UtshovChapter 190
190.1
भीष्म उवाच
चकार यत्नं द्रुपदः सर्वस्मिन्स्वजने महत्
ततो लेख्यादिषु तथा शिल्पेषु च परं गता
इष्वस्त्रे चैव राजेन्द्र द्रोणशिष्यो बभूव ह
Bhishma uvacha
Chakara yatnam drupadah sarvasminsvajane mahat
Tato lekhyadishu tatha shilpeshu cha param gata
Ishvastre chaiva rajendra dronashishyo babhuva ha
190.2
तस्य माता महाराज राजानं वरवर्णिनी
चोदयामास भार्यार्थं कन्यायाः पुत्रवत्तदा
Tasya mata maharaja rajanam varavarnini
Chodayamasa bharyartham kanyayah putravattada
190.3
ततस्तां पार्षतो दृष्ट्वा कन्यां संप्राप्तयौवनाम्
स्त्रियं मत्वा तदा चिन्तां प्रपेदे सह भार्यया
Tatastam parshato drishtva kanyam sampraptayauvanam
Striyam matva tada chintam prapede saha bharyaya
190.4
द्रुपद उवाच
कन्या ममेयं संप्राप्ता यौवनं शोकवर्धिनी
मया प्रच्छादिता चेयं वचनाच्छूलपाणिनः
Drupada uvacha
Kanya mameyam samprapta yauvanam shokavardhini
Maya prachchhadita cheyam vachanachchhulapaninah
190.5
न तन्मिथ्या महाराज्ञि भविष्यति कथंचन
त्रैलोक्यकर्ता कस्माद्धि तन्मृषा कर्तुमर्हति
Na tanmithya maharagyi bhavishyati kathanchana
Trailokyakarta kasmaddhi tanmrisha kartumarhati
190.6
भार्योवाच
यदि ते रोचते राजन्वक्ष्यामि शृणु मे वचः
श्रुत्वेदानीं प्रपद्येथाः स्वकार्यं पृषतात्मज
Bharyovacha
Yadi te rochate rajanvakshyami shrinu me vachah
Shrutvedanim prapadyethah svakaryam prishatatmaja
190.7
क्रियतामस्य नृपते विधिवद्दारसंग्रहः
सत्यं भवति तद्वाक्यमिति मे निश्चिता मतिः
Kriyatamasya nripate vidhivaddarasangrahah
Satyam bhavati tadvakyamiti me nishchita matih
190.8
भीष्म उवाच
ततस्तौ निश्चयं कृत्वा तस्मिन्कार्येऽथ दम्पती
वरयां चक्रतुः कन्यां दशार्णाधिपतेः सुताम्
Bhishma uvacha
Tatastau nishchayam kritva tasminkaryetha dampati
Varayam chakratuh kanyam dasharnadhipateh sutam
190.9
ततो राजा द्रुपदो राजसिंहः; सर्वान्राज्ञः कुलतः संनिशाम्य
दाशार्णकस्य नृपतेस्तनूजां; शिखण्डिने वरयामास दारान्
Tato raja drupado rajasinhah; sarvanragyah kulatah sannishamya
Dasharnakasya nripatestanujam; shikhandine varayamasa daran
190.10
हिरण्यवर्मेति नृपो योऽसौ दाशार्णकः स्मृतः
स च प्रादान्महीपालः कन्यां तस्मै शिखण्डिने
Hiranyavarmeti nripo yosau dasharnakah smritah
Sa cha pradanmahipalah kanyam tasmai shikhandine
190.11
स च राजा दशार्णेषु महानासीन्महीपतिः
हिरण्यवर्मा दुर्धर्षो महासेनो महामनाः
Sa cha raja dasharneshu mahanasinmahipatih
Hiranyavarma durdharsho mahaseno mahamanah
190.12
कृते विवाहे तु तदा सा कन्या राजसत्तम
यौवनं समनुप्राप्ता सा च कन्या शिखण्डिनी
Krite vivahe tu tada sa kanya rajasattama
Yauvanam samanuprapta sa cha kanya shikhandini
190.13
कृतदारः शिखण्डी तु काम्पिल्यं पुनरागमत्
न च सा वेद तां कन्यां कंचित्कालं स्त्रियं किल
Kritadarah shikhandi tu kampilyam punaragamat
Na cha sa veda tam kanyam kanchitkalam striyam kila
190.14
हिरण्यवर्मणः कन्या ज्ञात्वा तां तु शिखण्डिनीम्
धात्रीणां च सखीनां च व्रीडमाना न्यवेदयत्
कन्यां पाञ्चालराजस्य सुतां तां वै शिखण्डिनीम्
Hiranyavarmanah kanya gyatva tam tu shikhandinim
Dhatrinam cha sakhinam cha vridamana nyavedayat
Kanyam panchalarajasya sutam tam vai shikhandinim
190.15
ततस्ता राजशार्दूल धात्र्यो दाशार्णिकास्तदा
जग्मुरार्तिं परां दुःखात्प्रेषयामासुरेव च
Tatasta rajashardula dhatryo dasharnikastada
Jagmurartim param duhkhatpreshayamasureva cha
190.16
ततो दशार्णाधिपतेः प्रेष्याः सर्वं न्यवेदयन्
विप्रलम्भं यथावृत्तं स च चुक्रोध पार्थिवः
Tato dasharnadhipateh preshyah sarvam nyavedayan
Vipralambham yathavrittam sa cha chukrodha parthivah
190.17
शिखण्ड्यपि महाराज पुंवद्राजकुले तदा
विजहार मुदा युक्तः स्त्रीत्वं नैवातिरोचयन्
Shikhandyapi maharaja punvadrajakule tada
Vijahara muda yuktah stritvam naivatirochayan
190.18
ततः कतिपयाहस्य तच्छ्रुत्वा भरतर्षभ
हिरण्यवर्मा राजेन्द्र रोषादार्तिं जगाम ह
Tatah katipayahasya tachchhrutva bharatarshabha
Hiranyavarma rajendra roshadartim jagama ha
190.19
ततो दाशार्णको राजा तीव्रकोपसमन्वितः
दूतं प्रस्थापयामास द्रुपदस्य निवेशने
Tato dasharnako raja tivrakopasamanvitah
Dutam prasthapayamasa drupadasya niveshane
190.20
ततो द्रुपदमासाद्य दूतः काञ्चनवर्मणः
एक एकान्तमुत्सार्य रहो वचनमब्रवीत्
Tato drupadamasadya dutah kanchanavarmanah
Eka ekantamutsarya raho vachanamabravit
190.21
दशार्णराजो राजंस्त्वामिदं वचनमब्रवीत्
अभिषङ्गात्प्रकुपितो विप्रलब्धस्त्वयानघ
Dasharnarajo rajanstvamidam vachanamabravit
Abhishangatprakupito vipralabdhastvayanagha
190.22
अवमन्यसे मां नृपते नूनं दुर्मन्त्रितं तव
यन्मे कन्यां स्वकन्यार्थे मोहाद्याचितवानसि
Avamanyase mam nripate nunam durmantritam tava
Yanme kanyam svakanyarthe mohadyachitavanasi
190.23
तस्याद्य विप्रलम्भस्य फलं प्राप्नुहि दुर्मते
एष त्वां सजनामात्यमुद्धरामि स्थिरो भव
Tasyadya vipralambhasya phalam prapnuhi durmate
Esha tvam sajanamatyamuddharami sthiro bhava