অধ্যায় 196

196.1

বৈশংপায়ন উবাচ
ততঃ প্রভাতে বিমলে ধার্তরাষ্ট্রেণ চোদিতাঃ
দুর্যোধনেন রাজানঃ প্রয়য়ুঃ পাণ্ডবান্প্রতি

আপ্লাব্য শুচয়ঃ সর্বে স্রগ্বিণঃ শুক্লবাসসঃ
গৃহীতশস্ত্রা ধ্বজিনঃ স্বস্তি বাচ্য হুতাগ্নয়ঃ

সর্বে বেদবিদঃ শূরাঃ সর্বে সুচরিতব্রতাঃ
সর্বে কর্মকৃতশ্চৈব সর্বে চাহবলক্ষণাঃ

আহবেষু পরাঁল্লোকাঞ্জিগীষন্তো মহাবলাঃ
একাগ্রমনসঃ সর্বে শ্রদ্দধানাঃ পরস্য চ

বিন্দানুবিন্দাবাবন্ত্যৌ কেকয়া বাহ্লিকৈঃ সহ
প্রয়য়ুঃ সর্ব এবৈতে ভারদ্বাজপুরোগমাঃ

অশ্বত্থামা শাংতনবঃ সৈন্ধবোঽথ জয়দ্রথঃ
দাক্ষিণাত্যাঃ প্রতীচ্যাশ্চ পার্বতীয়াশ্চ যে রথাঃ

গান্ধাররাজঃ শকুনিঃ প্রাচ্যোদীচ্যাশ্চ সর্বশঃ
শকাঃ কিরাতা যবনাঃ শিবয়োঽথ বসাতয়ঃ

স্বৈঃ স্বৈরনীকৈঃ সহিতাঃ পরিবার্য মহারথম্
এতে মহারথাঃ সর্বে দ্বিতীয়ে নির্যয়ুর্বলে

কৃতবর্মা সহানীকস্ত্রিগর্তাশ্চ মহাবলাঃ
দুর্যোধনশ্চ নৃপতির্ভ্রাতৃভিঃ পরিবারিতঃ

শলো ভূরিশ্রবাঃ শল্যঃ কৌসল্যোঽথ বৃহদ্বলঃ
এতে পশ্চাদবর্তন্ত ধার্তরাষ্ট্রপুরোগমাঃ

তে সমেন পথা যাত্বা যোত্স্যমানা মহারথাঃ
কুরুক্ষেত্রস্য পশ্চার্ধে ব্যবতিষ্ঠন্ত দংশিতাঃ

দুর্যোধনস্তু শিবিরং কারয়ামাস ভারত
যথৈব হাস্তিনপুরং দ্বিতীয়ং সমলংকৃতম্

ন বিশেষং বিজানন্তি পুরস্য শিবিরস্য বা
কুশলা অপি রাজেন্দ্র নরা নগরবাসিনঃ

তাদৃশান্যেব দুর্গাণি রাজ্ঞামপি মহীপতিঃ
কারয়ামাস কৌরব্যঃ শতশোঽথ সহস্রশঃ

পঞ্চয়োজনমুত্সৃজ্য মণ্ডলং তদ্রণাজিরম্
সেনানিবেশাস্তে রাজন্নাবিশঞ্শতসংঘশঃ

তত্র তে পৃথিবীপালা যথোত্সাহং যথাবলম্
বিবিশুঃ শিবিরাণ্যাশু দ্রব্যবন্তি সহস্রশঃ

তেষাং দুর্যোধনো রাজা সসৈন্যানাং মহাত্মনাম্
ব্যাদিদেশ সবাহ্যানাং ভক্ষ্যভোজ্যমনুত্তমম্

সগজাশ্বমনুষ্যাণাং যে চ শিল্পোপজীবিনঃ
যে চান্যেঽনুগতাস্তত্র সূতমাগধবন্দিনঃ

বণিজো গণিকা বারা যে চৈব প্রেক্ষকা জনাঃ
সর্বাংস্তান্কৌরবো রাজা বিধিবত্প্রত্যবৈক্ষত