Utshovঅধ্যায় 181
181.1
ভীষ্ম উবাচ
আত্মনস্তু ততঃ সূতো হয়ানাং চ বিশাং পতে
মম চাপনয়ামাস শল্যান্কুশলসংমতঃ
181.2
স্নাতোপবৃত্তৈস্তুরগৈর্লব্ধতোয়ৈরবিহ্বলৈঃ
প্রভাত উদিতে সূর্যে ততো যুদ্ধমবর্তত
181.3
দৃষ্ট্বা মাং তূর্ণমায়ান্তং দংশিতং স্যন্দনে স্থিতম্
অকরোদ্রথমত্যর্থং রামঃ সজ্জং প্রতাপবান্
181.4
ততোঽহং রামমায়ান্তং দৃষ্ট্বা সমরকাঙ্ক্ষিণম্
ধনুঃশ্রেষ্ঠং সমুত্সৃজ্য সহসাবতরং রথাৎ
181.5
অভিবাদ্য তথৈবাহং রথমারুহ্য ভারত
যুয়ুত্সুর্জামদগ্ন্যস্য প্রমুখে বীতভীঃ স্থিতঃ
181.6
ততো মাং শরবর্ষেণ মহতা সমবাকিরৎ
অহং চ শরবর্ষেণ বর্ষন্তং সমবাকিরম্
181.7
সংক্রুদ্ধো জামদগ্ন্যস্তু পুনরেব পতত্রিণঃ
প্রেষয়ামাস মে রাজন্দীপ্তাস্যানুরগানিব
181.8
তানহং নিশিতৈর্ভল্লৈঃ শতশোঽথ সহস্রশঃ
অচ্ছিদং সহসা রাজন্নন্তরিক্ষে পুনঃ পুনঃ
181.9
ততস্ত্বস্ত্রাণি দিব্যানি জামদগ্ন্যঃ প্রতাপবান্
ময়ি প্রচোদয়ামাস তান্যহং প্রত্যষেধয়ম্
181.10
অস্ত্রৈরেব মহাবাহো চিকীর্ষন্নধিকাং ক্রিয়াম্
ততো দিবি মহান্নাদঃ প্রাদুরাসীত্সমন্ততঃ
181.11
ততোঽহমস্ত্রং বায়ব্যং জামদগ্ন্যে প্রয়ুক্তবান্
প্রত্যাজঘ্নে চ তদ্রামো গুহ্যকাস্ত্রেণ ভারত
181.12
ততোঽস্ত্রমহমাগ্নেয়মনুমন্ত্র্য প্রয়ুক্তবান্
বারুণেনৈব রামস্তদ্বারয়ামাস মে বিভুঃ
181.13
এবমস্ত্রাণি দিব্যানি রামস্যাহমবারয়ম্
রামশ্চ মম তেজস্বী দিব্যাস্ত্রবিদরিংদমঃ
181.14
ততো মাং সব্যতো রাজন্রামঃ কুর্বন্দ্বিজোত্তমঃ
উরস্যবিধ্যত্সংক্রুদ্ধো জামদগ্ন্যো মহাবলঃ
181.15
ততোঽহং ভরতশ্রেষ্ঠ সংন্যষীদং রথোত্তমে
অথ মাং কশ্মলাবিষ্টং সূতস্তূর্ণমপাবহৎ
গোরুতং ভরতশ্রেষ্ঠ রামবাণপ্রপীডিতম্
181.16
ততো মামপয়াতং বৈ ভৃশং বিদ্ধমচেতসম্
রামস্যানুচরা হৃষ্টাঃ সর্বে দৃষ্ট্বা প্রচুক্রুশুঃ
অকৃতব্রণপ্রভৃতয়ঃ কাশিকন্যা চ ভারত
181.17
ততস্তু লব্ধসংজ্ঞোঽহং জ্ঞাত্বা সূতমথাব্রুবম্
যাহি সূত যতো রামঃ সজ্জোঽহং গতবেদনঃ
181.18
ততো মামবহত্সূতো হয়ৈঃ পরমশোভিতৈঃ
