Utshovঅধ্যায় 187
187.1
রাম উবাচ
প্রত্যক্ষমেতল্লোকানাং সর্বেষামেব ভামিনি
যথা ময়া পরং শক্ত্যা কৃতং বৈ পৌরুষং মহৎ
187.2
ন চৈব যুধি শক্নোমি ভীষ্মং শস্ত্রভৃতাং বরম্
বিশেষয়িতুমত্যর্থমুত্তমাস্ত্রাণি দর্শয়ন্
187.3
এষা মে পরমা শক্তিরেতন্মে পরমং বলম্
যথেষ্টং গম্যতাং ভদ্রে কিমন্যদ্বা করোমি তে
187.4
ভীষ্মমেব প্রপদ্যস্ব ন তেঽন্যা বিদ্যতে গতিঃ
নির্জিতো হ্যস্মি ভীষ্মেণ মহাস্ত্রাণি প্রমুঞ্চতা
187.5
ভীষ্ম উবাচ
এবমুক্ত্বা ততো রামো বিনিঃশ্বস্য মহামনাঃ
তূষ্ণীমাসীত্তদা কন্যা প্রোবাচ ভৃগুনন্দনম্
187.6
ভগবন্নেবমেবৈতদ্যথাহ ভগবাংস্তথা
অজেয়ো যুধি ভীষ্মোঽয়মপি দেবৈরুদারধীঃ
187.7
যথাশক্তি যথোত্সাহং মম কার্যং কৃতং ত্বয়া
অনিধায় রণে বীর্যমস্ত্রাণি বিবিধানি চ
187.8
ন চৈষ শক্যতে যুদ্ধে বিশেষয়িতুমন্ততঃ
ন চাহমেনং যাস্যামি পুনর্ভীষ্মং কথংচন
187.9
গমিষ্যামি তু তত্রাহং যত্র ভীষ্মং তপোধন
সমরে পাতয়িষ্যামি স্বয়মেব ভৃগূদ্বহ
187.10
এবমুক্ত্বা যয়ৌ কন্যা রোষব্যাকুললোচনা
তপসে ধৃতসংকল্পা মম চিন্তয়তী বধম্
187.11
ততো মহেন্দ্রং সহ তৈর্মুনিভির্ভৃগুসত্তমঃ
যথাগতং যয়ৌ রামো মামুপামন্ত্র্য ভারত
187.12
ততোঽহং রথমারুহ্য স্তূয়মানো দ্বিজাতিভিঃ
প্রবিশ্য নগরং মাত্রে সত্যবত্যৈ ন্যবেদয়ম্
যথাবৃত্তং মহারাজ সা চ মাং প্রত্যনন্দত
187.13
পুরুষাংশ্চাদিশং প্রাজ্ঞান্কন্যাবৃত্তান্তকর্মণি
দিবসে দিবসে হ্যস্যা গতজল্পিতচেষ্টিতম্
প্রত্যাহরংশ্চ মে যুক্তাঃ স্থিতাঃ প্রিয়হিতে মম
187.14
যদৈব হি বনং প্রায়াত্কন্যা সা তপসে ধৃতা
তদৈব ব্যথিতো দীনো গতচেতা ইবাভবম্
187.15
ন হি মাং ক্ষত্রিয়ঃ কশ্চিদ্বীর্যেণ বিজয়েদ্যুধি
ঋতে ব্রহ্মবিদস্তাত তপসা সংশিতব্রতাৎ
187.16
অপি চৈতন্ময়া রাজন্নারদেঽপি নিবেদিতম্
ব্যাসে চৈব ভয়াত্কার্যং তৌ চোভৌ মামবোচতাম্
187.17
ন বিষাদস্ত্বয়া কার্যো ভীষ্ম কাশিসুতাং প্রতি
দৈবং পুরুষকারেণ কো নিবর্তিতুমুত্সহেৎ
187.18
সা তু কন্যা মহারাজ প্রবিশ্যাশ্রমমণ্ডলম্
যমুনাতীরমাশ্রিত্য তপস্তেপেঽতিমানুষম্
187.19
নিরাহারা কৃশা রূক্ষা জটিলা মলপঙ্কিনী
ষণ্মাসান্বায়ুভক্ষা চ স্থাণুভূতা তপোধনা
187.20
যমুনাতীরমাসাদ্য সংবত্সরমথাপরম্
