অধ্যায় 182

182.1

ভীষ্ম উবাচ
সমাগতস্য রামেণ পুনরেবাতিদারুণম্
অন্যেদ্যুস্তুমুলং যুদ্ধং তদা ভরতসত্তম

ততো দিব্যাস্ত্রবিচ্ছূরো দিব্যান্যস্ত্রাণ্যনেকশঃ
অয়োজয়ত ধর্মাত্মা দিবসে দিবসে বিভুঃ

তান্যহং তত্প্রতীঘাতৈরস্ত্রৈরস্ত্রাণি ভারত
ব্যধমং তুমুলে যুদ্ধে প্রাণাংস্ত্যক্ত্বা সুদুস্ত্যজান্

অস্ত্রৈরস্ত্রেষু বহুধা হতেষ্বথ চ ভার্গবঃ
অক্রুধ্যত মহাতেজাস্ত্যক্তপ্রাণঃ স সংয়ুগে

ততঃ শক্তিং প্রাহিণোদ্ঘোররূপা;মস্ত্রৈ রুদ্ধো জামদগ্ন্যো মহাত্মা
কালোত্সৃষ্টাং প্রজ্বলিতামিবোল্কাং; সংদীপ্তাগ্রাং তেজসাবৃত্য লোকান্

ততোঽহং তামিষুভির্দীপ্যমানৈঃ; সমায়ান্তীমন্তকালার্কদীপ্তাম্
ছিত্ত্বা ত্রিধা পাতয়ামাস ভূমৌ; ততো ববৌ পবনঃ পুণ্যগন্ধিঃ

তস্যাং ছিন্নায়াং ক্রোধদীপ্তোঽথ রামঃ; শক্তীর্ঘোরাঃ প্রাহিণোদ্দ্বাদশান্যাঃ
তাসাং রূপং ভারত নোত শক্যং; তেজস্বিত্বাল্লাঘবাচ্চৈব বক্তুম্

কিং ত্বেবাহং বিহ্বলঃ সংপ্রদৃশ্য; দিগ্ভ্যঃ সর্বাস্তা মহোল্কা ইবাগ্নেঃ
নানারূপাস্তেজসোগ্রেণ দীপ্তা; যথাদিত্যা দ্বাদশ লোকসংক্ষয়ে

ততো জালং বাণময়ং বিবৃত্য; সংদৃশ্য ভিত্ত্বা শরজালেন রাজন্
দ্বাদশেষূন্প্রাহিণবং রণেঽহং; ততঃ শক্তীর্ব্যধমং ঘোররূপাঃ

ততোঽপরা জামদগ্ন্যো মহাত্মা; শক্তীর্ঘোরাঃ প্রাক্ষিপদ্ধেমদণ্ডাঃ
বিচিত্রিতাঃ কাঞ্চনপট্টনদ্ধা; যথা মহোল্কা জ্বলিতাস্তথা তাঃ

তাশ্চাপ্যুগ্রাশ্চর্মণা বারয়িত্বা; খড্গেনাজৌ পাতিতা মে নরেন্দ্র
বাণৈর্দিব্যৈর্জামদগ্ন্যস্য সংখ্যে; দিব্যাংশ্চাশ্বানভ্যবর্ষং সসূতান্

নির্মুক্তানাং পন্নগানাং সরূপা; দৃষ্ট্বা শক্তীর্হেমচিত্রা নিকৃত্তাঃ
প্রাদুশ্চক্রে দিব্যমস্ত্রং মহাত্মা; ক্রোধাবিষ্টো হৈহয়েশপ্রমাথী

ততঃ শ্রেণ্যঃ শলভানামিবোগ্রাঃ; সমাপেতুর্বিশিখানাং প্রদীপ্তাঃ
সমাচিনোচ্চাপি ভৃশং শরীরং; হয়ান্সূতং সরথং চৈব মহ্যম্

রথঃ শরৈর্মে নিচিতঃ সর্বতোঽভূ;ত্তথা হয়াঃ সারথিশ্চৈব রাজন্
যুগং রথেষা চ তথৈব চক্রে; তথৈবাক্ষঃ শরকৃত্তোঽথ ভগ্নঃ

ততস্তস্মিন্বাণবর্ষে ব্যতীতে; শরৌঘেণ প্রত্যবর্ষং গুরুং তম্
স বিক্ষতো মার্গণৈর্ব্রহ্মরাশি;র্দেহাদজস্রং মুমুচে ভূরি রক্তম্

যথা রামো বাণজালাভিতপ্ত;স্তথৈবাহং সুভৃশং গাঢবিদ্ধঃ
ততো যুদ্ধং ব্যরমচ্চাপরাহ্ণে; ভানাবস্তং প্রার্থয়ানে মহীধ্রম্