Utshovঅধ্যায় 193
193.1
ভীষ্ম উবাচ
শিখণ্ডিবাক্যং শ্রুত্বাথ স যক্ষো ভরতর্ষভ
প্রোবাচ মনসা চিন্ত্য দৈবেনোপনিপীডিতঃ
ভবিতব্যং তথা তদ্ধি মম দুঃখায় কৌরব
193.2
ভদ্রে কামং করিষ্যামি সময়ং তু নিবোধ মে
কিংচিত্কালান্তরং দাস্যে পুংলিঙ্গং স্বমিদং তব
আগন্তব্যং ত্বয়া কালে সত্যমেতদ্ব্রবীমি তে
193.3
প্রভুঃ সংকল্পসিদ্ধোঽস্মি কামরূপী বিহংগমঃ
মত্প্রসাদাত্পুরং চৈব ত্রাহি বন্ধূংশ্চ কেবলান্
193.4
স্ত্রীলিঙ্গং ধারয়িষ্যামি ত্বদীয়ং পার্থিবাত্মজে
সত্যং মে প্রতিজানীহি করিষ্যামি প্রিয়ং তব
193.5
শিখণ্ড্যুবাচ
প্রতিদাস্যামি ভগবঁল্লিঙ্গং পুনরিদং তব
কিংচিত্কালান্তরং স্ত্রীত্বং ধারয়স্ব নিশাচর
193.6
প্রতিপ্রয়াতে দাশার্ণে পার্থিবে হেমবর্মণি
কন্যৈবাহং ভবিষ্যামি পুরুষস্ত্বং ভবিষ্যসি
193.7
ভীষ্ম উবাচ
ইত্যুক্ত্বা সময়ং তত্র চক্রাতে তাবুভৌ নৃপ
অন্যোন্যস্যানভিদ্রোহে তৌ সংক্রাময়তাং ততঃ
193.8
স্ত্রীলিঙ্গং ধারয়ামাস স্থূণো যক্ষো নরাধিপ
যক্ষরূপং চ তদ্দীপ্তং শিখণ্ডী প্রত্যপদ্যত
193.9
ততঃ শিখণ্ডী পাঞ্চাল্যঃ পুংস্ত্বমাসাদ্য পার্থিব
বিবেশ নগরং হৃষ্টঃ পিতরং চ সমাসদৎ
যথাবৃত্তং তু তত্সর্বমাচখ্যৌ দ্রুপদস্য চ
193.10
দ্রুপদস্তস্য তচ্ছ্রুত্বা হর্ষমাহারয়ত্পরম্
সভার্যস্তচ্চ সস্মার মহেশ্বরবচস্তদা
193.11
ততঃ সংপ্রেষয়ামাস দশার্ণাধিপতের্নৃপ
পুরুষোঽয়ং মম সুতঃ শ্রদ্ধত্তাং মে ভবানিতি
193.12
অথ দাশার্ণকো রাজা সহসাভ্যাগমত্তদা
পাঞ্চালরাজং দ্রুপদং দুঃখামর্ষসমন্বিতঃ
193.13
ততঃ কাম্পিল্যমাসাদ্য দশার্ণাধিপতিস্তদা
প্রেষয়ামাস সত্কৃত্য দূতং ব্রহ্মবিদাং বরম্
193.14
ব্রূহি মদ্বচনাদ্দূত পাঞ্চাল্যং তং নৃপাধমম্
যদ্বৈ কন্যাং স্বকন্যার্থে বৃতবানসি দুর্মতে
ফলং তস্যাবলেপস্য দ্রক্ষ্যস্যদ্য ন সংশয়ঃ
193.15
এবমুক্তস্তু তেনাসৌ ব্রাহ্মণো রাজসত্তম
দূতঃ প্রয়াতো নগরং দাশার্ণনৃপচোদিতঃ
193.16
তত আসাদয়ামাস পুরোধা দ্রুপদং পুরে
তস্মৈ পাঞ্চালকো রাজা গামর্ঘ্যং চ সুসত্কৃতম্
