অধ্যায় 191

191.1

ভীষ্ম উবাচ
এবমুক্তস্য দূতেন দ্রুপদস্য তদা নৃপ
চোরস্যেব গৃহীতস্য ন প্রাবর্তত ভারতী

স যত্নমকরোত্তীব্রং সংবন্ধৈরনুসান্ত্বনৈঃ
দূতৈর্মধুরসংভাষৈর্নৈতদস্তীতি সংদিশন্

স রাজা ভূয় এবাথ কৃত্বা তত্ত্বত আগমম্
কন্যেতি পাঞ্চালসুতাং ত্বরমাণোঽভিনির্যয়ৌ

ততঃ সংপ্রেষয়ামাস মিত্রাণামমিতৌজসাম্
দুহিতুর্বিপ্রলম্ভং তং ধাত্রীণাং বচনাত্তদা

ততঃ সমুদয়ং কৃত্বা বলানাং রাজসত্তমঃ
অভিয়ানে মতিং চক্রে দ্রুপদং প্রতি ভারত

ততঃ সংমন্ত্রয়ামাস মিত্রৈঃ সহ মহীপতিঃ
হিরণ্যবর্মা রাজেন্দ্র পাঞ্চাল্যং পার্থিবং প্রতি

তত্র বৈ নিশ্চিতং তেষামভূদ্রাজ্ঞাং মহাত্মনাম্
তথ্যং চেদ্ভবতি হ্যেতত্কন্যা রাজঞ্শিখণ্ডিনী
বদ্ধ্বা পাঞ্চালরাজানমানয়িষ্যামহে গৃহান্

অন্যং রাজানমাধায় পাঞ্চালেষু নরেশ্বরম্
ঘাতয়িষ্যাম নৃপতিং দ্রুপদং সশিখণ্ডিনম্

স তদা দূতমাজ্ঞায় পুনঃ ক্ষত্তারমীশ্বরঃ
প্রাস্থাপয়ত্পার্ষতায় হন্মীতি ত্বাং স্থিরো ভব

স প্রকৃত্যা চ বৈ ভীরুঃ কিল্বিষী চ নরাধিপঃ
ভয়ং তীব্রমনুপ্রাপ্তো দ্রুপদঃ পৃথিবীপতিঃ

বিসৃজ্য দূতং দাশার্ণং দ্রুপদঃ শোককর্শিতঃ
সমেত্য ভার্যাং রহিতে বাক্যমাহ নরাধিপঃ

ভয়েন মহতাবিষ্টো হৃদি শোকেন চাহতঃ
পাঞ্চালরাজো দয়িতাং মাতরং বৈ শিখণ্ডিনঃ

অভিয়াস্যতি মাং কোপাত্সংবন্ধী সুমহাবলঃ
হিরণ্যবর্মা নৃপতিঃ কর্ষমাণো বরূথিনীম্

কিমিদানীং করিষ্যামি মূঢঃ কন্যামিমাং প্রতি
শিখণ্ডী কিল পুত্রস্তে কন্যেতি পরিশঙ্কিতঃ

ইতি নিশ্চিত্য তত্ত্বেন সমিত্রঃ সবলানুগঃ
বঞ্চিতোঽস্মীতি মন্বানো মাং কিলোদ্ধর্তুমিচ্ছতি

কিমত্র তথ্যং সুশ্রোণি কিং মিথ্যা ব্রূহি শোভনে
শ্রুত্বা ত্বত্তঃ শুভে বাক্যং সংবিধাস্যাম্যহং তথা

অহং হি সংশয়ং প্রাপ্তো বালা চেয়ং শিখণ্ডিনী
ত্বং চ রাজ্ঞি মহত্কৃচ্ছ্রং সংপ্রাপ্তা বরবর্ণিনি

সা ত্বং সর্ববিমোক্ষায় তত্ত্বমাখ্যাহি পৃচ্ছতঃ
তথা বিদধ্যাং সুশ্রোণি কৃত্যস্যাস্য শুচিস্মিতে
শিখণ্ডিনি চ মা ভৈস্ত্বং বিধাস্যে তত্র তত্ত্বতঃ

ক্রিয়য়াহং বরারোহে বঞ্চিতঃ পুত্রধর্মতঃ
ময়া দাশার্ণকো রাজা বঞ্চিতশ্চ মহীপতিঃ
তদাচক্ষ্ব মহাভাগে বিধাস্যে তত্র যদ্ধিতম্

জানতাপি নরেন্দ্রেণ খ্যাপনার্থং পরস্য বৈ
প্রকাশং চোদিতা দেবী প্রত্যুবাচ মহীপতিম্