নৃত্যদ্ভিরিব কৌরব্য মারুতপ্রতিমৈর্গতৌ
181.19
ততোঽহং রামমাসাদ্য বাণজালেন কৌরব
অবাকিরং সুসংরব্ধঃ সংরব্ধং বিজিগীষয়া
181.20
তানাপতত এবাসৌ রামো বাণানজিহ্মগান্
বাণৈরেবাচ্ছিনত্তূর্ণমেকৈকং ত্রিভিরাহবে
181.21
ততস্তে মৃদিতাঃ সর্বে মম বাণাঃ সুসংশিতাঃ
রামবাণৈর্দ্বিধা ছিন্নাঃ শতশোঽথ মহাহবে
181.22
ততঃ পুনঃ শরং দীপ্তং সুপ্রভং কালসংমিতম্
অসৃজং জামদগ্ন্যায় রামায়াহং জিঘাংসয়া
181.23
তেন ত্বভিহতো গাঢং বাণচ্ছেদবশং গতঃ
মুমোহ সহসা রামো ভূমৌ চ নিপপাত হ
181.24
ততো হাহাকৃতং সর্বং রামে ভূতলমাশ্রিতে
জগদ্ভারত সংবিগ্নং যথার্কপতনেঽভবৎ
181.25
তত এনং সুসংবিগ্নাঃ সর্ব এবাভিদুদ্রুবুঃ
তপোধনাস্তে সহসা কাশ্যা চ ভৃগুনন্দনম্
181.26
ত এনং সংপরিষ্বজ্য শনৈরাশ্বাসয়ংস্তদা
পাণিভির্জলশীতৈশ্চ জয়াশীর্ভিশ্চ কৌরব
181.27
ততঃ স বিহ্বলো বাক্যং রাম উত্থায় মাব্রবীৎ
তিষ্ঠ ভীষ্ম হতোঽসীতি বাণং সংধায় কার্মুকে
181.28
স মুক্তো ন্যপতত্তূর্ণং পার্শ্বে সব্যে মহাহবে
যেনাহং ভৃশসংবিগ্নো ব্যাঘূর্ণিত ইব দ্রুমঃ
181.29
হত্বা হয়াংস্ততো রাজঞ্শীঘ্রাস্ত্রেণ মহাহবে
অবাকিরন্মাং বিশ্রব্ধো বাণৈস্তৈর্লোমবাহিভিঃ
181.30
ততোঽহমপি শীঘ্রাস্ত্রং সমরেঽপ্রতিবারণম্
অবাসৃজং মহাবাহো তেঽন্তরাধিষ্ঠিতাঃ শরাঃ
রামস্য মম চৈবাশু ব্যোমাবৃত্য সমন্ততঃ
181.31
ন স্ম সূর্যঃ প্রতপতি শরজালসমাবৃতঃ
মাতরিশ্বান্তরে তস্মিন্মেঘরুদ্ধ ইবানদৎ
181.32
ততো বায়োঃ প্রকম্পাচ্চ সূর্যস্য চ মরীচিভিঃ
অভিতাপাত্স্বভাবাচ্চ পাবকঃ সমজায়ত
181.33
তে শরাঃ স্বসমুত্থেন প্রদীপ্তাশ্চিত্রভানুনা
ভূমৌ সর্বে তদা রাজন্ভস্মভূতাঃ প্রপেদিরে
181.34
তদা শতসহস্রাণি প্রয়ুতান্যর্বুদানি চ
অয়ুতান্যথ খর্বাণি নিখর্বাণি চ কৌরব
রামঃ শরাণাং সংক্রুদ্ধো ময়ি তূর্ণমপাতয়ৎ
181.35
ততোঽহং তানপি রণে শরৈরাশীবিষোপমৈঃ
সংছিদ্য ভূমৌ নৃপতেঽপাতয়ং পন্নগানিব
181.36
এবং তদভবদ্যুদ্ধং তদা ভরতসত্তম
সংধ্যাকালে ব্যতীতে তু ব্যপায়াত্স চ মে গুরুঃ