অধ্যায় 188

188.1

ভীষ্ম উবাচ
ততস্তে তাপসাঃ সর্বে তপসে ধৃতনিশ্চয়াম্
দৃষ্ট্বা ন্যবর্তয়ংস্তাত কিং কার্যমিতি চাব্রুবন্

তানুবাচ ততঃ কন্যা তপোবৃদ্ধানৃষীংস্তদা
নিরাকৃতাস্মি ভীষ্মেণ ভ্রংশিতা পতিধর্মতঃ

বধার্থং তস্য দীক্ষা মে ন লোকার্থং তপোধনাঃ
নিহত্য ভীষ্মং গচ্ছেয়ং শান্তিমিত্যেব নিশ্চয়ঃ

যত্কৃতে দুঃখবসতিমিমাং প্রাপ্তাস্মি শাশ্বতীম্
পতিলোকাদ্বিহীনা চ নৈব স্ত্রী ন পুমানিহ

নাহত্বা যুধি গাঙ্গেয়ং নিবর্তেয়ং তপোধনাঃ
এষ মে হৃদি সংকল্পো যদর্থমিদমুদ্যতম্

স্ত্রীভাবে পরিনির্বিণ্ণা পুংস্ত্বার্থে কৃতনিশ্চয়া
ভীষ্মে প্রতিচিকীর্ষামি নাস্মি বার্যেতি বৈ পুনঃ

তাং দেবো দর্শয়ামাস শূলপাণিরুমাপতিঃ
মধ্যে তেষাং মহর্ষীণাং স্বেন রূপেণ ভামিনীম্

ছন্দ্যমানা বরেণাথ সা বব্রে মত্পরাজয়ম্
বধিষ্যসীতি তাং দেবঃ প্রত্যুবাচ মনস্বিনীম্

ততঃ সা পুনরেবাথ কন্যা রুদ্রমুবাচ হ
উপপদ্যেত্কথং দেব স্ত্রিয়ো মম জয়ো যুধি
স্ত্রীভাবেন চ মে গাঢং মনঃ শান্তমুমাপতে

প্রতিশ্রুতশ্চ ভূতেশ ত্বয়া ভীষ্মপরাজয়ঃ
যথা স সত্যো ভবতি তথা কুরু বৃষধ্বজ
যথা হন্যাং সমাগম্য ভীষ্মং শাংতনবং যুধি

তামুবাচ মহাদেবঃ কন্যাং কিল বৃষধ্বজঃ
ন মে বাগনৃতং ভদ্রে প্রাহ সত্যং ভবিষ্যতি

বধিষ্যসি রণে ভীষ্মং পুরুষত্বং চ লপ্স্যসে
স্মরিষ্যসি চ তত্সর্বং দেহমন্যং গতা সতী

দ্রুপদস্য কুলে জাতা ভবিষ্যসি মহারথঃ
শীঘ্রাস্ত্রশ্চিত্রয়োধী চ ভবিষ্যসি সুসংমতঃ

যথোক্তমেব কল্যাণি সর্বমেতদ্ভবিষ্যতি
ভবিষ্যসি পুমান্পশ্চাত্কস্মাচ্চিত্কালপর্যয়াৎ

এবমুক্ত্বা মহাতেজাঃ কপর্দী বৃষভধ্বজঃ
পশ্যতামেব বিপ্রাণাং তত্রৈবান্তরধীয়ত

ততঃ সা পশ্যতাং তেষাং মহর্ষীণামনিন্দিতা
সমাহৃত্য বনাত্তস্মাত্কাষ্ঠানি বরবর্ণিনী

চিতাং কৃত্বা সুমহতীং প্রদায় চ হুতাশনম্
প্রদীপ্তেঽগ্নৌ মহারাজ রোষদীপ্তেন চেতসা

উক্ত্বা ভীষ্মবধায়েতি প্রবিবেশ হুতাশনম্
জ্যেষ্ঠা কাশিসুতা রাজন্যমুনামভিতো নদীম্