অধ্যায় 197

197.1

বৈশংপায়ন উবাচ
তথৈব রাজা কৌন্তেয়ো ধর্মপুত্রো যুধিষ্ঠিরঃ
ধৃষ্টদ্যুম্নমুখান্বীরাংশ্চোদয়ামাস ভারত

চেদিকাশিকরূষাণাং নেতারং দৃঢবিক্রমম্
সেনাপতিমমিত্রঘ্নং ধৃষ্টকেতুমথাদিশৎ

বিরাটং দ্রুপদং চৈব যুয়ুধানং শিখণ্ডিনম্
পাঞ্চাল্যৌ চ মহেষ্বাসৌ যুধামন্যূত্তমৌজসৌ

তে শূরাশ্চিত্রবর্মাণস্তপ্তকুণ্ডলধারিণঃ
আজ্যাবসিক্তা জ্বলিতা ধিষ্ণ্যেষ্বিব হুতাশনাঃ
অশোভন্ত মহেষ্বাসা গ্রহাঃ প্রজ্বলিতা ইব

সোঽথ সৈন্যং যথায়োগং পূজয়িত্বা নরর্ষভঃ
দিদেশ তান্যনীকানি প্রয়াণায় মহীপতিঃ

অভিমন্যুং বৃহন্তং চ দ্রৌপদেয়াংশ্চ সর্বশঃ
ধৃষ্টদ্যুম্নমুখানেতান্প্রাহিণোত্পাণ্ডুনন্দনঃ

ভীমং চ যুয়ুধানং চ পাণ্ডবং চ ধনংজয়ম্
দ্বিতীয়ং প্রেষয়ামাস বলস্কন্ধং যুধিষ্ঠিরঃ

ভাণ্ডং সমারোপয়তাং চরতাং সংপ্রধাবতাম্
হৃষ্টানাং তত্র যোধানাং শব্দো দিবমিবাস্পৃশৎ

স্বয়মেব ততঃ পশ্চাদ্বিরাটদ্রুপদান্বিতঃ
তথান্যৈঃ পৃথিবীপালৈঃ সহ প্রায়ান্মহীপতিঃ

ভীমধন্বায়নী সেনা ধৃষ্টদ্যুম্নপুরস্কৃতা
গঙ্গেব পূর্ণা স্তিমিতা স্যন্দমানা ব্যদৃশ্যত

ততঃ পুনরনীকানি ব্যয়োজয়ত বুদ্ধিমান্
মোহয়ন্ধৃতরাষ্ট্রস্য পুত্রাণাং বুদ্ধিনিস্রবম্

দ্রৌপদেয়ান্মহেষ্বাসানভিমন্যুং চ পাণ্ডবঃ
নকুলং সহদেবং চ সর্বাংশ্চৈব প্রভদ্রকান্

দশ চাশ্বসহস্রাণি দ্বিসাহস্রং চ দন্তিনঃ
অয়ুতং চ পদাতীনাং রথাঃ পঞ্চশতাস্তথা

ভীমসেনং চ দুর্ধর্ষং প্রথমং প্রাদিশদ্বলম্
মধ্যমে তু বিরাটং চ জয়ত্সেনং চ মাগধম্

মহারথৌ চ পাঞ্চাল্যৌ যুধামন্যূত্তমৌজসৌ
বীর্যবন্তৌ মহাত্মানৌ গদাকার্মুকধারিণৌ
অন্বয়াতাং ততো মধ্যে বাসুদেবধনংজয়ৌ

বভূবুরতিসংরব্ধাঃ কৃতপ্রহরণা নরাঃ
তেষাং বিংশতিসাহস্রা ধ্বজাঃ শূরৈরধিষ্ঠিতাঃ

পঞ্চ নাগসহস্রাণি রথবংশাশ্চ সর্বশঃ
পদাতয়শ্চ যে শূরাঃ কার্মুকাসিগদাধরাঃ
সহস্রশোঽন্বয়ুঃ পশ্চাদগ্রতশ্চ সহস্রশঃ

যুধিষ্ঠিরো যত্র সৈন্যে স্বয়মেব বলার্ণবে
তত্র তে পৃথিবীপালা ভূয়িষ্ঠং পর্যবস্থিতাঃ

তত্র নাগসহস্রাণি হয়ানাময়ুতানি চ
তথা রথসহস্রাণি পদাতীনাং চ ভারত
যদাশ্রিত্যাভিয়ুয়ুধে ধার্তরাষ্ট্রং সুয়োধনম্

ততোঽন্যে শতশঃ পশ্চাত্সহস্রায়ুতশো নরাঃ
নদন্তঃ প্রয়য়ুস্তেষামনীকানি সহস্রশঃ

তত্র ভেরীসহস্রাণি শঙ্খানাময়ুতানি চ
বাদয়ন্তি স্ম সংহৃষ্টাঃ সহস্রায়ুতশো নরাঃ