উদবাসং নিরাহারা পারয়ামাস ভামিনী
187.21
শীর্ণপর্ণেন চৈকেন পারয়ামাস চাপরম্
সংবত্সরং তীব্রকোপা পাদাঙ্গুষ্ঠাগ্রধিষ্ঠিতা
187.22
এবং দ্বাদশ বর্ষাণি তাপয়ামাস রোদসী
নিবর্ত্যমানাপি তু সা জ্ঞাতিভির্নৈব শক্যতে
187.23
ততোঽগমদ্বত্সভূমিং সিদ্ধচারণসেবিতাম্
আশ্রমং পুণ্যশীলানাং তাপসানাং মহাত্মনাম্
187.24
তত্র পুণ্যেষু দেশেষু সাপ্লুতাঙ্গী দিবানিশম্
ব্যচরত্কাশিকন্যা সা যথাকামবিচারিণী
187.25
নন্দাশ্রমে মহারাজ ততোলূকাশ্রমে শুভে
চ্যবনস্যাশ্রমে চৈব ব্রহ্মণঃ স্থান এব চ
187.26
প্রয়াগে দেবয়জনে দেবারণ্যেষু চৈব হ
ভোগবত্যাং তথা রাজন্কৌশিকস্যাশ্রমে তথা
187.27
মাণ্ডব্যস্যাশ্রমে রাজন্দিলীপস্যাশ্রমে তথা
রামহ্রদে চ কৌরব্য পৈলগার্গ্যস্য চাশ্রমে
187.28
এতেষু তীর্থেষু তদা কাশিকন্যা বিশাং পতে
আপ্লাবয়ত গাত্রাণি তীব্রমাস্থায় বৈ তপঃ
187.29
তামব্রবীত্কৌরবেয় মম মাতা জলোত্থিতা
কিমর্থং ক্লিশ্যসে ভদ্রে তথ্যমেতদ্ব্রবীহি মে
187.30
সৈনামথাব্রবীদ্রাজন্কৃতাঞ্জলিরনিন্দিতা
ভীষ্মো রামেণ সমরে ন জিতশ্চারুলোচনে
187.31
কোঽন্যস্তমুত্সহেজ্জেতুমুদ্যতেষুং মহীপতিম্
সাহং ভীষ্মবিনাশায় তপস্তপ্স্যে সুদারুণম্
187.32
চরামি পৃথিবীং দেবি যথা হন্যামহং নৃপম্
এতদ্ব্রতফলং দেহে পরস্মিন্স্যাদ্যথা হি মে
187.33
ততোঽব্রবীত্সাগরগা জিহ্মং চরসি ভামিনি
নৈষ কামোঽনবদ্যাঙ্গি শক্যঃ প্রাপ্তুং ত্বয়াবলে
187.34
যদি ভীষ্মবিনাশায় কাশ্যে চরসি বৈ ব্রতম্
ব্রতস্থা চ শরীরং ত্বং যদি নাম বিমোক্ষ্যসি
নদী ভবিষ্যসি শুভে কুটিলা বার্ষিকোদকা
187.35
দুস্তীর্থা চানভিজ্ঞেয়া বার্ষিকী নাষ্টমাসিকী
ভীমগ্রাহবতী ঘোরা সর্বভূতভয়ংকরী
187.36
এবমুক্ত্বা ততো রাজন্কাশিকন্যাং ন্যবর্তত
মাতা মম মহাভাগা স্ময়মানেব ভামিনী
187.37
কদাচিদষ্টমে মাসি কদাচিদ্দশমে তথা
ন প্রাশ্নীতোদকমপি পুনঃ সা বরবর্ণিনী
187.38
সা বত্সভূমিং কৌরব্য তীর্থলোভাত্ততস্ততঃ
পতিতা পরিধাবন্তী পুনঃ কাশিপতেঃ সুতা
187.39
সা নদী বত্সভূম্যাং তু প্রথিতাম্বেতি ভারত
বার্ষিকী গ্রাহবহুলা দুস্তীর্থা কুটিলা তথা
187.40
সা কন্যা তপসা তেন ভাগার্ধেন ব্যজায়ত
নদী চ রাজন্বত্সেষু কন্যা চৈবাভবত্তদা