Utshovঅধ্যায় 192
192.1
ভীষ্ম উবাচ
ততঃ শিখণ্ডিনো মাতা যথাতত্ত্বং নরাধিপ
আচচক্ষে মহাবাহো ভর্ত্রে কন্যাং শিখণ্ডিনীম্
192.2
অপুত্রয়া ময়া রাজন্সপত্নীনাং ভয়াদিদম্
কন্যা শিখণ্ডিনী জাতা পুরুষো বৈ নিবেদিতঃ
192.3
ত্বয়া চৈব নরশ্রেষ্ঠ তন্মে প্রীত্যানুমোদিতম্
পুত্রকর্ম কৃতং চৈব কন্যায়াঃ পার্থিবর্ষভ
ভার্যা চোঢা ত্বয়া রাজন্দশার্ণাধিপতেঃ সুতা
192.4
ত্বয়া চ প্রাগভিহিতং দেববাক্যার্থদর্শনাৎ
কন্যা ভূত্বা পুমান্ভাবীত্যেবং চৈতদুপেক্ষিতম্
192.5
এতচ্ছ্রুত্বা দ্রুপদো যজ্ঞসেনঃ; সর্বং তত্ত্বং মন্ত্রবিদ্ভ্যো নিবেদ্য
মন্ত্রং রাজা মন্ত্রয়ামাস রাজ;ন্যদ্যদ্যুক্তং রক্ষণে বৈ প্রজানাম্
192.6
সংবন্ধকং চৈব সমর্থ্য তস্মি;ন্দাশার্ণকে বৈ নৃপতৌ নরেন্দ্র
স্বয়ং কৃত্বা বিপ্রলম্ভং যথাব;ন্মন্ত্রৈকাগ্রো নিশ্চয়ং বৈ জগাম
192.7
স্বভাবগুপ্তং নগরমাপত্কালে তু ভারত
গোপয়ামাস রাজেন্দ্র সর্বতঃ সমলংকৃতম্
192.8
আর্তিং চ পরমাং রাজা জগাম সহ ভার্যয়া
দশার্ণপতিনা সার্ধং বিরোধে ভরতর্ষভ
192.9
কথং সংবন্ধিনা সার্ধং ন মে স্যাদ্বিগ্রহো মহান্
ইতি সংচিন্ত্য মনসা দৈবতান্যর্চয়ত্তদা
192.10
তং তু দৃষ্ট্বা তদা রাজন্দেবী দেবপরং তথা
অর্চাং প্রয়ুঞ্জানমথো ভার্যা বচনমব্রবীৎ
192.11
দেবানাং প্রতিপত্তিশ্চ সত্যা সাধুমতা সদা
সা তু দুঃখার্ণবং প্রাপ্য নঃ স্যাদর্চয়তাং ভৃশম্
192.12
দৈবতানি চ সর্বাণি পূজ্যন্তাং ভূরিদক্ষিণৈঃ
অগ্নয়শ্চাপি হূয়ন্তাং দাশার্ণপ্রতিষেধনে
192.13
অয়ুদ্ধেন নিবৃত্তিং চ মনসা চিন্তয়াভিভো
দেবতানাং প্রসাদেন সর্বমেতদ্ভবিষ্যতি
192.14
মন্ত্রিভির্মন্ত্রিতং সার্ধং ত্বয়া যত্পৃথুলোচন
পুরস্যাস্যাবিনাশায় তচ্চ রাজংস্তথা কুরু
192.15
দৈবং হি মানুষোপেতং ভৃশং সিধ্যতি পার্থিব
পরস্পরবিরোধাত্তু নানয়োঃ সিদ্ধিরস্তি বৈ
192.16
তস্মাদ্বিধায় নগরে বিধানং সচিবৈঃ সহ
অর্চয়স্ব যথাকামং দৈবতানি বিশাং পতে
192.17
এবং সংভাষমাণৌ তৌ দৃষ্ট্বা শোকপরায়ণৌ
শিখণ্ডিনী তদা কন্যা ব্রীডিতেব মনস্বিনী
192.18
ততঃ সা চিন্তয়ামাস মত্কৃতে দুঃখিতাবুভৌ
ইমাবিতি ততশ্চক্রে মতিং প্রাণবিনাশনে
192.19
এবং সা নিশ্চয়ং কৃত্বা ভৃশং শোকপরায়ণা
জগাম ভবনং ত্যক্ত্বা গহনং নির্জনং বনম্
192.20
যক্ষেণর্দ্ধিমতা রাজন্স্থূণাকর্ণেন পালিতম্
তদ্ভয়াদেব চ জনো বিসর্জয়তি তদ্বনম্
192.21
তত্র স্থূণস্য ভবনং সুধামৃত্তিকলেপনম্
লাজোল্লাপিকধূমাঢ্যমুচ্চপ্রাকারতোরণম্
192.22
তত্প্রবিশ্য শিখণ্ডী সা দ্রুপদস্যাত্মজা নৃপ
অনশ্নতী বহুতিথং শরীরমুপশোষয়ৎ
192.23
দর্শয়ামাস তাং যক্ষঃ স্থূণো মধ্বক্ষসংয়ুতঃ
কিমর্থোঽয়ং তবারম্ভঃ করিষ্যে ব্রূহি মাচিরম্
192.24
অশক্যমিতি সা যক্ষং পুনঃ পুনরুবাচ হ
করিষ্যামীতি চৈনাং স প্রত্যুবাচাথ গুহ্যকঃ
192.25
ধনেশ্বরস্যানুচরো বরদোঽস্মি নৃপাত্মজে
অদেয়মপি দাস্যামি ব্রূহি যত্তে বিবক্ষিতম্
192.26
ততঃ শিখণ্ডী তত্সর্বমখিলেন ন্যবেদয়ৎ
তস্মৈ যক্ষপ্রধানায় স্থূণাকর্ণায় ভারত
192.27
আপন্নো মে পিতা যক্ষ নচিরাদ্বিনশিষ্যতি
অভিয়াস্যতি সংক্রুদ্ধো দশার্ণাধিপতির্হি তম্
192.28
মহাবলো মহোত্সাহঃ স হেমকবচো নৃপঃ
তস্মাদ্রক্ষস্ব মাং যক্ষ পিতরং মাতরং চ মে
192.29
প্রতিজ্ঞাতো হি ভবতা দুঃখপ্রতিনয়ো মম
ভবেয়ং পুরুষো যক্ষ ত্বত্প্রসাদাদনিন্দিতঃ
192.30
যাবদেব স রাজা বৈ নোপয়াতি পুরং মম
তাবদেব মহায়ক্ষ প্রসাদং কুরু গুহ্যক