অধ্যায় 195

195.1

বৈশংপায়ন উবাচ
এতচ্ছ্রুত্বা তু কৌন্তেয়ঃ সর্বান্ভ্রাতৄনুপহ্বরে
আহূয় ভরতশ্রেষ্ঠ ইদং বচনমব্রবীৎ

ধার্তরাষ্ট্রস্য সৈন্যেষু যে চারপুরুষা মম
তে প্রবৃত্তিং প্রয়চ্ছন্তি মমেমাং ব্যুষিতাং নিশাম্

দুর্যোধনঃ কিলাপৃচ্ছদাপগেয়ং মহাব্রতম্
কেন কালেন পাণ্ডূনাং হন্যাঃ সৈন্যমিতি প্রভো

মাসেনেতি চ তেনোক্তো ধার্তরাষ্ট্রঃ সুদুর্মতিঃ
তাবতা চাপি কালেন দ্রোণোঽপি প্রত্যজানত

গৌতমো দ্বিগুণং কালমুক্তবানিতি নঃ শ্রুতম্
দ্রৌণিস্তু দশরাত্রেণ প্রতিজজ্ঞে মহাস্ত্রবিৎ

তথা দিব্যাস্ত্রবিত্কর্ণঃ সংপৃষ্টঃ কুরুসংসদি
পঞ্চভির্দিবসৈর্হন্তুং স সৈন্যং প্রতিজজ্ঞিবান্

তস্মাদহমপীচ্ছামি শ্রোতুমর্জুন তে বচঃ
কালেন কিয়তা শত্রূন্ক্ষপয়েরিতি সংয়ুগে

এবমুক্তো গুডাকেশঃ পার্থিবেন ধনংজয়ঃ
বাসুদেবমবেক্ষ্যেদং বচনং প্রত্যভাষত

সর্ব এতে মহাত্মানঃ কৃতাস্ত্রাশ্চিত্রয়োধিনঃ
অসংশয়ং মহারাজ হন্যুরেব বলং তব

অপৈতু তে মনস্তাপো যথাসত্যং ব্রবীম্যহম্
হন্যামেকরথেনাহং বাসুদেবসহায়বান্

সামরানপি লোকাংস্ত্রীন্সহস্থাবরজঙ্গমান্
ভূতং ভব্যং ভবিষ্যচ্চ নিমেষাদিতি মে মতিঃ

যত্তদ্ঘোরং পশুপতিঃ প্রাদাদস্ত্রং মহন্মম
কৈরাতে দ্বন্দ্বয়ুদ্ধে বৈ তদিদং ময়ি বর্ততে

যদ্যুগান্তে পশুপতিঃ সর্বভূতানি সংহরন্
প্রয়ুঙ্ক্তে পুরুষব্যাঘ্র তদিদং ময়ি বর্ততে

তন্ন জানাতি গাঙ্গেয়ো ন দ্রোণো ন চ গৌতমঃ
ন চ দ্রোণসুতো রাজন্কুত এব তু সূতজঃ

ন তু যুক্তং রণে হন্তুং দিব্যৈরস্ত্রৈঃ পৃথগ্জনম্
আর্জবেনৈব যুদ্ধেন বিজেষ্যামো বয়ং পরান্

তথেমে পুরুষব্যাঘ্রাঃ সহায়াস্তব পার্থিব
সর্বে দিব্যাস্ত্রবিদুষঃ সর্বে যুদ্ধাভিনন্দিনঃ

বেদান্তাবভৃথস্নাতাঃ সর্ব এতেঽপরাজিতাঃ
নিহন্যুঃ সমরে সেনাং দেবানামপি পাণ্ডব

শিখণ্ডী যুয়ুধানশ্চ ধৃষ্টদ্যুম্নশ্চ পার্ষতঃ
ভীমসেনো যমৌ চোভৌ যুধামন্যূত্তমৌজসৌ

বিরাটদ্রুপদৌ চোভৌ ভীষ্মদ্রোণসমৌ যুধি
স্বয়ং চাপি সমর্থোঽসি ত্রৈলোক্যোত্সাদনে অপি

ক্রোধাদ্যং পুরুষং পশ্যেস্ত্বং বাসবসমদ্যুতে
ক্ষিপ্রং ন স ভবেদ্ব্যক্তমিতি ত্বাং বেদ্মি কৌরব