প্রাপয়ামাস রাজেন্দ্র সহ তেন শিখণ্ডিনা
193.17
তাং পূজাং নাভ্যনন্দত্স বাক্যং চেদমুবাচ হ
যদুক্তং তেন বীরেণ রাজ্ঞা কাঞ্চনবর্মণা
193.18
যত্তেঽহমধমাচার দুহিত্রর্থেঽস্মি বঞ্চিতঃ
তস্য পাপস্য করণাত্ফলং প্রাপ্নুহি দুর্মতে
193.19
দেহি যুদ্ধং নরপতে মমাদ্য রণমূর্ধনি
উদ্ধরিষ্যামি তে সদ্যঃ সামাত্যসুতবান্ধবম্
193.20
তদুপালম্ভসংয়ুক্তং শ্রাবিতঃ কিল পার্থিবঃ
দশার্ণপতিদূতেন মন্ত্রিমধ্যে পুরোধসা
193.21
অব্রবীদ্ভরতশ্রেষ্ঠ দ্রুপদঃ প্রণয়ানতঃ
যদাহ মাং ভবান্ব্রহ্মন্সংবন্ধিবচনাদ্বচঃ
তস্যোত্তরং প্রতিবচো দূত এব বদিষ্যতি
193.22
ততঃ সংপ্রেষয়ামাস দ্রুপদোঽপি মহাত্মনে
হিরণ্যবর্মণে দূতং ব্রাহ্মণং বেদপারগম্
193.23
সমাগম্য তু রাজ্ঞা স দশার্ণপতিনা তদা
তদ্বাক্যমাদদে রাজন্যদুক্তং দ্রুপদেন হ
193.24
আগমঃ ক্রিয়তাং ব্যক্তং কুমারো বৈ সুতো মম
মিথ্যৈতদুক্তং কেনাপি তন্ন শ্রদ্ধেয়মিত্যুত
193.25
ততঃ স রাজা দ্রুপদস্য শ্রুত্বা; বিমর্শয়ুক্তো যুবতীর্বরিষ্ঠাঃ
সংপ্রেষয়ামাস সুচারুরূপাঃ; শিখণ্ডিনং স্ত্রী পুমান্বেতি বেত্তুম্
193.26
তাঃ প্রেষিতাস্তত্ত্বভাবং বিদিত্বা; প্রীত্যা রাজ্ঞে তচ্ছশংসুর্হি সর্বম্
শিখণ্ডিনং পুরুষং কৌরবেন্দ্র; দশার্ণরাজায় মহানুভাবম্
193.27
ততঃ কৃত্বা তু রাজা স আগমং প্রীতিমানথ
সংবন্ধিনা সমাগম্য হৃষ্টো বাসমুবাস হ
193.28
শিখণ্ডিনে চ মুদিতঃ প্রাদাদ্বিত্তং জনেশ্বরঃ
হস্তিনোঽশ্বাংশ্চ গাশ্চৈব দাস্যো বহুশতাস্তথা
পূজিতশ্চ প্রতিয়য়ৌ নিবর্ত্য তনয়াং কিল
193.29
বিনীতকিল্বিষে প্রীতে হেমবর্মণি পার্থিবে
প্রতিয়াতে তু দাশার্ণে হৃষ্টরূপা শিখণ্ডিনী
193.30
কস্যচিত্ত্বথ কালস্য কুবেরো নরবাহনঃ
লোকানুয়াত্রাং কুর্বাণঃ স্থূণস্যাগান্নিবেশনম্
193.31
স তদ্গৃহস্যোপরি বর্তমান; আলোকয়ামাস ধনাধিগোপ্তা
স্থূণস্য যক্ষস্য নিশাম্য বেশ্ম; স্বলংকৃতং মাল্যগুণৈর্বিচিত্রম্
193.32
লাজৈশ্চ গন্ধৈশ্চ তথা বিতানৈ;রভ্যর্চিতং ধূপনধূপিতং চ
