অধ্যায় 194

194.1

সংজয় উবাচ
প্রভাতায়াং তু শর্বর্যাং পুনরেব সুতস্তব
মধ্যে সর্বস্য সৈন্যস্য পিতামহমপৃচ্ছত

পাণ্ডবেয়স্য গাঙ্গেয় যদেতত্সৈন্যমুত্তমম্
প্রভূতনরনাগাশ্বং মহারথসমাকুলম্

ভীমার্জুনপ্রভৃতিভির্মহেষ্বাসৈর্মহাবলৈঃ
লোকপালোপমৈর্গুপ্তং ধৃষ্টদ্যুম্নপুরোগমৈঃ

অপ্রধৃষ্যমনাবার্যমুদ্বৃত্তমিব সাগরম্
সেনাসাগরমক্ষোভ্যমপি দেবৈর্মহাহবে

কেন কালেন গাঙ্গেয় ক্ষপয়েথা মহাদ্যুতে
আচার্যো বা মহেষ্বাসঃ কৃপো বা সুমহাবলঃ

কর্ণো বা সমরশ্লাঘী দ্রৌণির্বা দ্বিজসত্তমঃ
দিব্যাস্ত্রবিদুষঃ সর্বে ভবন্তো হি বলে মম

এতদিচ্ছাম্যহং জ্ঞাতুং পরং কৌতূহলং হি মে
হৃদি নিত্যং মহাবাহো বক্তুমর্হসি তন্মম

ভীষ্ম উবাচ
অনুরূপং কুরুশ্রেষ্ঠ ত্বয্যেতত্পৃথিবীপতে
বলাবলমমিত্রাণাং স্বেষাং চ যদি পৃচ্ছসি

শৃণু রাজন্মম রণে যা শক্তিঃ পরমা ভবেৎ
অস্ত্রবীর্যং রণে যচ্চ ভুজয়োশ্চ মহাভুজ

আর্জবেনৈব যুদ্ধেন যোদ্ধব্য ইতরো জনঃ
মায়ায়ুদ্ধেন মায়াবী ইত্যেতদ্ধর্মনিশ্চয়ঃ

হন্যামহং মহাবাহো পাণ্ডবানামনীকিনীম্
দিবসে দিবসে কৃত্বা ভাগং প্রাগাহ্নিকং মম

যোধানাং দশসাহস্রং কৃত্বা ভাগং মহাদ্যুতে
সহস্রং রথিনামেকমেষ ভাগো মতো মম

অনেনাহং বিধানেন সংনদ্ধঃ সততোত্থিতঃ
ক্ষপয়েয়ং মহত্সৈন্যং কালেনানেন ভারত

যদি ত্বস্ত্রাণি মুঞ্চেয়ং মহান্তি সমরে স্থিতঃ
শতসাহস্রঘাতীনি হন্যাং মাসেন ভারত

সংজয় উবাচ
শ্রুত্বা ভীষ্মস্য তদ্বাক্যং রাজা দুর্যোধনস্তদা
পর্যপৃচ্ছত রাজেন্দ্র দ্রোণমঙ্গিরসাং বরম্

আচার্য কেন কালেন পাণ্ডুপুত্রস্য সৈনিকান্
নিহন্যা ইতি তং দ্রোণঃ প্রত্যুবাচ হসন্নিব

স্থবিরোঽস্মি কুরুশ্রেষ্ঠ মন্দপ্রাণবিচেষ্টিতঃ
অস্ত্রাগ্নিনা নির্দহেয়ং পাণ্ডবানামনীকিনীম্

যথা ভীষ্মঃ শাংতনবো মাসেনেতি মতির্মম
এষা মে পরমা শক্তিরেতন্মে পরমং বলম্

দ্বাভ্যামেব তু মাসাভ্যাং কৃপঃ শারদ্বতোঽব্রবীৎ
দ্রৌণিস্তু দশরাত্রেণ প্রতিজজ্ঞে বলক্ষয়ম্
কর্ণস্তু পঞ্চরাত্রেণ প্রতিজজ্ঞে মহাস্ত্রবিৎ

তচ্ছ্রুত্বা সূতপুত্রস্য বাক্যং সাগরগাসুতঃ
জহাস সস্বনং হাসং বাক্যং চেদমুবাচ হ

ন হি তাবদ্রণে পার্থং বাণখড্গধনুর্ধরম্
বাসুদেবসমায়ুক্তং রথেনোদ্যন্তমচ্যুতম্

সমাগচ্ছসি রাধেয় তেনৈবমভিমন্যসে
শক্যমেবং চ ভূয়শ্চ ত্বয়া বক্তুং যথেষ্টতঃ