Utshovঅধ্যায় 180
180.1
ভীষ্ম উবাচ
তমহং স্ময়ন্নিব রণে প্রত্যভাষং ব্যবস্থিতম্
ভূমিষ্ঠং নোত্সহে যোদ্ধুং ভবন্তং রথমাস্থিতঃ
180.2
আরোহ স্যন্দনং বীর কবচং চ মহাভুজ
বধান সমরে রাম যদি যোদ্ধুং ময়েচ্ছসি
180.3
ততো মামব্রবীদ্রামঃ স্ময়মানো রণাজিরে
রথো মে মেদিনী ভীষ্ম বাহা বেদাঃ সদশ্ববৎ
180.4
সূতো মে মাতরিশ্বা বৈ কবচং বেদমাতরঃ
সুসংবীতো রণে তাভির্যোত্স্যেঽহং কুরুনন্দন
180.5
এবং ব্রুবাণো গান্ধারে রামো মাং সত্যবিক্রমঃ
শরব্রাতেন মহতা সর্বতঃ পর্যবারয়ৎ
180.6
ততোঽপশ্যং জামদগ্ন্যং রথে দিব্যে ব্যবস্থিতম্
সর্বায়ুধধরে শ্রীমত্যদ্ভুতোপমদর্শনে
180.7
মনসা বিহিতে পুণ্যে বিস্তীর্ণে নগরোপমে
দিব্যাশ্বয়ুজি সংনদ্ধে কাঞ্চনেন বিভূষিতে
180.8
ধ্বজেন চ মহাবাহো সোমালংকৃতলক্ষ্মণা
ধনুর্ধরো বদ্ধতূণো বদ্ধগোধাঙ্গুলিত্রবান্
180.9
সারথ্যং কৃতবাংস্তত্র যুয়ুত্সোরকৃতব্রণঃ
সখা বেদবিদত্যন্তং দয়িতো ভার্গবস্য হ
180.10
আহ্বয়ানঃ স মাং যুদ্ধে মনো হর্ষয়তীব মে
পুনঃ পুনরভিক্রোশন্নভিয়াহীতি ভার্গবঃ
180.11
তমাদিত্যমিবোদ্যন্তমনাধৃষ্যং মহাবলম্
ক্ষত্রিয়ান্তকরং রামমেকমেকঃ সমাসদম্
180.12
ততোঽহং বাণপাতেষু ত্রিষু বাহান্নিগৃহ্য বৈ
অবতীর্য ধনুর্ন্যস্য পদাতিরৃষিসত্তমম্
180.13
অভ্যগচ্ছং তদা রামমর্চিষ্যন্দ্বিজসত্তমম্
অভিবাদ্য চৈনং বিধিবদব্রুবং বাক্যমুত্তমম্
180.14
যোত্স্যে ত্বয়া রণে রাম বিশিষ্টেনাধিকেন চ
গুরুণা ধর্মশীলেন জয়মাশাস্স্ব মে বিভো
180.15
রাম উবাচ
এবমেতত্কুরুশ্রেষ্ঠ কর্তব্যং ভূতিমিচ্ছতা
ধর্মো হ্যেষ মহাবাহো বিশিষ্টৈঃ সহ যুধ্যতাম্
180.16
শপেয়ং ত্বাং ন চেদেবমাগচ্ছেথা বিশাং পতে
যুধ্যস্ব ত্বং রণে যত্তো ধৈর্যমালম্ব্য কৌরব
180.17
ন তু তে জয়মাশাসে ত্বাং হি জেতুমহং স্থিতঃ
গচ্ছ যুধ্যস্ব ধর্মেণ প্রীতোঽস্মি চরিতেন তে
180.18
ভীষ্ম উবাচ
ততোঽহং তং নমস্কৃত্য রথমারুহ্য সত্বরঃ
প্রাধ্মাপয়ং রণে শঙ্খং পুনর্হেমবিভূষিতম্
180.19
ততো যুদ্ধং সমভবন্মম তস্য চ ভারত
দিবসান্সুবহূন্রাজন্পরস্পরজিগীষয়া
180.20
স মে তস্মিন্রণে পূর্বং প্রাহরত্কঙ্কপত্রিভিঃ