ধ্বজৈঃ পতাকাভিরলংকৃতং চ; ভক্ষ্যান্নপেয়ামিষদত্তহোমম্
193.33
তত্স্থানং তস্য দৃষ্ট্বা তু সর্বতঃ সমলংকৃতম্
অথাব্রবীদ্যক্ষপতিস্তান্যক্ষাননুগাংস্তদা
193.34
স্বলংকৃতমিদং বেশ্ম স্থূণস্যামিতবিক্রমাঃ
নোপসর্পতি মাং চাপি কস্মাদদ্য সুমন্দধীঃ
193.35
যস্মাজ্জানন্সুমন্দাত্মা মামসৌ নোপসর্পতি
তস্মাত্তস্মৈ মহাদণ্ডো ধার্যঃ স্যাদিতি মে মতিঃ
193.36
যক্ষা ঊচুঃ
দ্রুপদস্য সুতা রাজন্রাজ্ঞো জাতা শিখণ্ডিনী
তস্যৈ নিমিত্তে কস্মিংশ্চিত্প্রাদাত্পুরুষলক্ষণম্
193.37
অগ্রহীল্লক্ষণং স্ত্রীণাং স্ত্রীভূতস্তিষ্ঠতে গৃহে
নোপসর্পতি তেনাসৌ সব্রীডঃ স্ত্রীস্বরূপবান্
193.38
এতস্মাত্কারণাদ্রাজন্স্থূণো ন ত্বাদ্য পশ্যতি
শ্রুত্বা কুরু যথান্যায়ং বিমানমিহ তিষ্ঠতাম্
193.39
ভীষ্ম উবাচ
আনীয়তাং স্থূণ ইতি ততো যক্ষাধিপোঽব্রবীৎ
কর্তাস্মি নিগ্রহং তস্যেত্যুবাচ স পুনঃ পুনঃ
193.40
সোঽভ্যগচ্ছত যক্ষেন্দ্রমাহূতঃ পৃথিবীপতে
স্ত্রীস্বরূপো মহারাজ তস্থৌ ব্রীডাসমন্বিতঃ
193.41
তং শশাপ সুসংক্রুদ্ধো ধনদঃ কুরুনন্দন
এবমেব ভবত্বস্য স্ত্রীত্বং পাপস্য গুহ্যকাঃ
193.42
ততোঽব্রবীদ্যক্ষপতির্মহাত্মা; যস্মাদদাস্ত্ববমন্যেহ যক্ষান্
শিখণ্ডিনে লক্ষণং পাপবুদ্ধে; স্ত্রীলক্ষণং চাগ্রহীঃ পাপকর্মন্
193.43
অপ্রবৃত্তং সুদুর্বুদ্ধে যস্মাদেতত্কৃতং ত্বয়া
তস্মাদদ্য প্রভৃত্যেব ত্বং স্ত্রী স পুরুষস্তথা
193.44
ততঃ প্রসাদয়ামাসুর্যক্ষা বৈশ্রবণং কিল
স্থূণস্যার্থে কুরুষ্বান্তং শাপস্যেতি পুনঃ পুনঃ
193.45
ততো মহাত্মা যক্ষেন্দ্রঃ প্রত্যুবাচানুগামিনঃ
সর্বান্যক্ষগণাংস্তাত শাপস্যান্তচিকীর্ষয়া
193.46
হতে শিখণ্ডিনি রণে স্বরূপং প্রতিপত্স্যতে
স্থূণো যক্ষো নিরুদ্বেগো ভবত্বিতি মহামনাঃ
193.47
ইত্যুক্ত্বা ভগবান্দেবো যক্ষরাক্ষসপূজিতঃ
প্রয়য়ৌ সহ তৈঃ সর্বৈর্নিমেষান্তরচারিভিঃ
193.48
স্থূণস্তু শাপং সংপ্রাপ্য তত্রৈব ন্যবসত্তদা
সময়ে চাগমত্তং বৈ শিখণ্ডী স ক্ষপাচরম্
193.49
