UtshovChapter 150
150.1
जनमेजय उवाच
युधिष्ठिरं सहानीकमुपयान्तं युयुत्सया
संनिविष्टं कुरुक्षेत्रे वासुदेवेन पालितम्
Janamejaya uvacha
Yudhishthiram sahanikamupayantam yuyutsaya
Sannivishtam kurukshetre vasudevena palitam
150.2
विराटद्रुपदाभ्यां च सपुत्राभ्यां समन्वितम्
केकयैर्वृष्णिभिश्चैव पार्थिवैः शतशो वृतम्
Viratadrupadabhyam cha saputrabhyam samanvitam
Kekayairvrishnibhishchaiva parthivaih shatasho vritam
150.3
महेन्द्रमिव चादित्यैरभिगुप्तं महारथैः
श्रुत्वा दुर्योधनो राजा किं कार्यं प्रत्यपद्यत
Mahendramiva chadityairabhiguptam maharathaih
Shrutva duryodhano raja kim karyam pratyapadyata
150.4
एतदिच्छाम्यहं श्रोतुं विस्तरेण तपोधन
संभ्रमे तुमुले तस्मिन्यदासीत्कुरुजाङ्गले
Etadichchhamyaham shrotum vistarena tapodhana
Sambhrame tumule tasminyadasitkurujangale
150.5
व्यथयेयुर्हि देवानां सेनामपि समागमे
पाण्डवा वासुदेवश्च विराटद्रुपदौ तथा
Vyathayeyurhi devanam senamapi samagame
Pandava vasudevashcha viratadrupadau tatha
150.6
धृष्टद्युम्नश्च पाञ्चाल्यः शिखण्डी च महारथः
युयुधानश्च विक्रान्तो देवैरपि दुरासदः
Dhrishtadyumnashcha panchalyah shikhandi cha maharathah
Yuyudhanashcha vikranto devairapi durasadah
150.7
एतदिच्छाम्यहं श्रोतुं विस्तरेण तपोधन
कुरूणां पाण्डवानां च यद्यदासीद्विचेष्टितम्
Etadichchhamyaham shrotum vistarena tapodhana
Kurunam pandavanam cha yadyadasidvicheshtitam
150.8
वैशंपायन उवाच
प्रतियाते तु दाशार्हे राजा दुर्योधनस्तदा
कर्णं दुःशासनं चैव शकुनिं चाब्रवीदिदम्
Vaishampayana uvacha
Pratiyate tu dasharhe raja duryodhanastada
Karnam duhshasanam chaiva shakunim chabravididam
150.9
अकृतेनैव कार्येण गतः पार्थानधोक्षजः
स एनान्मन्युनाविष्टो ध्रुवं वक्ष्यत्यसंशयम्
Akritenaiva karyena gatah parthanadhokshajah
Sa enanmanyunavishto dhruvam vakshyatyasanshayam
150.10
इष्टो हि वासुदेवस्य पाण्डवैर्मम विग्रहः
भीमसेनार्जुनौ चैव दाशार्हस्य मते स्थितौ
Ishto hi vasudevasya pandavairmama vigrahah
Bhimasenarjunau chaiva dasharhasya mate sthitau
150.11
अजातशत्रुरप्यद्य भीमार्जुनवशानुगः
निकृतश्च मया पूर्वं सह सर्वैः सहोदरैः
Ajatashatrurapyadya bhimarjunavashanugah
Nikritashcha maya purvam saha sarvaih sahodaraih
150.12
विराटद्रुपदौ चैव कृतवैरौ मया सह
तौ च सेनाप्रणेतारौ वासुदेववशानुगौ
Viratadrupadau chaiva kritavairau maya saha
Tau cha senapranetarau vasudevavashanugau
150.13
भविता विग्रहः सोऽयं तुमुलो लोमहर्षणः
तस्मात्सांग्रामिकं सर्वं कारयध्वमतन्द्रिताः
Bhavita vigrahah soyam tumulo lomaharshanah
Tasmatsangramikam sarvam karayadhvamatandritah
150.14
शिबिराणि कुरुक्षेत्रे क्रियन्तां वसुधाधिपाः
सुपर्याप्तावकाशानि दुरादेयानि शत्रुभिः
