Utshovঅধ্যায় 183
183.1
ভীষ্ম উবাচ
ততঃ প্রভাতে রাজেন্দ্র সূর্যে বিমল উদ্গতে
ভার্গবস্য ময়া সার্ধং পুনর্যুদ্ধমবর্তত
183.2
ততো ভ্রান্তে রথে তিষ্ঠন্রামঃ প্রহরতাং বরঃ
ববর্ষ শরবর্ষাণি ময়ি শক্র ইবাচলে
183.3
তেন সূতো মম সুহৃচ্ছরবর্ষেণ তাডিতঃ
নিপপাত রথোপস্থে মনো মম বিষাদয়ন্
183.4
ততঃ সূতঃ স মেঽত্যর্থং কশ্মলং প্রাবিশন্মহৎ
পৃথিব্যাং চ শরাঘাতান্নিপপাত মুমোহ চ
183.5
ততঃ সূতোঽজহাত্প্রাণান্রামবাণপ্রপীডিতঃ
মুহূর্তাদিব রাজেন্দ্র মাং চ ভীরাবিশত্তদা
183.6
ততঃ সূতে হতে রাজন্ক্ষিপতস্তস্য মে শরান্
প্রমত্তমনসো রামঃ প্রাহিণোন্মৃত্যুসংমিতান্
183.7
ততঃ সূতব্যসনিনং বিপ্লুতং মাং স ভার্গবঃ
শরেণাভ্যহনদ্গাঢং বিকৃষ্য বলবদ্ধনুঃ
183.8
স মে জত্র্বন্তরে রাজন্নিপত্য রুধিরাশনঃ
ময়ৈব সহ রাজেন্দ্র জগাম বসুধাতলম্
183.9
মত্বা তু নিহতং রামস্ততো মাং ভরতর্ষভ
মেঘবদ্ব্যনদচ্চোচ্চৈর্জহৃষে চ পুনঃ পুনঃ
183.10
তথা তু পতিতে রাজন্ময়ি রামো মুদা যুতঃ
উদক্রোশন্মহানাদং সহ তৈরনুয়ায়িভিঃ
183.11
মম তত্রাভবন্যে তু কৌরবাঃ পার্শ্বতঃ স্থিতাঃ
আগতা যে চ যুদ্ধং তজ্জনাস্তত্র দিদৃক্ষবঃ
আর্তিং পরমিকাং জগ্মুস্তে তদা ময়ি পাতিতে
183.12
ততোঽপশ্যং পাতিতো রাজসিংহ; দ্বিজানষ্টৌ সূর্যহুতাশনাভান্
তে মাং সমন্তাত্পরিবার্য তস্থুঃ; স্ববাহুভিঃ পরিগৃহ্যাজিমধ্যে
183.13
রক্ষ্যমাণশ্চ তৈর্বিপ্রৈর্নাহং ভূমিমুপাস্পৃশম্
অন্তরিক্ষে স্থিতো হ্যস্মি তৈর্বিপ্রৈর্বান্ধবৈরিব
স্বপন্নিবান্তরিক্ষে চ জলবিন্দুভিরুক্ষিতঃ
183.14
ততস্তে ব্রাহ্মণা রাজন্নব্রুবন্পরিগৃহ্য মাম্
মা ভৈরিতি সমং সর্বে স্বস্তি তেঽস্ত্বিতি চাসকৃৎ
183.15
ততস্তেষামহং বাগ্ভিস্তর্পিতঃ সহসোত্থিতঃ
মাতরং সরিতাং শ্রেষ্ঠামপশ্যং রথমাস্থিতাম্
183.16
হয়াশ্চ মে সংগৃহীতাস্তয়া বৈ; মহানদ্যা সংয়তি কৌরবেন্দ্র
পাদৌ জনন্যাঃ প্রতিপূজ্য চাহং; তথার্ষ্টিষেণং রথমভ্যরোহম্
183.17
ররক্ষ সা মম রথং হয়াংশ্চোপস্করাণি চ
তামহং প্রাঞ্জলির্ভূত্বা পুনরেব ব্যসর্জয়ম্
183.18
ততোঽহং স্বয়মুদ্যম্য হয়াংস্তান্বাতরংহসঃ
অয়ুধ্যং জামদগ্ন্যেন নিবৃত্তেঽহনি ভারত
183.19
ততোঽহং ভরতশ্রেষ্ঠ বেগবন্তং মহাবলম্
অমুঞ্চং সমরে বাণং রামায় হৃদয়চ্ছিদম্
183.20
ততো জগাম বসুধাং বাণবেগপ্রপীডিতঃ
জানুভ্যাং ধনুরুত্সৃজ্য রামো মোহবশং গতঃ
183.21
ততস্তস্মিন্নিপতিতে রামে ভূরিসহস্রদে
আবব্রুর্জলদা ব্যোম ক্ষরন্তো রুধিরং বহু
183.22
উল্কাশ্চ শতশঃ পেতুঃ সনির্ঘাতাঃ সকম্পনাঃ
অর্কং চ সহসা দীপ্তং স্বর্ভানুরভিসংবৃণোৎ
183.23
ববুশ্চ বাতাঃ পরুষাশ্চলিতা চ বসুংধরা
গৃধ্রা বডাশ্চ কঙ্কাশ্চ পরিপেতুর্মুদা যুতাঃ
183.24
দীপ্তায়াং দিশি গোমায়ুর্দারুণং মুহুরুন্নদৎ
অনাহতা দুন্দুভয়ো বিনেদুর্ভৃশনিস্বনাঃ
183.25
এতদৌত্পাতিকং ঘোরমাসীদ্ভরতসত্তম
বিসংজ্ঞকল্পে ধরণীং গতে রামে মহাত্মনি
183.26
ততো রবির্মন্দমরীচিমণ্ডলো; জগামাস্তং পাংসুপুঞ্জাবগাঢঃ
নিশা ব্যগাহত্সুখশীতমারুতা; ততো যুদ্ধং প্রত্যবহারয়াবঃ
183.27
এবং রাজন্নবহারো বভূব; ততঃ পুনর্বিমলেঽভূত্সুঘোরম্
কাল্যং কাল্যং বিংশতিং বৈ দিনানি; তথৈব চান্যানি দিনানি ত্রীণি