সোঽভিগম্যাব্রবীদ্বাক্যং প্রাপ্তোঽস্মি ভগবন্নিতি
তমব্রবীত্ততঃ স্থূণঃ প্রীতোঽস্মীতি পুনঃ পুনঃ
193.50
আর্জবেনাগতং দৃষ্ট্বা রাজপুত্রং শিখণ্ডিনম্
সর্বমেব যথাবৃত্তমাচচক্ষে শিখণ্ডিনে
193.51
যক্ষ উবাচ
শপ্তো বৈশ্রবণেনাস্মি ত্বত্কৃতে পার্থিবাত্মজ
গচ্ছেদানীং যথাকামং চর লোকান্যথাসুখম্
193.52
দিষ্টমেতত্পুরা মন্যে ন শক্যমতিবর্তিতুম্
গমনং তব চেতো হি পৌলস্ত্যস্য চ দর্শনম্
193.53
ভীষ্ম উবাচ
এবমুক্তঃ শিখণ্ডী তু স্থূণয়ক্ষেণ ভারত
প্রত্যাজগাম নগরং হর্ষেণ মহতান্বিতঃ
193.54
পূজয়ামাস বিবিধৈর্গন্ধমাল্যৈর্মহাধনৈঃ
দ্বিজাতীন্দেবতাশ্চাপি চৈত্যানথ চতুষ্পথান্
193.55
দ্রুপদঃ সহ পুত্রেণ সিদ্ধার্থেন শিখণ্ডিনা
মুদং চ পরমাং লেভে পাঞ্চাল্যঃ সহ বান্ধবৈঃ
193.56
শিষ্যার্থং প্রদদৌ চাপি দ্রোণায় কুরুপুংগব
শিখণ্ডিনং মহারাজ পুত্রং স্ত্রীপূর্বিণং তথা
193.57
প্রতিপেদে চতুষ্পাদং ধনুর্বেদং নৃপাত্মজঃ
শিখণ্ডী সহ যুষ্মাভির্ধৃষ্টদ্যুম্নশ্চ পার্ষতঃ
193.58
মম ত্বেতচ্চরাস্তাত যথাবত্প্রত্যবেদয়ন্
জডান্ধবধিরাকারা যে যুক্তা দ্রুপদে ময়া
193.59
এবমেষ মহারাজ স্ত্রীপুমান্দ্রুপদাত্মজঃ
সংভূতঃ কৌরবশ্রেষ্ঠ শিখণ্ডী রথসত্তমঃ
193.60
জ্যেষ্ঠা কাশিপতেঃ কন্যা অম্বা নামেতি বিশ্রুতা
দ্রুপদস্য কুলে জাতা শিখণ্ডী ভরতর্ষভ
193.61
নাহমেনং ধনুষ্পাণিং যুয়ুত্সুং সমুপস্থিতম্
মুহূর্তমপি পশ্যেয়ং প্রহরেয়ং ন চাপ্যুত
193.62
ব্রতমেতন্মম সদা পৃথিব্যামপি বিশ্রুতম্
স্ত্রিয়াং স্ত্রীপূর্বকে চাপি স্ত্রীনাম্নি স্ত্রীস্বরূপিণি
193.63
ন মুঞ্চেয়মহং বাণানিতি কৌরবনন্দন
ন হন্যামহমেতেন কারণেন শিখণ্ডিনম্
193.64
এতত্তত্ত্বমহং বেদ জন্ম তাত শিখণ্ডিনঃ
ততো নৈনং হনিষ্যামি সমরেষ্বাততায়িনম্
193.65
যদি ভীষ্মঃ স্ত্রিয়ং হন্যাদ্ধন্যাদাত্মানমপ্যুত
নৈনং তস্মাদ্ধনিষ্যামি দৃষ্ট্বাপি সমরে স্থিতম্
193.66
সংজয় উবাচ
এতচ্ছ্রুত্বা তু কৌরব্যো রাজা দুর্যোধনস্তদা
মুহূর্তমিব স ধ্যাত্বা ভীষ্মে যুক্তমমন্যত