Shibirani kurukshetre kriyantam vasudhadhipah
Suparyaptavakashani duradeyani shatrubhih
150.15
आसन्नजलकाष्ठानि शतशोऽथ सहस्रशः
अच्छेद्याहारमार्गाणि रत्नोच्चयचितानि च
विविधायुधपूर्णानि पताकाध्वजवन्ति च
Asannajalakashthani shatashotha sahasrashah
Achchhedyaharamargani ratnochchayachitani cha
Vividhayudhapurnani patakadhvajavanti cha
150.16
समाश्च तेषां पन्थानः क्रियन्तां नगराद्बहिः
प्रयाणं घुष्यतामद्य श्वोभूत इति माचिरम्
Samashcha tesham panthanah kriyantam nagaradbahih
Prayanam ghushyatamadya shvobhuta iti machiram
150.17
ते तथेति प्रतिज्ञाय श्वोभूते चक्रिरे तथा
हृष्टरूपा महात्मानो विनाशाय महीक्षिताम्
Te tatheti pratigyaya shvobhute chakrire tatha
Hrishtarupa mahatmano vinashaya mahikshitam
150.18
ततस्ते पार्थिवाः सर्वे तच्छ्रुत्वा राजशासनम्
आसनेभ्यो महार्हेभ्य उदतिष्ठन्नमर्षिताः
Tataste parthivah sarve tachchhrutva rajashasanam
Asanebhyo maharhebhya udatishthannamarshitah
150.19
बाहून्परिघसंकाशान्संस्पृशन्तः शनैः शनैः
काञ्चनाङ्गददीप्तांश्च चन्दनागरुभूषितान्
Bahunparighasankashansansprishantah shanaih shanaih
Kanchanangadadiptanshcha chandanagarubhushitan
150.20
उष्णीषाणि नियच्छन्तः पुण्डरीकनिभैः करैः
अन्तरीयोत्तरीयाणि भूषणानि च सर्वशः
Ushnishani niyachchhantah pundarikanibhaih karaih
Antariyottariyani bhushanani cha sarvashah
150.21
ते रथान्रथिनः श्रेष्ठा हयांश्च हयकोविदाः
सज्जयन्ति स्म नागांश्च नागशिक्षासु निष्ठिताः
Te rathanrathinah shreshtha hayanshcha hayakovidah
Sajjayanti sma naganshcha nagashikshasu nishthitah
150.22
अथ वर्माणि चित्राणि काञ्चनानि बहूनि च
विविधानि च शस्त्राणि चक्रुः सज्जानि सर्वशः
Atha varmani chitrani kanchanani bahuni cha
Vividhani cha shastrani chakruh sajjani sarvashah
150.23
पदातयश्च पुरुषाः शस्त्राणि विविधानि च
उपजह्रुः शरीरेषु हेमचित्राण्यनेकशः
Padatayashcha purushah shastrani vividhani cha
Upajahruh sharireshu hemachitranyanekashah
150.24
तदुत्सव इवोदग्रं संप्रहृष्टनरावृतम्
नगरं धार्तराष्ट्रस्य भारतासीत्समाकुलम्
Tadutsava ivodagram samprahrishtanaravritam
Nagaram dhartarashtrasya bharatasitsamakulam
150.25
जनौघसलिलावर्तो रथनागाश्वमीनवान्
शङ्खदुन्दुभिनिर्घोषः कोशसंचयरत्नवान्
Janaughasalilavarto rathanagashvaminavan
Shankhadundubhinirghoshah koshasanchayaratnavan
150.26
चित्राभरणवर्मोर्मिः शस्त्रनिर्मलफेनवान्
प्रासादमालाद्रिवृतो रथ्यापणमहाह्रदः
Chitrabharanavarmormih shastranirmalaphenavan
Prasadamaladrivrito rathyapanamahahradah
150.27
योधचन्द्रोदयोद्भूतः कुरुराजमहार्णवः
अदृश्यत तदा राजंश्चन्द्रोदय इवार्णवः
Yodhachandrodayodbhutah kururajamaharnavah
Adrishyata tada rajanshchandrodaya ivarnavah