UtshovChapter 186
186.1
भीष्म उवाच
ततो हलहलाशब्दो दिवि राजन्महानभूत्
प्रस्वापं भीष्म मा स्राक्षीरिति कौरवनन्दन
Bhishma uvacha
Tato halahalashabdo divi rajanmahanabhut
Prasvapam bhishma ma srakshiriti kauravanandana
186.2
अयुञ्जमेव चैवाहं तदस्त्रं भृगुनन्दने
प्रस्वापं मां प्रयुञ्जानं नारदो वाक्यमब्रवीत्
Ayunjameva chaivaham tadastram bhrigunandane
Prasvapam mam prayunjanam narado vakyamabravit
186.3
एते वियति कौरव्य दिवि देवगणाः स्थिताः
ते त्वां निवारयन्त्यद्य प्रस्वापं मा प्रयोजय
Ete viyati kauravya divi devaganah sthitah
Te tvam nivarayantyadya prasvapam ma prayojaya
186.4
रामस्तपस्वी ब्रह्मण्यो ब्राह्मणश्च गुरुश्च ते
तस्यावमानं कौरव्य मा स्म कार्षीः कथंचन
Ramastapasvi brahmanyo brahmanashcha gurushcha te
Tasyavamanam kauravya ma sma karshih kathanchana
186.5
ततोऽपश्यं दिविष्ठान्वै तानष्टौ ब्रह्मवादिनः
ते मां स्मयन्तो राजेन्द्र शनकैरिदमब्रुवन्
Tatopashyam divishthanvai tanashtau brahmavadinah
Te mam smayanto rajendra shanakairidamabruvan
186.6
यथाह भरतश्रेष्ठ नारदस्तत्तथा कुरु
एतद्धि परमं श्रेयो लोकानां भरतर्षभ
Yathaha bharatashreshtha naradastattatha kuru
Etaddhi paramam shreyo lokanam bharatarshabha
186.7
ततश्च प्रतिसंहृत्य तदस्त्रं स्वापनं मृधे
ब्रह्मास्त्रं दीपयां चक्रे तस्मिन्युधि यथाविधि
Tatashcha pratisanhritya tadastram svapanam mridhe
Brahmastram dipayam chakre tasminyudhi yathavidhi
186.8
ततो रामो रुषितो राजपुत्र; दृष्ट्वा तदस्त्रं विनिवर्तितं वै
जितोऽस्मि भीष्मेण सुमन्दबुद्धि;रित्येव वाक्यं सहसा व्यमुञ्चत्
Tato ramo rushito rajaputra; drishtva tadastram vinivartitam vai
Jitosmi bhishmena sumandabuddhi;rityeva vakyam sahasa vyamunchat
186.9
ततोऽपश्यत्पितरं जामदग्न्यः; पितुस्तथा पितरं तस्य चान्यम्
त एवैनं संपरिवार्य तस्थु;रूचुश्चैनं सान्त्वपूर्वं तदानीम्
Tatopashyatpitaram jamadagnyah; pitustatha pitaram tasya chanyam
Ta evainam samparivarya tasthu;ruchushchainam santvapurvam tadanim
186.10
मा स्मैवं साहसं वत्स पुनः कार्षीः कथंचन
भीष्मेण संयुगं गन्तुं क्षत्रियेण विशेषतः
Ma smaivam sahasam vatsa punah karshih kathanchana
Bhishmena sanyugam gantum kshatriyena visheshatah
186.11
क्षत्रियस्य तु धर्मोऽयं यद्युद्धं भृगुनन्दन
स्वाध्यायो व्रतचर्या च ब्राह्मणानां परं धनम्
Kshatriyasya tu dharmoyam yadyuddham bhrigunandana
Svadhyayo vratacharya cha brahmananam param dhanam
186.12
इदं निमित्ते कस्मिंश्चिदस्माभिरुपमन्त्रितम्
शस्त्रधारणमत्युग्रं तच्च कार्यं कृतं त्वया
Idam nimitte kasminshchidasmabhirupamantritam
