অধ্যায় 185

185.1

ভীষ্ম উবাচ
ততো রাত্র্যাং ব্যতীতায়াং প্রতিবুদ্ধোঽস্মি ভারত
তং চ সংচিন্ত্য বৈ স্বপ্নমবাপং হর্ষমুত্তমম্

ততঃ সমভবদ্যুদ্ধং মম তস্য চ ভারত
তুমুলং সর্বভূতানাং লোমহর্ষণমদ্ভুতম্

ততো বাণময়ং বর্ষং ববর্ষ ময়ি ভার্গবঃ
ন্যবারয়মহং তং চ শরজালেন ভারত

ততঃ পরমসংক্রুদ্ধঃ পুনরেব মহাতপাঃ
হ্যস্তনেনৈব কোপেন শক্তিং বৈ প্রাহিণোন্ময়ি

ইন্দ্রাশনিসমস্পর্শাং যমদণ্ডোপমপ্রভাম্
জ্বলন্তীমগ্নিবত্সংখ্যে লেলিহানাং সমন্ততঃ

ততো ভরতশার্দূল ধিষ্ণ্যমাকাশগং যথা
সা মামভ্যহনত্তূর্ণমংসদেশে চ ভারত

অথাসৃঙ্মেঽস্রবদ্ঘোরং গিরের্গৈরিকধাতুবৎ
রামেণ সুমহাবাহো ক্ষতস্য ক্ষতজেক্ষণ

ততোঽহং জামদগ্ন্যায় ভৃশং ক্রোধসমন্বিতঃ
প্রেষয়ং মৃত্যুসংকাশং বাণং সর্পবিষোপমম্

স তেনাভিহতো বীরো ললাটে দ্বিজসত্তমঃ
অশোভত মহারাজ সশৃঙ্গ ইব পর্বতঃ

স সংরব্ধঃ সমাবৃত্য বাণং কালান্তকোপমম্
সংদধে বলবত্কৃষ্য ঘোরং শত্রুনিবর্হণম্

স বক্ষসি পপাতোগ্রঃ শরো ব্যাল ইব শ্বসন্
মহীং রাজংস্ততশ্চাহমগচ্ছং রুধিরাবিলঃ

অবাপ্য তু পুনঃ সংজ্ঞাং জামদগ্ন্যায় ধীমতে
প্রাহিণ্বং বিমলাং শক্তিং জ্বলন্তীমশনীমিব

সা তস্য দ্বিজমুখ্যস্য নিপপাত ভুজান্তরে
বিহ্বলশ্চাভবদ্রাজন্বেপথুশ্চৈনমাবিশৎ

তত এনং পরিষ্বজ্য সখা বিপ্রো মহাতপাঃ
অকৃতব্রণঃ শুভৈর্বাক্যৈরাশ্বাসয়দনেকধা

সমাশ্বস্তস্তদা রামঃ ক্রোধামর্ষসমন্বিতঃ
প্রাদুশ্চক্রে তদা ব্রাহ্মং পরমাস্ত্রং মহাব্রতঃ

ততস্তত্প্রতিঘাতার্থং ব্রাহ্মমেবাস্ত্রমুত্তমম্
ময়া প্রয়ুক্তং জজ্বাল যুগান্তমিব দর্শয়ৎ

তয়োর্ব্রহ্মাস্ত্রয়োরাসীদন্তরা বৈ সমাগমঃ
অসংপ্রাপ্যৈব রামং চ মাং চ ভারতসত্তম

ততো ব্যোম্নি প্রাদুরভূত্তেজ এব হি কেবলম্
ভূতানি চৈব সর্বাণি জগ্মুরার্তিং বিশাং পতে

ঋষয়শ্চ সগন্ধর্বা দেবতাশ্চৈব ভারত
সংতাপং পরমং জগ্মুরস্ত্রতেজোভিপীডিতাঃ

ততশ্চচাল পৃথিবী সপর্বতবনদ্রুমা
সংতপ্তানি চ ভূতানি বিষাদং জগ্মুরুত্তমম্

প্রজজ্বাল নভো রাজন্ধূমায়ন্তে দিশো দশ
ন স্থাতুমন্তরিক্ষে চ শেকুরাকাশগাস্তদা

ততো হাহাকৃতে লোকে সদেবাসুররাক্ষসে
ইদমন্তরমিত্যেব যোক্তুকামোঽস্মি ভারত

প্রস্বাপমস্ত্রং দয়িতং বচনাদ্ব্রহ্মবাদিনাম্
চিন্তিতং চ তদস্ত্রং মে মনসি প্রত্যভাত্তদা