UtshovChapter 188
188.1
भीष्म उवाच
ततस्ते तापसाः सर्वे तपसे धृतनिश्चयाम्
दृष्ट्वा न्यवर्तयंस्तात किं कार्यमिति चाब्रुवन्
Bhishma uvacha
Tataste tapasah sarve tapase dhritanishchayam
Drishtva nyavartayanstata kim karyamiti chabruvan
188.2
तानुवाच ततः कन्या तपोवृद्धानृषींस्तदा
निराकृतास्मि भीष्मेण भ्रंशिता पतिधर्मतः
Tanuvacha tatah kanya tapovriddhanrishinstada
Nirakritasmi bhishmena bhranshita patidharmatah
188.3
वधार्थं तस्य दीक्षा मे न लोकार्थं तपोधनाः
निहत्य भीष्मं गच्छेयं शान्तिमित्येव निश्चयः
Vadhartham tasya diksha me na lokartham tapodhanah
Nihatya bhishmam gachchheyam shantimityeva nishchayah
188.4
यत्कृते दुःखवसतिमिमां प्राप्तास्मि शाश्वतीम्
पतिलोकाद्विहीना च नैव स्त्री न पुमानिह
Yatkrite duhkhavasatimimam praptasmi shashvatim
Patilokadvihina cha naiva stri na pumaniha
188.5
नाहत्वा युधि गाङ्गेयं निवर्तेयं तपोधनाः
एष मे हृदि संकल्पो यदर्थमिदमुद्यतम्
Nahatva yudhi gangeyam nivarteyam tapodhanah
Esha me hridi sankalpo yadarthamidamudyatam
188.6
स्त्रीभावे परिनिर्विण्णा पुंस्त्वार्थे कृतनिश्चया
भीष्मे प्रतिचिकीर्षामि नास्मि वार्येति वै पुनः
Stribhave parinirvinna punstvarthe kritanishchaya
Bhishme pratichikirshami nasmi varyeti vai punah
188.7
तां देवो दर्शयामास शूलपाणिरुमापतिः
मध्ये तेषां महर्षीणां स्वेन रूपेण भामिनीम्
Tam devo darshayamasa shulapanirumapatih
Madhye tesham maharshinam svena rupena bhaminim
188.8
छन्द्यमाना वरेणाथ सा वव्रे मत्पराजयम्
वधिष्यसीति तां देवः प्रत्युवाच मनस्विनीम्
Chhandyamana varenatha sa vavre matparajayam
Vadhishyasiti tam devah pratyuvacha manasvinim
188.9
ततः सा पुनरेवाथ कन्या रुद्रमुवाच ह
उपपद्येत्कथं देव स्त्रियो मम जयो युधि
स्त्रीभावेन च मे गाढं मनः शान्तमुमापते
Tatah sa punarevatha kanya rudramuvacha ha
Upapadyetkatham deva striyo mama jayo yudhi
Stribhavena cha me gadham manah shantamumapate
188.10
प्रतिश्रुतश्च भूतेश त्वया भीष्मपराजयः
यथा स सत्यो भवति तथा कुरु वृषध्वज
यथा हन्यां समागम्य भीष्मं शांतनवं युधि
Pratishrutashcha bhutesha tvaya bhishmaparajayah
Yatha sa satyo bhavati tatha kuru vrishadhvaja
Yatha hanyam samagamya bhishmam shantanavam yudhi
188.11
तामुवाच महादेवः कन्यां किल वृषध्वजः
न मे वागनृतं भद्रे प्राह सत्यं भविष्यति
Tamuvacha mahadevah kanyam kila vrishadhvajah
Na me vaganritam bhadre praha satyam bhavishyati
188.12
वधिष्यसि रणे भीष्मं पुरुषत्वं च लप्स्यसे
स्मरिष्यसि च तत्सर्वं देहमन्यं गता सती
Vadhishyasi rane bhishmam purushatvam cha lapsyase
Smarishyasi cha tatsarvam dehamanyam gata sati
188.13
द्रुपदस्य कुले जाता भविष्यसि महारथः
शीघ्रास्त्रश्चित्रयोधी च भविष्यसि सुसंमतः
Drupadasya kule jata bhavishyasi maharathah
Shighrastrashchitrayodhi cha bhavishyasi susammatah
188.14
यथोक्तमेव कल्याणि सर्वमेतद्भविष्यति
भविष्यसि पुमान्पश्चात्कस्माच्चित्कालपर्ययात्
Yathoktameva kalyani sarvametadbhavishyati
Bhavishyasi pumanpashchatkasmachchitkalaparyayat
188.15
एवमुक्त्वा महातेजाः कपर्दी वृषभध्वजः
पश्यतामेव विप्राणां तत्रैवान्तरधीयत
Evamuktva mahatejah kapardi vrishabhadhvajah
Pashyatameva vipranam tatraivantaradhiyata
188.16
ततः सा पश्यतां तेषां महर्षीणामनिन्दिता
समाहृत्य वनात्तस्मात्काष्ठानि वरवर्णिनी
Tatah sa pashyatam tesham maharshinamanindita
Samahritya vanattasmatkashthani varavarnini
188.17
चितां कृत्वा सुमहतीं प्रदाय च हुताशनम्
प्रदीप्तेऽग्नौ महाराज रोषदीप्तेन चेतसा
Chitam kritva sumahatim pradaya cha hutashanam
Pradiptegnau maharaja roshadiptena chetasa
188.18
उक्त्वा भीष्मवधायेति प्रविवेश हुताशनम्
ज्येष्ठा काशिसुता राजन्यमुनामभितो नदीम्
Uktva bhishmavadhayeti pravivesha hutashanam
Jyeshtha kashisuta rajanyamunamabhito nadim