Utshovঅধ্যায় 186
186.1
ভীষ্ম উবাচ
ততো হলহলাশব্দো দিবি রাজন্মহানভূৎ
প্রস্বাপং ভীষ্ম মা স্রাক্ষীরিতি কৌরবনন্দন
186.2
অয়ুঞ্জমেব চৈবাহং তদস্ত্রং ভৃগুনন্দনে
প্রস্বাপং মাং প্রয়ুঞ্জানং নারদো বাক্যমব্রবীৎ
186.3
এতে বিয়তি কৌরব্য দিবি দেবগণাঃ স্থিতাঃ
তে ত্বাং নিবারয়ন্ত্যদ্য প্রস্বাপং মা প্রয়োজয়
186.4
রামস্তপস্বী ব্রহ্মণ্যো ব্রাহ্মণশ্চ গুরুশ্চ তে
তস্যাবমানং কৌরব্য মা স্ম কার্ষীঃ কথংচন
186.5
ততোঽপশ্যং দিবিষ্ঠান্বৈ তানষ্টৌ ব্রহ্মবাদিনঃ
তে মাং স্ময়ন্তো রাজেন্দ্র শনকৈরিদমব্রুবন্
186.6
যথাহ ভরতশ্রেষ্ঠ নারদস্তত্তথা কুরু
এতদ্ধি পরমং শ্রেয়ো লোকানাং ভরতর্ষভ
186.7
ততশ্চ প্রতিসংহৃত্য তদস্ত্রং স্বাপনং মৃধে
ব্রহ্মাস্ত্রং দীপয়াং চক্রে তস্মিন্যুধি যথাবিধি
186.8
ততো রামো রুষিতো রাজপুত্র; দৃষ্ট্বা তদস্ত্রং বিনিবর্তিতং বৈ
জিতোঽস্মি ভীষ্মেণ সুমন্দবুদ্ধি;রিত্যেব বাক্যং সহসা ব্যমুঞ্চৎ
186.9
ততোঽপশ্যত্পিতরং জামদগ্ন্যঃ; পিতুস্তথা পিতরং তস্য চান্যম্
ত এবৈনং সংপরিবার্য তস্থু;রূচুশ্চৈনং সান্ত্বপূর্বং তদানীম্
186.10
মা স্মৈবং সাহসং বত্স পুনঃ কার্ষীঃ কথংচন
ভীষ্মেণ সংয়ুগং গন্তুং ক্ষত্রিয়েণ বিশেষতঃ
186.11
ক্ষত্রিয়স্য তু ধর্মোঽয়ং যদ্যুদ্ধং ভৃগুনন্দন
স্বাধ্যায়ো ব্রতচর্যা চ ব্রাহ্মণানাং পরং ধনম্
186.12
ইদং নিমিত্তে কস্মিংশ্চিদস্মাভিরুপমন্ত্রিতম্
শস্ত্রধারণমত্যুগ্রং তচ্চ কার্যং কৃতং ত্বয়া
186.13
বত্স পর্যাপ্তমেতাবদ্ভীষ্মেণ সহ সংয়ুগে
বিমর্দস্তে মহাবাহো ব্যপয়াহি রণাদিতঃ
186.14
পর্যাপ্তমেতদ্ভদ্রং তে তব কার্মুকধারণম্
বিসর্জয়ৈতদ্দুর্ধর্ষ তপস্তপ্যস্ব ভার্গব
186.15
এষ ভীষ্মঃ শাংতনবো দেবৈঃ সর্বৈর্নিবারিতঃ
নিবর্তস্ব রণাদস্মাদিতি চৈব প্রচোদিতঃ
186.16
রামেণ সহ মা যোত্সীর্গুরুণেতি পুনঃ পুনঃ
ন হি রামো রণে জেতুং ত্বয়া ন্যায্যঃ কুরূদ্বহ
মানং কুরুষ্ব গাঙ্গেয় ব্রাহ্মণস্য রণাজিরে
186.17
বয়ং তু গুরবস্তুভ্যং ততস্ত্বাং বারয়ামহে
ভীষ্মো বসূনামন্যতমো দিষ্ট্যা জীবসি পুত্রক
186.18
গাঙ্গেয়ঃ শংতনোঃ পুত্রো বসুরেষ মহায়শাঃ
কথং ত্বয়া রণে জেতুং রাম শক্যো নিবর্ত বৈ
