অধ্যায় 189

189.1

দুর্যোধন উবাচ
কথং শিখণ্ডী গাঙ্গেয় কন্যা ভূত্বা সতী তদা
পুরুষোঽভবদ্যুধি শ্রেষ্ঠ তন্মে ব্রূহি পিতামহ

ভীষ্ম উবাচ
ভার্যা তু তস্য রাজেন্দ্র দ্রুপদস্য মহীপতেঃ
মহিষী দয়িতা হ্যাসীদপুত্রা চ বিশাং পতে

এতস্মিন্নেব কালে তু দ্রুপদো বৈ মহীপতিঃ
অপত্যার্থং মহারাজ তোষয়ামাস শংকরম্

অস্মদ্বধার্থং নিশ্চিত্য তপো ঘোরং সমাস্থিতঃ
লেভে কন্যাং মহাদেবাত্পুত্রো মে স্যাদিতি ব্রুবন্

ভগবন্পুত্রমিচ্ছামি ভীষ্মং প্রতিচিকীর্ষয়া
ইত্যুক্তো দেবদেবেন স্ত্রীপুমাংস্তে ভবিষ্যতি

নিবর্তস্ব মহীপাল নৈতজ্জাত্বন্যথা ভবেৎ
স তু গত্বা চ নগরং ভার্যামিদমুবাচ হ

কৃতো যত্নো ময়া দেবি পুত্রার্থে তপসা মহান্
কন্যা ভূত্বা পুমান্ভাবী ইতি চোক্তোঽস্মি শংভুনা

পুনঃ পুনর্যাচ্যমানো দিষ্টমিত্যব্রবীচ্ছিবঃ
ন তদন্যদ্ধি ভবিতা ভবিতব্যং হি তত্তথা

ততঃ সা নিয়তা ভূত্বা ঋতুকালে মনস্বিনী
পত্নী দ্রুপদরাজস্য দ্রুপদং সংবিবেশ হ

লেভে গর্ভং যথাকালং বিধিদৃষ্টেন হেতুনা
পার্ষতাত্সা মহীপাল যথা মাং নারদোঽব্রবীৎ

ততো দধার তং গর্ভং দেবী রাজীবলোচনা
তাং স রাজা প্রিয়াং ভার্যাং দ্রুপদঃ কুরুনন্দন
পুত্রস্নেহান্মহাবাহুঃ সুখং পর্যচরত্তদা

অপুত্রস্য ততো রাজ্ঞো দ্রুপদস্য মহীপতেঃ
কন্যাং প্রবররূপাং তাং প্রাজায়ত নরাধিপ

অপুত্রস্য তু রাজ্ঞঃ সা দ্রুপদস্য যশস্বিনী
খ্যাপয়ামাস রাজেন্দ্র পুত্রো জাতো মমেতি বৈ

ততঃ স রাজা দ্রুপদঃ প্রচ্ছন্নায়া নরাধিপ
পুত্রবত্পুত্রকার্যাণি সর্বাণি সমকারয়ৎ

রক্ষণং চৈব মন্ত্রস্য মহিষী দ্রুপদস্য সা
চকার সর্বয়ত্নেন ব্রুবাণা পুত্র ইত্যুত
ন হি তাং বেদ নগরে কশ্চিদন্যত্র পার্ষতাৎ

শ্রদ্দধানো হি তদ্বাক্যং দেবস্যাদ্ভুততেজসঃ
ছাদয়ামাস তাং কন্যাং পুমানিতি চ সোঽব্রবীৎ

জাতকর্মাণি সর্বাণি কারয়ামাস পার্থিবঃ
পুংবদ্বিধানয়ুক্তানি শিখণ্ডীতি চ তাং বিদুঃ

অহমেকস্তু চারেণ বচনান্নারদস্য চ
জ্ঞাতবান্দেববাক্যেন অম্বায়াস্তপসা তথা