Shastradharanamatyugram tachcha karyam kritam tvaya
186.13
वत्स पर्याप्तमेतावद्भीष्मेण सह संयुगे
विमर्दस्ते महाबाहो व्यपयाहि रणादितः
Vatsa paryaptametavadbhishmena saha sanyuge
Vimardaste mahabaho vyapayahi ranaditah
186.14
पर्याप्तमेतद्भद्रं ते तव कार्मुकधारणम्
विसर्जयैतद्दुर्धर्ष तपस्तप्यस्व भार्गव
Paryaptametadbhadram te tava karmukadharanam
Visarjayaitaddurdharsha tapastapyasva bhargava
186.15
एष भीष्मः शांतनवो देवैः सर्वैर्निवारितः
निवर्तस्व रणादस्मादिति चैव प्रचोदितः
Esha bhishmah shantanavo devaih sarvairnivaritah
Nivartasva ranadasmaditi chaiva prachoditah
186.16
रामेण सह मा योत्सीर्गुरुणेति पुनः पुनः
न हि रामो रणे जेतुं त्वया न्याय्यः कुरूद्वह
मानं कुरुष्व गाङ्गेय ब्राह्मणस्य रणाजिरे
Ramena saha ma yotsirguruneti punah punah
Na hi ramo rane jetum tvaya nyayyah kurudvaha
Manam kurushva gangeya brahmanasya ranajire
186.17
वयं तु गुरवस्तुभ्यं ततस्त्वां वारयामहे
भीष्मो वसूनामन्यतमो दिष्ट्या जीवसि पुत्रक
Vayam tu guravastubhyam tatastvam varayamahe
Bhishmo vasunamanyatamo dishtya jivasi putraka
186.18
गाङ्गेयः शंतनोः पुत्रो वसुरेष महायशाः
कथं त्वया रणे जेतुं राम शक्यो निवर्त वै
Gangeyah shantanoh putro vasuresha mahayashah
Katham tvaya rane jetum rama shakyo nivarta vai
186.19
अर्जुनः पाण्डवश्रेष्ठः पुरंदरसुतो बली
नरः प्रजापतिर्वीरः पूर्वदेवः सनातनः
Arjunah pandavashreshthah purandarasuto bali
Narah prajapatirvirah purvadevah sanatanah
186.20
सव्यसाचीति विख्यातस्त्रिषु लोकेषु वीर्यवान्
भीष्ममृत्युर्यथाकालं विहितो वै स्वयंभुवा
Savyasachiti vikhyatastrishu lokeshu viryavan
Bhishmamrityuryathakalam vihito vai svayambhuva
186.21
एवमुक्तः स पितृभिः पितॄन्रामोऽब्रवीदिदम्
नाहं युधि निवर्तेयमिति मे व्रतमाहितम्
Evamuktah sa pitribhih pitrinramobravididam
Naham yudhi nivarteyamiti me vratamahitam
186.22
न निवर्तितपूर्वं च कदाचिद्रणमूर्धनि
निवर्त्यतामापगेयः कामं युद्धात्पितामहाः
न त्वहं विनिवर्तिष्ये युद्धादस्मात्कथंचन
Na nivartitapurvam cha kadachidranamurdhani
Nivartyatamapageyah kamam yuddhatpitamahah
Na tvaham vinivartishye yuddhadasmatkathanchana
186.23
ततस्ते मुनयो राजन्नृचीकप्रमुखास्तदा
नारदेनैव सहिताः समागम्येदमब्रुवन्
Tataste munayo rajannrichikapramukhastada
Naradenaiva sahitah samagamyedamabruvan
186.24
निवर्तस्व रणात्तात मानयस्व द्विजोत्तमान्
नेत्यवोचमहं तांश्च क्षत्रधर्मव्यपेक्षया
Nivartasva ranattata manayasva dvijottaman
Netyavochamaham tanshcha kshatradharmavyapekshaya
186.25
