UtshovChapter 196
196.1
वैशंपायन उवाच
ततः प्रभाते विमले धार्तराष्ट्रेण चोदिताः
दुर्योधनेन राजानः प्रययुः पाण्डवान्प्रति
Vaishampayana uvacha
Tatah prabhate vimale dhartarashtrena choditah
Duryodhanena rajanah prayayuh pandavanprati
196.2
आप्लाव्य शुचयः सर्वे स्रग्विणः शुक्लवाससः
गृहीतशस्त्रा ध्वजिनः स्वस्ति वाच्य हुताग्नयः
Aplavya shuchayah sarve sragvinah shuklavasasah
Grihitashastra dhvajinah svasti vachya hutagnayah
196.3
सर्वे वेदविदः शूराः सर्वे सुचरितव्रताः
सर्वे कर्मकृतश्चैव सर्वे चाहवलक्षणाः
Sarve vedavidah shurah sarve sucharitavratah
Sarve karmakritashchaiva sarve chahavalakshanah
196.4
आहवेषु पराँल्लोकाञ्जिगीषन्तो महाबलाः
एकाग्रमनसः सर्वे श्रद्दधानाः परस्य च
Ahaveshu paranllokanjigishanto mahabalah
Ekagramanasah sarve shraddadhanah parasya cha
196.5
विन्दानुविन्दावावन्त्यौ केकया बाह्लिकैः सह
प्रययुः सर्व एवैते भारद्वाजपुरोगमाः
Vindanuvindavavantyau kekaya bahlikaih saha
Prayayuh sarva evaite bharadvajapurogamah
196.6
अश्वत्थामा शांतनवः सैन्धवोऽथ जयद्रथः
दाक्षिणात्याः प्रतीच्याश्च पार्वतीयाश्च ये रथाः
Ashvatthama shantanavah saindhavotha jayadrathah
Dakshinatyah pratichyashcha parvatiyashcha ye rathah
196.7
गान्धारराजः शकुनिः प्राच्योदीच्याश्च सर्वशः
शकाः किराता यवनाः शिबयोऽथ वसातयः
Gandhararajah shakunih prachyodichyashcha sarvashah
Shakah kirata yavanah shibayotha vasatayah
196.8
स्वैः स्वैरनीकैः सहिताः परिवार्य महारथम्
एते महारथाः सर्वे द्वितीये निर्ययुर्बले
Svaih svairanikaih sahitah parivarya maharatham
Ete maharathah sarve dvitiye niryayurbale
196.9
कृतवर्मा सहानीकस्त्रिगर्ताश्च महाबलाः
दुर्योधनश्च नृपतिर्भ्रातृभिः परिवारितः
Kritavarma sahanikastrigartashcha mahabalah
Duryodhanashcha nripatirbhratribhih parivaritah
196.10
शलो भूरिश्रवाः शल्यः कौसल्योऽथ बृहद्बलः
एते पश्चादवर्तन्त धार्तराष्ट्रपुरोगमाः
Shalo bhurishravah shalyah kausalyotha brihadbalah
Ete pashchadavartanta dhartarashtrapurogamah
196.11
ते समेन पथा यात्वा योत्स्यमाना महारथाः
कुरुक्षेत्रस्य पश्चार्धे व्यवतिष्ठन्त दंशिताः
Te samena patha yatva yotsyamana maharathah
Kurukshetrasya pashchardhe vyavatishthanta danshitah
196.12
दुर्योधनस्तु शिबिरं कारयामास भारत
यथैव हास्तिनपुरं द्वितीयं समलंकृतम्
Duryodhanastu shibiram karayamasa bharata
Yathaiva hastinapuram dvitiyam samalankritam
196.13
न विशेषं विजानन्ति पुरस्य शिबिरस्य वा
कुशला अपि राजेन्द्र नरा नगरवासिनः
Na vishesham vijananti purasya shibirasya va
Kushala api rajendra nara nagaravasinah
196.14
तादृशान्येव दुर्गाणि राज्ञामपि महीपतिः
कारयामास कौरव्यः शतशोऽथ सहस्रशः
Tadrishanyeva durgani ragyamapi mahipatih
Karayamasa kauravyah shatashotha sahasrashah
196.15
पञ्चयोजनमुत्सृज्य मण्डलं तद्रणाजिरम्
सेनानिवेशास्ते राजन्नाविशञ्शतसंघशः
Panchayojanamutsrijya mandalam tadranajiram
Senaniveshaste rajannavishanshatasanghashah
196.16
तत्र ते पृथिवीपाला यथोत्साहं यथाबलम्
विविशुः शिबिराण्याशु द्रव्यवन्ति सहस्रशः
Tatra te prithivipala yathotsaham yathabalam
Vivishuh shibiranyashu dravyavanti sahasrashah
196.17
तेषां दुर्योधनो राजा ससैन्यानां महात्मनाम्
व्यादिदेश सबाह्यानां भक्ष्यभोज्यमनुत्तमम्
Tesham duryodhano raja sasainyanam mahatmanam
Vyadidesha sabahyanam bhakshyabhojyamanuttamam
196.18
सगजाश्वमनुष्याणां ये च शिल्पोपजीविनः
ये चान्येऽनुगतास्तत्र सूतमागधबन्दिनः
Sagajashvamanushyanam ye cha shilpopajivinah
Ye chanyenugatastatra sutamagadhabandinah
196.19
वणिजो गणिका वारा ये चैव प्रेक्षका जनाः
सर्वांस्तान्कौरवो राजा विधिवत्प्रत्यवैक्षत
Vanijo ganika vara ye chaiva prekshaka janah
Sarvanstankauravo raja vidhivatpratyavaikshata