186.19
অর্জুনঃ পাণ্ডবশ্রেষ্ঠঃ পুরংদরসুতো বলী
নরঃ প্রজাপতির্বীরঃ পূর্বদেবঃ সনাতনঃ
186.20
সব্যসাচীতি বিখ্যাতস্ত্রিষু লোকেষু বীর্যবান্
ভীষ্মমৃত্যুর্যথাকালং বিহিতো বৈ স্বয়ংভুবা
186.21
এবমুক্তঃ স পিতৃভিঃ পিতৄন্রামোঽব্রবীদিদম্
নাহং যুধি নিবর্তেয়মিতি মে ব্রতমাহিতম্
186.22
ন নিবর্তিতপূর্বং চ কদাচিদ্রণমূর্ধনি
নিবর্ত্যতামাপগেয়ঃ কামং যুদ্ধাত্পিতামহাঃ
ন ত্বহং বিনিবর্তিষ্যে যুদ্ধাদস্মাত্কথংচন
186.23
ততস্তে মুনয়ো রাজন্নৃচীকপ্রমুখাস্তদা
নারদেনৈব সহিতাঃ সমাগম্যেদমব্রুবন্
186.24
নিবর্তস্ব রণাত্তাত মানয়স্ব দ্বিজোত্তমান্
নেত্যবোচমহং তাংশ্চ ক্ষত্রধর্মব্যপেক্ষয়া
186.25
মম ব্রতমিদং লোকে নাহং যুদ্ধাত্কথংচন
বিমুখো বিনিবর্তেয়ং পৃষ্ঠতোঽভ্যাহতঃ শরৈঃ
186.26
নাহং লোভান্ন কার্পণ্যান্ন ভয়ান্নার্থকারণাৎ
ত্যজেয়ং শাশ্বতং ধর্মমিতি মে নিশ্চিতা মতিঃ
186.27
ততস্তে মুনয়ঃ সর্বে নারদপ্রমুখা নৃপ
ভাগীরথী চ মে মাতা রণমধ্যং প্রপেদিরে
186.28
তথৈবাত্তশরো ধন্বী তথৈব দৃঢনিশ্চয়ঃ
স্থিতোঽহমাহবে যোদ্ধুং ততস্তে রামমব্রুবন্
সমেত্য সহিতা ভূয়ঃ সমরে ভৃগুনন্দনম্
186.29
নাবনীতং হি হৃদয়ং বিপ্রাণাং শাম্য ভার্গব
রাম রাম নিবর্তস্ব যুদ্ধাদস্মাদ্দ্বিজোত্তম
অবধ্যো হি ত্বয়া ভীষ্মস্ত্বং চ ভীষ্মস্য ভার্গব
186.30
এবং ব্রুবন্তস্তে সর্বে প্রতিরুধ্য রণাজিরম্
ন্যাসয়াং চক্রিরে শস্ত্রং পিতরো ভৃগুনন্দনম্
186.31
ততোঽহং পুনরেবাথ তানষ্টৌ ব্রহ্মবাদিনঃ
অদ্রাক্ষং দীপ্যমানান্বৈ গ্রহানষ্টাবিবোদিতান্
186.32
তে মাং সপ্রণয়ং বাক্যমব্রুবন্সমরে স্থিতম্
প্রৈহি রামং মহাবাহো গুরুং লোকহিতং কুরু
186.33
দৃষ্ট্বা নিবর্তিতং রামং সুহৃদ্বাক্যেন তেন বৈ
লোকানাং চ হিতং কুর্বন্নহমপ্যাদদে বচঃ
186.34
ততোঽহং রামমাসাদ্য ববন্দে ভৃশবিক্ষতঃ
রামশ্চাভ্যুত্স্ময়ন্প্রেম্ণা মামুবাচ মহাতপাঃ
186.35
ত্বত্সমো নাস্তি লোকেঽস্মিন্ক্ষত্রিয়ঃ পৃথিবীচরঃ
গম্যতাং ভীষ্ম যুদ্ধেঽস্মিংস্তোষিতোঽহং ভৃশং ত্বয়া
186.36
মম চৈব সমক্ষং তাং কন্যামাহূয় ভার্গবঃ
উবাচ দীনয়া বাচা মধ্যে তেষাং তপস্বিনাম্