मम व्रतमिदं लोके नाहं युद्धात्कथंचन
विमुखो विनिवर्तेयं पृष्ठतोऽभ्याहतः शरैः
Mama vratamidam loke naham yuddhatkathanchana
Vimukho vinivarteyam prishthatobhyahatah sharaih
186.26
नाहं लोभान्न कार्पण्यान्न भयान्नार्थकारणात्
त्यजेयं शाश्वतं धर्ममिति मे निश्चिता मतिः
Naham lobhanna karpanyanna bhayannarthakaranat
Tyajeyam shashvatam dharmamiti me nishchita matih
186.27
ततस्ते मुनयः सर्वे नारदप्रमुखा नृप
भागीरथी च मे माता रणमध्यं प्रपेदिरे
Tataste munayah sarve naradapramukha nripa
Bhagirathi cha me mata ranamadhyam prapedire
186.28
तथैवात्तशरो धन्वी तथैव दृढनिश्चयः
स्थितोऽहमाहवे योद्धुं ततस्ते राममब्रुवन्
समेत्य सहिता भूयः समरे भृगुनन्दनम्
Tathaivattasharo dhanvi tathaiva dridhanishchayah
Sthitohamahave yoddhum tataste ramamabruvan
Sametya sahita bhuyah samare bhrigunandanam
186.29
नावनीतं हि हृदयं विप्राणां शाम्य भार्गव
राम राम निवर्तस्व युद्धादस्माद्द्विजोत्तम
अवध्यो हि त्वया भीष्मस्त्वं च भीष्मस्य भार्गव
Navanitam hi hridayam vipranam shamya bhargava
Rama rama nivartasva yuddhadasmaddvijottama
Avadhyo hi tvaya bhishmastvam cha bhishmasya bhargava
186.30
एवं ब्रुवन्तस्ते सर्वे प्रतिरुध्य रणाजिरम्
न्यासयां चक्रिरे शस्त्रं पितरो भृगुनन्दनम्
Evam bruvantaste sarve pratirudhya ranajiram
Nyasayam chakrire shastram pitaro bhrigunandanam
186.31
ततोऽहं पुनरेवाथ तानष्टौ ब्रह्मवादिनः
अद्राक्षं दीप्यमानान्वै ग्रहानष्टाविवोदितान्
Tatoham punarevatha tanashtau brahmavadinah
Adraksham dipyamananvai grahanashtavivoditan
186.32
ते मां सप्रणयं वाक्यमब्रुवन्समरे स्थितम्
प्रैहि रामं महाबाहो गुरुं लोकहितं कुरु
Te mam sapranayam vakyamabruvansamare sthitam
Praihi ramam mahabaho gurum lokahitam kuru
186.33
दृष्ट्वा निवर्तितं रामं सुहृद्वाक्येन तेन वै
लोकानां च हितं कुर्वन्नहमप्याददे वचः
Drishtva nivartitam ramam suhridvakyena tena vai
Lokanam cha hitam kurvannahamapyadade vachah
186.34
ततोऽहं राममासाद्य ववन्दे भृशविक्षतः
रामश्चाभ्युत्स्मयन्प्रेम्णा मामुवाच महातपाः
Tatoham ramamasadya vavande bhrishavikshatah
Ramashchabhyutsmayanpremna mamuvacha mahatapah
186.35
त्वत्समो नास्ति लोकेऽस्मिन्क्षत्रियः पृथिवीचरः
गम्यतां भीष्म युद्धेऽस्मिंस्तोषितोऽहं भृशं त्वया
Tvatsamo nasti lokesminkshatriyah prithivicharah
Gamyatam bhishma yuddhesminstoshitoham bhrisham tvaya
186.36
मम चैव समक्षं तां कन्यामाहूय भार्गवः
उवाच दीनया वाचा मध्ये तेषां तपस्विनाम्
Mama chaiva samaksham tam kanyamahuya bhargavah
Uvacha dinaya vacha madhye tesham tapasvinam