ষষ্ট্যা শতৈশ্চ নবভিঃ শরাণামগ্নিবর্চসাম্
180.21
চত্বারস্তেন মে বাহাঃ সূতশ্চৈব বিশাং পতে
প্রতিরুদ্ধাস্তথৈবাহং সমরে দংশিতঃ স্থিতঃ
180.22
নমস্কৃত্য চ দেবেভ্যো ব্রাহ্মণেভ্যশ্চ ভারত
তমহং স্ময়ন্নিব রণে প্রত্যভাষং ব্যবস্থিতম্
180.23
আচার্যতা মানিতা মে নির্মর্যাদে হ্যপি ত্বয়ি
ভূয়স্তু শৃণু মে ব্রহ্মন্সংপদং ধর্মসংগ্রহে
180.24
যে তে বেদাঃ শরীরস্থা ব্রাহ্মণ্যং যচ্চ তে মহৎ
তপশ্চ সুমহত্তপ্তং ন তেভ্যঃ প্রহরাম্যহম্
180.25
প্রহরে ক্ষত্রধর্মস্য যং ত্বং রাম সমাস্থিতঃ
ব্রাহ্মণঃ ক্ষত্রিয়ত্বং হি যাতি শস্ত্রসমুদ্যমাৎ
180.26
পশ্য মে ধনুষো বীর্যং পশ্য বাহ্বোর্বলং চ মে
এষ তে কার্মুকং বীর দ্বিধা কুর্মি সসায়কম্
180.27
তস্যাহং নিশিতং ভল্লং প্রাহিণ্বং ভরতর্ষভ
তেনাস্য ধনুষঃ কোটিশ্ছিন্না ভূমিমথাগমৎ
180.28
নব চাপি পৃষত্কানাং শতানি নতপর্বণাম্
প্রাহিণ্বং কঙ্কপত্রাণাং জামদগ্ন্যরথং প্রতি
180.29
কায়ে বিষক্তাস্তু তদা বায়ুনাভিসমীরিতাঃ
চেলুঃ ক্ষরন্তো রুধিরং নাগা ইব চ তে শরাঃ
180.30
ক্ষতজোক্ষিতসর্বাঙ্গঃ ক্ষরন্স রুধিরং ব্রণৈঃ
বভৌ রামস্তদা রাজন্মেরুর্ধাতূনিবোত্সৃজন্
180.31
হেমন্তান্তেঽশোক ইব রক্তস্তবকমণ্ডিতঃ
বভৌ রামস্তদা রাজন্ক্বচিত্কিংশুকসংনিভঃ
180.32
ততোঽন্যদ্ধনুরাদায় রামঃ ক্রোধসমন্বিতঃ
হেমপুঙ্খান্সুনিশিতাঞ্শরাংস্তান্হি ববর্ষ সঃ
180.33
তে সমাসাদ্য মাং রৌদ্রা বহুধা মর্মভেদিনঃ
অকম্পয়ন্মহাবেগাঃ সর্পানলবিষোপমাঃ
180.34
ততোঽহং সমবষ্টভ্য পুনরাত্মানমাহবে
শতসংখ্যৈঃ শরৈঃ ক্রুদ্ধস্তদা রামমবাকিরম্
180.35
স তৈরগ্ন্যর্কসংকাশৈঃ শরৈরাশীবিষোপমৈঃ
শিতৈরভ্যর্দিতো রামো মন্দচেতা ইবাভবৎ
180.36
ততোঽহং কৃপয়াবিষ্টো বিনিন্দ্যাত্মানমাত্মনা
ধিগ্ধিগিত্যব্রুবং যুদ্ধং ক্ষত্রং চ ভরতর্ষভ
180.37
অসকৃচ্চাব্রুবং রাজঞ্শোকবেগপরিপ্লুতঃ
অহো বত কৃতং পাপং ময়েদং ক্ষত্রকর্মণা
180.38
গুরুর্দ্বিজাতির্ধর্মাত্মা যদেবং পীডিতঃ শরৈঃ
ততো ন প্রাহরং ভূয়ো জামদগ্ন্যায় ভারত
180.39
অথাবতাপ্য পৃথিবীং পূষা দিবসসংক্ষয়ে
জগামাস্তং সহস্রাংশুস্ততো যুদ্ধমুপারমৎ