুরুক্ষেত্রং স চ রামঃ প্রতাপবান্
যুদ্ধায় সহসা রাজন্পরাক্রান্তৌ পরস্পরম্
179.18
ততঃ সংদর্শনেঽতিষ্ঠং রামস্যাতিতপস্বিনঃ
প্রগৃহ্য শঙ্খপ্রবরং ততঃ প্রাধমমুত্তমম্
179.19
ততস্তত্র দ্বিজা রাজংস্তাপসাশ্চ বনৌকসঃ
অপশ্যন্ত রণং দিব্যং দেবাঃ সর্ষিগণাস্তদা
179.20
ততো দিব্যানি মাল্যানি প্রাদুরাসন্মুহুর্মুহুঃ
বাদিত্রাণি চ দিব্যানি মেঘবৃন্দানি চৈব হ
179.21
ততস্তে তাপসাঃ সর্বে ভার্গবস্যানুয়ায়িনঃ
প্রেক্ষকাঃ সমপদ্যন্ত পরিবার্য রণাজিরম্
179.22
ততো মামব্রবীদ্দেবী সর্বভূতহিতৈষিণী
মাতা স্বরূপিণী রাজন্কিমিদং তে চিকীর্ষিতম্
179.23
গত্বাহং জামদগ্ন্যং তং প্রয়াচিষ্যে কুরূদ্বহ
ভীষ্মেণ সহ মা যোত্সীঃ শিষ্যেণেতি পুনঃ পুনঃ
179.24
মা মৈবং পুত্র নির্বন্ধং কুরু বিপ্রেণ পার্থিব
জামদগ্ন্যেন সমরে যোদ্ধুমিত্যবভর্ত্সয়ৎ
179.25
কিং ন বৈ ক্ষত্রিয়হরো হরতুল্যপরাক্রমঃ
বিদিতঃ পুত্র রামস্তে যতস্ত্বং যোদ্ধুমিচ্ছসি
179.26
ততোঽহমব্রুবং দেবীমভিবাদ্য কৃতাঞ্জলিঃ
সর্বং তদ্ভরতশ্রেষ্ঠ যথাবৃত্তং স্বয়ংবরে
179.27
যথা চ রামো রাজেন্দ্র ময়া পূর্বং প্রসাদিতঃ
কাশিরাজসুতায়াশ্চ যথা কামঃ পুরাতনঃ
179.28
ততঃ সা রামমভ্যেত্য জননী মে মহানদী
মদর্থং তমৃষিং দেবী ক্ষময়ামাস ভার্গবম্
ভীষ্মেণ সহ মা যোত্সীঃ শিষ্যেণেতি বচোঽব্রবীৎ
179.29
স চ তামাহ যাচন্তীং ভীষ্মমেব নিবর্তয়
ন হি মে কুরুতে কামমিত্যহং তমুপাগমম্
179.30
সংজয় উবাচ
ততো গঙ্গা সুতস্নেহাদ্ভীষ্মং পুনরুপাগমৎ
ন চাস্যাঃ সোঽকরোদ্বাক্যং ক্রোধপর্যাকুলেক্ষণঃ
179.31
অথাদৃশ্যত ধর্মাত্মা ভৃগুশ্রেষ্ঠো মহাতপাঃ
আহ্বয়ামাস চ পুনর্যুদ্ধায় দ্বিজসত্তমঃ