অধ্যায় 184

184.1

ভীষ্ম উবাচ
ততোঽহং নিশি রাজেন্দ্র প্রণম্য শিরসা তদা
ব্রাহ্মণানাং পিতৄণাং চ দেবতানাং চ সর্বশঃ

নক্তংচরাণাং ভূতানাং রজন্যাশ্চ বিশাং পতে
শয়নং প্রাপ্য রহিতে মনসা সমচিন্তয়ম্

জামদগ্ন্যেন মে যুদ্ধমিদং পরমদারুণম্
অহানি সুবহূন্যদ্য বর্ততে সুমহাত্যয়ম্

ন চ রামং মহাবীর্যং শক্নোমি রণমূর্ধনি
বিজেতুং সমরে বিপ্রং জামদগ্ন্যং মহাবলম্

যদি শক্যো ময়া জেতুং জামদগ্ন্যঃ প্রতাপবান্
দৈবতানি প্রসন্নানি দর্শয়ন্তু নিশাং মম

ততোঽহং নিশি রাজেন্দ্র প্রসুপ্তঃ শরবিক্ষতঃ
দক্ষিণেনৈব পার্শ্বেন প্রভাতসময়ে ইব

ততোঽহং বিপ্রমুখ্যৈস্তৈর্যৈরস্মি পতিতো রথাৎ
উত্থাপিতো ধৃতশ্চৈব মা ভৈরিতি চ সান্ত্বিতঃ

ত এব মাং মহারাজ স্বপ্নদর্শনমেত্য বৈ
পরিবার্যাব্রুবন্বাক্যং তন্নিবোধ কুরূদ্বহ

উত্তিষ্ঠ মা ভৈর্গাঙ্গেয় ভয়ং তে নাস্তি কিংচন
রক্ষামহে নরব্যাঘ্র স্বশরীরং হি নো ভবান্

ন ত্বাং রামো রণে জেতা জামদগ্ন্যঃ কথংচন
ত্বমেব সমরে রামং বিজেতা ভরতর্ষভ

ইদমস্ত্রং সুদয়িতং প্রত্যভিজ্ঞাস্যতে ভবান্
বিদিতং হি তবাপ্যেতত্পূর্বস্মিন্দেহধারণে

প্রাজাপত্যং বিশ্বকৃতং প্রস্বাপং নাম ভারত
ন হীদং বেদ রামোঽপি পৃথিব্যাং বা পুমান্ক্বচিৎ

তত্স্মরস্ব মহাবাহো ভৃশং সংয়োজয়স্ব চ
ন চ রামঃ ক্ষয়ং গন্তা তেনাস্ত্রেণ নরাধিপ

এনসা চ ন যোগং ত্বং প্রাপ্স্যসে জাতু মানদ
স্বপ্স্যতে জামদগ্ন্যোঽসৌ ত্বদ্বাণবলপীডিতঃ

ততো জিত্বা ত্বমেবৈনং পুনরুত্থাপয়িষ্যসি
অস্ত্রেণ দয়িতেনাজৌ ভীষ্ম সংবোধনেন বৈ

এবং কুরুষ্ব কৌরব্য প্রভাতে রথমাস্থিতঃ
প্রসুপ্তং বা মৃতং বাপি তুল্যং মন্যামহে বয়ম্

ন চ রামেণ মর্তব্যং কদাচিদপি পার্থিব
ততঃ সমুত্পন্নমিদং প্রস্বাপং যুজ্যতামিতি

ইত্যুক্ত্বান্তর্হিতা রাজন্সর্ব এব দ্বিজোত্তমাঃ
অষ্টৌ সদৃশরূপাস্তে সর্বে ভাস্বরমূর্তয়ঃ