অধ্যায় 190

190.1

ভীষ্ম উবাচ
চকার যত্নং দ্রুপদঃ সর্বস্মিন্স্বজনে মহৎ
ততো লেখ্যাদিষু তথা শিল্পেষু চ পরং গতা
ইষ্বস্ত্রে চৈব রাজেন্দ্র দ্রোণশিষ্যো বভূব হ

তস্য মাতা মহারাজ রাজানং বরবর্ণিনী
চোদয়ামাস ভার্যার্থং কন্যায়াঃ পুত্রবত্তদা

ততস্তাং পার্ষতো দৃষ্ট্বা কন্যাং সংপ্রাপ্তয়ৌবনাম্
স্ত্রিয়ং মত্বা তদা চিন্তাং প্রপেদে সহ ভার্যয়া

দ্রুপদ উবাচ
কন্যা মমেয়ং সংপ্রাপ্তা যৌবনং শোকবর্ধিনী
ময়া প্রচ্ছাদিতা চেয়ং বচনাচ্ছূলপাণিনঃ

ন তন্মিথ্যা মহারাজ্ঞি ভবিষ্যতি কথংচন
ত্রৈলোক্যকর্তা কস্মাদ্ধি তন্মৃষা কর্তুমর্হতি

ভার্যোবাচ
যদি তে রোচতে রাজন্বক্ষ্যামি শৃণু মে বচঃ
শ্রুত্বেদানীং প্রপদ্যেথাঃ স্বকার্যং পৃষতাত্মজ

ক্রিয়তামস্য নৃপতে বিধিবদ্দারসংগ্রহঃ
সত্যং ভবতি তদ্বাক্যমিতি মে নিশ্চিতা মতিঃ

ভীষ্ম উবাচ
ততস্তৌ নিশ্চয়ং কৃত্বা তস্মিন্কার্যেঽথ দম্পতী
বরয়াং চক্রতুঃ কন্যাং দশার্ণাধিপতেঃ সুতাম্

ততো রাজা দ্রুপদো রাজসিংহঃ; সর্বান্রাজ্ঞঃ কুলতঃ সংনিশাম্য
দাশার্ণকস্য নৃপতেস্তনূজাং; শিখণ্ডিনে বরয়ামাস দারান্

হিরণ্যবর্মেতি নৃপো যোঽসৌ দাশার্ণকঃ স্মৃতঃ
স চ প্রাদান্মহীপালঃ কন্যাং তস্মৈ শিখণ্ডিনে

স চ রাজা দশার্ণেষু মহানাসীন্মহীপতিঃ
হিরণ্যবর্মা দুর্ধর্ষো মহাসেনো মহামনাঃ

কৃতে বিবাহে তু তদা সা কন্যা রাজসত্তম
যৌবনং সমনুপ্রাপ্তা সা চ কন্যা শিখণ্ডিনী

কৃতদারঃ শিখণ্ডী তু কাম্পিল্যং পুনরাগমৎ
ন চ সা বেদ তাং কন্যাং কংচিত্কালং স্ত্রিয়ং কিল

হিরণ্যবর্মণঃ কন্যা জ্ঞাত্বা তাং তু শিখণ্ডিনীম্
ধাত্রীণাং চ সখীনাং চ ব্রীডমানা ন্যবেদয়ৎ
কন্যাং পাঞ্চালরাজস্য সুতাং তাং বৈ শিখণ্ডিনীম্

ততস্তা রাজশার্দূল ধাত্র্যো দাশার্ণিকাস্তদা
জগ্মুরার্তিং পরাং দুঃখাত্প্রেষয়ামাসুরেব চ

ততো দশার্ণাধিপতেঃ প্রেষ্যাঃ সর্বং ন্যবেদয়ন্
বিপ্রলম্ভং যথাবৃত্তং স চ চুক্রোধ পার্থিবঃ

শিখণ্ড্যপি মহারাজ পুংবদ্রাজকুলে তদা
বিজহার মুদা যুক্তঃ স্ত্রীত্বং নৈবাতিরোচয়ন্

ততঃ কতিপয়াহস্য তচ্ছ্রুত্বা ভরতর্ষভ
হিরণ্যবর্মা রাজেন্দ্র রোষাদার্তিং জগাম হ

ততো দাশার্ণকো রাজা তীব্রকোপসমন্বিতঃ
দূতং প্রস্থাপয়ামাস দ্রুপদস্য নিবেশনে

ততো দ্রুপদমাসাদ্য দূতঃ কাঞ্চনবর্মণঃ
এক একান্তমুত্সার্য রহো বচনমব্রবীৎ

দশার্ণরাজো রাজংস্ত্বামিদং বচনমব্রবীৎ
অভিষঙ্গাত্প্রকুপিতো বিপ্রলব্ধস্ত্বয়ানঘ

অবমন্যসে মাং নৃপতে নূনং দুর্মন্ত্রিতং তব
যন্মে কন্যাং স্বকন্যার্থে মোহাদ্যাচিতবানসি

তস্যাদ্য বিপ্রলম্ভস্য ফলং প্রাপ্নুহি দুর্মতে
এষ ত্বাং সজনামাত্যমুদ্ধরামি স্থিরো ভব